កីឡាជាតិ
ជាតិ
AFC Asian Cup៖ កម្ពុជាចាញ់វៀតណាម ២-១ នៅភ្នំពេញ ចុះជំនួបនៅហាណូយល្ងាចនេះ? លោក Leonardo កំពុងដឹកនាំក្រុមជម្រើសជាតិកម្ពូជាហ្វឹកហាត់នៅប្រទេសវៀតណាម
× ក្រុមកីឡាបាល់ទាត់ជម្រើសជាតិកម្ពុជាជួបប្រកួតជើងទី២ជាមួយវៀតណាមក្នុងវគ្គជម្រុះពូល C នៃពានរង្វាន់ AFC Asian Cup UAE 2019 នាវេលាម៉ោង៧យប់ថ្ងៃទី១០ តុលា នៅកីឡដ្ឋាន My Dinh Stadium ទីក្រុងហាណូយ ប្រទេសវៀតណាម។ ជំនួបនេះធ្វើឡើងក្រោយអាហ្វហ្គានីស្ថានប្រើកីឡដ្ឋាន Republican Central Stadium របស់តាហ្ស៊ីគីស្ថានស្វាគមន៍ហ្ស៊កដានី។
គ្រូបង្វឹកជនជាតិប្រេស៊ីលលោក Leonardo Vitorino ដឹកនាំក្រុមជម្រើសជាតិកម្ពុជាតទល់ជាមួយវៀតណាមដើម្បីប្រជែងឈរលេខរៀងទី២ក្នុងពូល C នៃព្រឹត្តិការណ៍ AFC Asian Cup UAE 2019 នៅម៉ោង៧យប់ថ្ងៃទី១០ តុលា នេះនៅកីឡដ្ឋាន My Dinh Stadium ក្នុងទីក្រុងហាណូយ ប្រទេសវៀតណាម។
កម្ពុជាត្រូវការឈ្នះវៀតណាមជាចាំបាច់ ដើម្បីបង្កើនឱកាសឡើងទៅវគ្គបន្ត និងដើម្បីសងសឹកដែលខ្លួនបានចាញ់ ២-១ ក្នុងជើងទី១នៅពហុកីឡដ្ឋានជាតិកាលពីថ្ងៃទី៥ កញ្ញា កន្លងទៅ។ បច្ចុប្បន្នកម្ពុជាកំពុងឈរលេខរៀងទី៣ដោយមាន៣ពិន្ទុពីការឈ្នះអាហ្វហ្គានីស្ថាន ១-០ ខណៈវៀតណាមឈរលេខរៀងទី២ដោយមាន៥ពិន្ទុក្រោយយកឈ្នះកម្ពុជា ២-១ ស្មើ ១-១ ជាមួយអាហ្វហ្គានីស្ថាន និងស្មើ ០-០ ជាមួយហ្ស៊កដានី។
តាមប្រវត្តិជួបគ្នាតាំងពីឆ្នាំ១៩៩៥ ដល់ឆ្នាំ២០១៦ កម្ពុជាមិនដែលយកឈ្នះវៀតណាមនោះទេ។ សម្រាប់ការប្រកួតកីឡាស៊ីហ្គេមឆ្នាំ១៩៩៥ នៅខេត្តឈៀងម៉ៃប្រទេសថៃ កម្ពុជាប្រកួតចាញ់វៀតណាមក្នុងលទ្ធផល ៣-០ មុនចាញ់ ៣-១ ក្នុងព្រឹត្តិការណ៍ AFF Championship ឆ្នាំ១៩៩៦។ នៅក្នុងព្រឹត្តិការណ៍ AFF Championship ឆ្នាំ២០០០, ២០០២ និងឆ្នាំ២០១៦ កម្ពុជាបានចាញ់វៀតណាម ៦-០, ៩-២ និង ២-១ ជាបន្តបន្ទាប់។
នៅពូល C ដដែលមុនជំនួបរវាងកម្ពុជានឹងវៀតណាម ក្រុមឈរបាតតារាងអាហ្វហ្គានីស្ថានខ្ចីកីឡដ្ឋាន Republican Central Stadium របស់ប្រទេសតាហ្ស៊ីគីស្ថានស្វាគមន៍ក្រុមឈរកំពូលតារាងហ្ស៊កដានីនៅម៉ោង៥រសៀល(ម៉ោងនៅកម្ពុជា)ក្នុងទីក្រុងឌូស្ហាន់បេ។ គួរបញ្ជាក់ថា កាលពីជើងទី១ក្រុមអាហ្វហ្គានីស្ថានបានចាញ់ក្រុមហ្ស៊កដានីក្នុងលទ្ធផល ៤-១៕
Tag:
AFC Asian Cup 2019
បាល់ទាត់
© រក្សាសិទ្ធិដោយ thmeythmey.com