ជាតិ
បើគណបក្សសង្គ្រោះជាតិរំលាយនោះ សមាជិកក្រុមប្រឹក្សាឃុំសង្កាត់ ត្រូវអសុពលភាព
× ភ្នំពេញ៖ បណ្ដឹងសុំរំលាយគណបក្សសង្គ្រោះជាតិ បានធ្លាក់ដល់ដៃតុលាការកំពូលហើយ ដើម្បីត្រួតពិនិត្យនឹងសម្រេចលើជោគវាសនាគណបក្សនេះ។ ប្រសិនបើគណបក្សសង្គ្រោះជាតិរំលាយពិតមែន តើសមាជិកភាពតំណាងរាស្ត្រនិងក្រុមប្រឹក្សាឃុំសង្កាត់ ត្រូវអសុពលភាពដែរឬទេ? នេះជាចម្ងល់ដែលមហាជនមួយចំនួនចង់ដឹង។
ចម្ងល់នេះត្រូវបានបកស្រាយតាមរយៈច្បាប់ស្តីពី ការបោះឆ្នោតជ្រើសតាំងតំណាងរាស្ត្រ ត្រង់មាត្រា១៣៥ (ង) ដែលបានចែងថា ៖«ក្នុងករណីគណបក្សនយោបាយណាមួយ ទទួលបានអាសនៈមួយ ឬច្រើននៅក្នុងរដ្ឋសភា ប៉ុន្តែគណបក្សនយោបាយនោះ បានប្រកាសបោះបង់ចោលអាសនៈខ្លួន ឬត្រូវបានលុបឈ្មោះចេញពីបញ្ជីឈ្មោះគណបក្សនយោបាយ តាមច្បាប់ស្តីគណបក្សនយោបាយ បញ្ជីបេក្ខជន និងបេក្ខជននៃគណបក្សនយោបាយនោះ ដែលប្រកាសថាជាប់ឆ្នោតរួចហើយ មិនមានសុពលភាព និងមិនមានគុណសម្បត្តិទៅទៀតបានឡើយ»។
មាត្រា១៣៥ ចំណុច(ង) ដដែល ពន្យល់ថា ក្នុងករណីខាងលើនេះ គណៈកម្មាធិការរៀបចំការបោះឆ្នោត ត្រូវធ្វើការបែងចែកអាសនៈដែលនៅទំនេរនោះ ក្នុងរយៈពេលយ៉ាងយូរ៧ថ្ងៃ ទៅឲ្យគណបក្សនយោបាយផ្សេងដែលទទួលបានអាសនៈក្នុងរាជធានី-ខេត្ត តាមរូមមន្តចំនួន៣ ដោយមិនគិតបញ្ចូលគណបក្សដែលបោះបង់អាសនៈ។
នៅពេលដែលសួរទៅគណកម្មាធិការរៀបចំការបោះឆ្នោតថា បើគណបក្សសង្គ្រោះជាតិរំលាយ ដូច្នេះតំណាងរាស្ត្រ និងក្រុមប្រឹក្សាឃុំសង្កាត់ នឹងត្រូវបាត់បង់អាសនៈដែរ? ត្រង់ចំណុចនេះអ្នកនាំពាក្យគណកម្មាធិការជាតិរៀបចំការបោះឆ្នោតលោក ហង្ស ពុទ្ធា ឆ្លើយថា គជប ជាស្ថាប័នអនុវត្តតាមច្បាប់ ដូច្នេះអ្វីដែលបានចែងក្នុងមាត្រា១៣៥ (ង) គឺជាអ្វីដែលគជប ត្រូវអនុវត្ត។
បើសិនជាគណបក្សសង្គ្រោះជាតិត្រូវបានរំលាយចោល វាពិតជារឿងអកុសលមួយសម្រាប់ក្រុមអ្នកនយោបាយបក្សប្រឆាំង ដែលប្រឈមនឹងការផ្អាកសកម្មភាពនយោបាយ។ មាត្រា៤៥ ត្រង់កថាខណ្ឌទី៣ នៃច្បាប់ស្តីពីគណបក្សនយោបាយចែងថា៖« [….] ក្នុងករណី ដែលគណបក្សនយោបាយត្រូវបានរំលាយ តុលាការ[កំពូល] អាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។
សម្រាប់អ្នកវិភាគវិញ យល់ឃើញថា បើគណបក្សសង្គ្រោះជាតិត្រូវរំលាយមែននោះ វាមិនមែនជារឿងល្អឡើយ សម្រាប់ប្រទេសកម្ពុជា។ អ្នកវិភាគ លើកឡើងថា បើបក្សប្រឆាំងរំលាយនោះ វាបង្ហាញឲ្យឃើញថា លទ្ធិប្រជាធិបតេយ្យ សេរី ពហុបក្សនៅកម្ពុជា កំពុងតែដើរថយក្រោយ ហើយសហគមន៍អន្តរជាតិ ក៏មិនទទួលស្គាល់ការបោះឆ្នោតនៅកម្ពុជាដែរ បើគ្មានគណបក្សប្រឆាំងដ៏ធំមួយ ប្រកួតប្រជែងជាមួយគណបក្សកាន់អំណាច។ បើតាមអ្នកវិភាគ សហគមន៍អន្តរជាតិក៏មិនឈរឱបដៃមើល បញ្ហានយោបាយនៅក្នុងប្រទេសកម្ពុជាដែរ ពោលគឺពួកគេនឹងអាចធ្វើអ្វីមួយដើម្បីដាក់សម្ពាធមកលើរដ្ឋាភិបាលកម្ពុជា ដើម្បីដោះស្រាយបញ្ហាភាពតានតឹងនយោបាយនេះ។
តែយ៉ាងណាអ្នកនាំពាក្យគណបក្សប្រជាជនកម្ពុជាលោក សុខ ឥសាន ធ្លាប់បកស្រាយថា បើទោះជាគ្មានគណបក្សសង្គ្រោះជាតិចូលរួមការបោះឆ្នោតជាតិនៅឆ្នាំ២០១៨ក្តី ក៏ដំណើរការបោះឆ្នោតនៅបន្តដំណើការទៅមុខដែរ ព្រោះនៅមានគណបក្សក្រៅរដ្ឋាភិបាលចូលរួមប្រកួតប្រជែងក្នុងការបោះឆ្នោតខាងមុខនេះ។
ចំណែកគណកម្មាធិការជាតិរៀបចំការបោះឆ្នោត បានអះអាងថា គជប បានត្រៀមកញ្ចប់ថវិការៀបចំការបោះឆ្នោតរួចហើយ បើទោះជាគ្មានជំនួយពីបរទេសសម្រាប់ដំណើរការបោះឆ្នោតជាតិក្តី៕
© រក្សាសិទ្ធិដោយ thmeythmey.com