ជាតិ
ប្រាក់ឈ្នួលកើនឡើង៖ កម្មករសប្បាយ តែខ្វល់ខ្វាយ រឿងផ្ទះជួល និងទំនិញឡើងថ្លៃ
×
ភ្នំពេញ៖ ថ្មីៗនេះ រដ្ឋាភិបាល បានកំណត់ប្រាក់ឈ្នួលអប្បបរមា ១៧០ ដុល្លារ នៅឆ្នាំ២០១៨ សម្រាប់កម្មករក្នុងវិស័យវាយនភណ្ឌ កាត់ដេរ និងផលិតផលស្បែកជើង។ ប្រាក់ឈ្នួលអប្បបរមា ១៧០ ដុល្លារ ត្រូវបានក្រុមសហជីព និងកម្មករ បង្ហាញការសាទរយ៉ាងខ្លាំង។ ស្របគ្នានេះដែរ ពួកគេស្នើឲ្យសាលារាជធានីភ្នំពេញ ជួយត្រួតពិនិត្យលើម្ចាស់ផ្ទះជួលមួយចំនួន ដែលបានដំឡើងថ្លៃទឹក និងថ្លៃផ្ទះ។ ពួកគេ រអ៊ូថា បើផ្ទះជួល និងទំនិញនៅតែឡើងថ្លៃបែបនេះនោះ ទោះឡើងប្រាក់ខែ ១៧០ ដុល្លារ ក៏ពួកខ្លួនរកលុយមិនសល់ដែរ។
ទន្ទឹមនឹងភាពសប្បាយរីករាយចំពោះប្រាក់ឈ្នួលអប្បបរមា ១៧០ ដុល្លារនៅឆ្នាំ២០១៨ អ្នកស្រី សុខ សាន្ត កម្មការិនីនៅរោងចក្រ ហូយៀហ្គាមិន លីមីធីត ដែលទើបដើរចេញពីក្នុងរោងចក្រសំដៅទៅផ្ទះ ក្នុងអំឡុងពេលបាយថ្ងៃត្រង់ ស្ថិតក្នុងសង្កាត់ចាក់អង្រែលើ ខ័ណ្ឌមានជ័យ បានរអ៊ូពីតម្លៃទឹក ភ្លើង និងផ្ទះ មានតម្លៃថ្លៃ ដែលធ្វើឲ្យគ្រួសារអ្នកស្រីចំណាយកាន់តែច្រើន ខណៈប្រាក់ខែបានដំឡើងតិចតួច។
មានស្រុកកំណើតនៅខេត្តស្វាយរៀង កម្មការិនីវ័យ ៣៣ ឆ្នាំ និងមានកូនពីរនាក់ក្នុងបន្ទុករូបនេះ បានរៀបរាប់ប្រាប់សារព័ត៌មានថ្មីៗថា៖«ទឹកមួយម៉ែត្រគីប តម្លៃ ២៥០០ រៀល ហើយភ្លើងមួយគីឡូវ៉ាត់ ១៥០០ រៀល ព្រោះម្ចាស់ផ្ទះខ្ញុំ គាត់ថា ផ្ទះគាត់មានបីបួនបន្ទប់អ៊ីចឹង គេមិនតទឹកភ្លើងរដ្ឋចូលទេ ទើបទឹក និងភ្លើងមានតម្លៃខ្ពស់។ ពេលបើកលុយមកម្តងៗ ខ្ញុំគ្រាន់តែចំណាយលើ ផ្ទះមួយខែ ៥០ ដុល្លារ ម្ហូប កូនរៀនផង ខ្ញុំមិនសូវសល់លុយទេ»។
ដូចគ្នាដែរ លោក ពេជ្រ វុទ្ធី កម្មកររោងចក្រនៅរោងចក្រ តាក់សាន់ខេមបូឌាឡោនទ្រី ក្នុងសង្កាត់ចាក់អង្រែលើ បានសម្តែងការសាទរ ក្រោយឮដំណឹងថា រដ្ឋាភិបាលបានដំឡើងប្រាក់ឈ្នួលអប្បបរិមា ១៧០ ដុល្លារនៅឆ្នាំ២០១៨ ។ លោករំពឹងថា ប្រាក់ឈ្នួលនេះ នឹងជួយកាត់បន្ថយការចំណាយរបស់លោកបានមួយចំណែកដែរ។ សម្រាប់លោក ពេជ្រ វុទ្ធី ប្រាក់ឈ្នួលនេះ នៅតែមានចំនួនតិចតួចនៅឡើយ ខណៈទំនិញនៅលើទីផ្សារស្ទើរគ្រប់មុខ រួមទាំង ផ្ទះជួលផង មានតម្លៃថ្លៃជាងមុន។
ក្នុងវ័យ ២៨ ឆ្នាំ កម្លោះ ពេជ្រ វុទ្ធី ដែលមានស្រុកកំណើតនៅខេត្តតាកែវ បានបញ្ជាក់យ៉ាងដូច្នេះថា៖«សម្រាប់កម្មករ ១៧០ ដុល្លារ វានៅតែតិចណាស់ ព្រោះយើងត្រូវចំណាយច្រើន ហើយទំនិញលើទីផ្សារថ្លៃខ្លាំងណាស់»។
