រដ្ឋមន្ត្រីអប់រំ អំពាវនាវដល់សិស្សនិស្សិតបរិច្ចាគឈាម ដើម្បីជួយសង្គ្រោះជីវិតមនុស្ស

ជាតិ

រដ្ឋមន្ត្រីអប់រំ អំពាវនាវដល់សិស្សនិស្សិតបរិច្ចាគឈាម ដើម្បីជួយសង្គ្រោះជីវិតមនុស្ស

28, Sep 2017 , 8:39 am

រូបភាព

ដោយ:

ភ្នំពេញ៖ លោក ហង់ ជួន ណារ៉ុន រដ្ឋមន្ត្រីអប់រំ បានអំពាវដល់សិស្សនិស្សិតទាំងឡាយ ជួយចូលរួមផ្តល់ឈាមឲ្យបានច្រើន ដើម្បីជួយស្រោចស្រង់ជីវិតមនុស្ស។ បើតាមលោករដ្ឋមន្ត្រី ការបរិច្ចាគឈាម គឺជាកាយវិការមនុស្សធម៌។

ថ្លែងក្នុងកម្មវិធីផ្សព្វផ្សាយអំណោយឈាមដោយស្ម័គ្រចិត្តនៅព្រឹកថ្ងៃទី២៧ ខែកញ្ញា លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអំពាវដល់សិស្សនិស្សិតចូលរួមបរិច្ចាគឈាមដោយស្ម័គ្រចិត្ត ដែលជាតម្រូវការចាំបាច់សម្រាប់ជួយសង្គ្រោះជីវិតមនុស្ស។ លោករដ្ឋមន្ត្រីថ្លែងយ៉ាងដូច្នេះថា៖«ខ្ញុំសូមអំពាវនាវ ដល់សិស្សនិស្សិត យុវជន ចូលរួមចំណែកបរិច្ចាគឈាមឱ្យបានកុះករ»។

បើតាមលោករដ្ឋមន្ត្រី ការផ្តល់ឈាមមិនត្រឹមតែជួយសង្គ្រោះជីវិតអ្នកជំងឺប៉ុណ្ណោះទេ តែថែមទាំងជួយដល់សុខភាពអ្នកផ្តល់ឈាម និងជាកាយវិការប្រកបដោយមនុស្សធម៌ផងដែរ។ ទាក់ទងនឹងការផ្តល់ឈាមនេះដែរ វេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាម ត្រូវបានទំព័រហ្វេសប៊ុកខាងលើស្រង់ប្រសាសន៍ថា ក្នុងមួយឆ្នាំ មនុស្សពេញវ័យអាចបរិច្ចាគឈាមបានប្រមាណ៣ដងសម្រាប់ស្ត្រី និង៤ដងសម្រាប់បុរស។ លោកវេជ្ជបណ្ឌិតថ្លែងបែបនេះថា៖ «ការផ្តល់ឈាម មិនបានប៉ះពាល់ដល់សុខភាពឡើយ ព្រោះឈាមនឹងត្រូវបានផលិតឡើងវិញនៅក្នុងខួរឆ្អឹងរបស់មនុស្ស»៕