កីឡាជាតិ
ជាតិ
លោក Leonardo អះអាងថាកម្ពុជានឹងមានទម្រង់លេងល្អជាងមុនសម្រាប់ការជួបវៀតណាម លោក Leonardo Vitorino ពេលចូលរួមសន្និសីទសារព័ត៌មានមុនការប្រកួត AFC Asian Cup នៅទីក្រុងហូជីមិញ
× គ្រូបង្វឹកក្រុមជម្រើសជាតិកម្ពុជាលោក Leonardo Vitorino បានអះអាងថា កម្ពុជានឹងមានទម្រង់លេងខុសពីមុនប្រកបដោយគុណភាពសម្រាប់ការតទល់ជាមួយវៀតណាមនាជំនួបជើងទី២ក្នុងវគ្គជម្រុះពូល C នៃព្រឹត្តិការណ៍ AFC Asian Cup UAE 2019 នាវេលាម៉ោង៧យប់ថ្ងៃទី១០ ខែតុលា នៅកីឡដ្ឋាន My Dinh Stadium ក្នុងទីក្រុងហូជីមិញប្រទេសវៀតណាម។
ក្រុមជម្រើសជាតិកម្ពុជាក្រោមការដឹកនាំរបស់គ្រូបង្វឹកជនជាតិប្រេស៊ីល Leonardo Vitorino បានប្រកួតចាញ់ក្រុមឥណ្ឌូណេស៊ីក្នុងលទ្ធផល ៣-១ នាជំនួបមិត្តភាពអន្តរជាតិកាលពីថ្ងៃទី៤ តុលា កន្លងទៅ។ តែគ្រូបង្វឹកក្រុមជម្រើសជាតិកម្ពុជាបានចាត់ទុកជំនួបមិត្តភាពនេះគ្រាន់ជាការដកស្រង់បច្ចេកទេស និងធ្វើតេស្តសមត្ថភាពកីឡាករដើម្បីស្វែងរកចំណុចខ្វះខាតតែប៉ុណ្ណោះ។
ក្នុងសន្និសីទសារព័ត៌មានមុនការប្រកួតកាលពីព្រឹកថ្ងៃទី៩ ខែតុលា នៅទីក្រុងហូជីមិញ លោក Leonardo Vitorino គ្រូបង្វឹកក្រុមជម្រើសជាតិកម្ពុជាបានអះអាងថា ទោះបីការប្រមូលផ្តុំមានរយៈពេលខ្លី ប៉ុន្តែតាមរយៈជំនួបមិត្តភាពខាងលើកម្ពុជានឹងមានទម្រង់លេងមួយដ៏ល្អ និងខុសប្លែកពីមុនសម្រាប់ការតទល់ជាមួយវៀតណាមម្តងនេះ។ លោកបានបញ្ជាក់ថា នឹងមានការផ្លាស់ប្តូរសមាសភាពកីឡាករ និងកែប្រែចំណុចមិនល្អចំនួនដែលបានកើតឡើងក្នុងជំនួបមិត្តភាពជាមួយឥណ្ឌូណេស៊ី។
«ការជួបជាមួយវៀតណាមលើកនេះដូចការប្រកួតផ្តាច់ព្រ័ត្រ ព្រោះវាជាការប្រកួយមួយដ៏សំខាន់សម្រាប់កាត់ក្តីកម្ពុជា ប្រសិនបើឈ្នះយើងនឹងមានឱកាសឡើងទៅវគ្គបន្ត តែបើយើងចាញ់យើងនឹងធ្លាក់»។ នេះជាការលើកឡើងរបស់ លោក Leonardo ហើយលោកបានបន្ថែមថា៖«វានឹងក្លាយជាការប្រកួតដ៏តានតានសម្រាប់កម្ពុជាព្រោះវៀតណាមមានកីឡាករល្អច្រើន តែយើងមានទំនុកចិត្តថាកីឡាកររបស់យើងនឹងអាចលេងបានល្អក្នុងជំនួបមួយនេះ»។
ក្រុមជម្រើសជាតិកម្ពុជាត្រូវតទល់ជាមួយវៀតណាមនាជំនួបជើងទី២ក្នុងវគ្គជម្រុះពូល C នៃព្រឹត្តិការណ៍ AFC Asian Cup UAE 2019 នាវេលាម៉ោង៧យប់ថ្ងៃទី១០ ខែតុលា នៅកីឡដ្ឋាន My Dinh Stadium ក្នុងទីក្រុងហូជីមិញប្រទេសវៀតណាម។ ជំនួបនេះវាមិនគ្រាន់ជាការប្រកួតកំណត់ពីជោគវាសនាឡើងទៅវគ្គបន្តសម្រាប់កម្ពុជានោះទេ ហើយវាក៏ជាឱកាសសងសឹកលើវៀតណាមដែលបានយកឈ្នះ ២-១ ក្នុងជើងទី១នៅពហុកីឡដ្ឋានជាតិផងដែរ៕
Tag:
បាល់ទាត់
AFC Asian Cup
Leonardo Vitorino
© រក្សាសិទ្ធិដោយ thmeythmey.com