ជុំវិញបញ្ហានេះ លោក ប៉ាវ ស៊ីណា ប្រធានសហភាពចលនាកម្មករកម្ពុជា បានអះអាងថា ទោះបីមានការដំឡើងប្រាក់ខែអប្បបរមា ១៧០ ដុល្លារពិតមែន ប៉ុន្តែមានម្ចាស់ផ្ទះជួលមួយចំនួន នៅតែដំឡើងថ្លៃផ្ទះ និងថ្លៃទឹក ដែលកត្តានេះ បានធ្វើឲ្យប៉ះពាល់ដល់ការចំណាយជាប្រចាំរបស់កម្មករ-កម្មការិនី។ លោកសន្យាថា នឹងយកសំណើកម្មករ-កម្មការិនី ជុំវិញបញ្ហានេះ ជូនសាលារាជធានីភ្នំពេញ ដើម្បីជួយអន្តរាគមន៍ ឲ្យមានការកោះហៅម្ចាស់ផ្ទះជួលមកប្រជុំលើការដំឡើងថ្លៃផ្ទះជួលនេះ។
យ៉ាងណាក្តី លោក ប៉ាវ ស៊ីណាត ដែលទើបប្រជុំក្រុមសហជីពដែលតំណាងឲ្យកម្មករប្រមាណជាង ៣ ម៉ឺននាក់ បានអរគុណរដ្ឋាភិបាល និងអបអរសាទរដល់កម្មករ-កម្មការិនី ចំពោះការដំឡើងប្រាក់ឈ្នួលអប្បបរមា ១៧០ ដុល្លារ នៅឆ្នាំ២០១៨ ។ បើតាមលោក ប៉ាវ ស៊ីណា ប្រាក់ឈ្នួលអប្បបរមា ១៧០ ដុល្លារ គឺជាប្រាក់ឈ្នួលដ៏សមរម្យបើប្រៀបធៀបនឹងបណ្តាប្រទេសមួយចំនួន។
លោកបញ្ជាក់យ៉ាងដូច្នេះថា៖ «១៧០ ដុល្លារនេះ គឺជាប្រាក់ឈ្នួលខ្ពស់ជាងប្រទេសមីយ៉ាន់ម៉ា ប៉ាគីស្ថាន ឡាវ បង់ក្លាដែស ទោះបីទាបជាងប្រទេសថៃ(ប្រាក់ឈ្នួលអប្បបរិមាណថៃ២៨០ដុល្លារ)ហើយវាស្មើឬប្រហាក់ប្រហែលនឹងប្រទេសវៀតណាម និងម៉ាឡេស៊ី ក្តី។ យើងមិនអាចដំឡើងខ្ពស់ជាងនេះនោះទេ ព្រោះវានឹងប៉ះពាល់ដល់អ្នកវិនិយោគ»។
សូមបញ្ជាក់ថា សម្តេចនាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលកម្ពុជា កាលពីខែសីហាកន្លងទៅ បានអំពាវនាវដល់ម្ចាស់ផ្ទះជួល កុំឲ្យដំឡើងថ្លៃផ្ទះ ប្រដេញតាមការដំឡើងប្រាក់ខែកម្មករ ព្រមទាំងបង្គាប់ឲ្យតទឹកនិងភ្លើងរដ្ឋចូលដល់បន្ទប់កម្មករផ្ទាល់តែម្តង ដើម្បីឲ្យកម្មករចំណាយកាន់តែតិចលើសេវាទាំងអស់នេះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់សារព័ត៌មានថ្មីៗថា អាជ្ញាធររាជធានីភ្នំពេញ បានចាត់វិធានការជាបន្តបន្ទាប់ ដើម្បីណែនាំម្ចាស់ផ្ទះជួលកុំឲ្យដំឡើងថ្លៃ និងត្រូវតទឹកភ្លើងរដ្ឋចូលដល់បន្ទប់ជួលកម្មករផ្ទាល់តែម្តង។ លោកបញ្ជាក់យ៉ាងដូច្នេះថា៖«បើម្ចាស់ផ្ទះជួលនៅតែដំឡើងថ្លៃផ្ទះ និង មិនព្រមតទឹកភ្លើងរដ្ឋចូលដល់បន្ទប់ជួល ដើម្បីឆ្លៀតកេងចំណេញលើទឹកភ្លើងទៀត សូមបងប្អូនផ្តល់ដំណឹងដល់អាជ្ញាធរ យើងនឹងហៅម្ចាស់ផ្ទះមកសួរនាំ ហើយបើមិនគោរពតាម យើងនឹងមានវិធានការក្តៅ»៕
Tag:
ប៉ាវ ស៊ីណា
ប្រាក់ឈ្នួល
© រក្សាសិទ្ធិដោយ thmeythmey.com