ជាតិ
គណៈមេធាវី ដាក់ប្រតិភូ នៅទូទាំងប្រទេស ដើម្បីជួយផ្នែកច្បាប់ ដល់ជនក្រីក្រ ដោយមិនយកប្រាក់
× ភ្នំពេញ៖ គណៈមេធាវីកម្ពុជា បានបង្កើតគោលនយោបាយថ្មី ដោយដាក់ប្រតិភូរបស់ខ្លួន តាមរាជធានី-ខេត្ត នៅទូទាំងប្រទេស ដើម្បីផ្តល់ជំនួយផ្នែកច្បាប់ ដល់ប្រជាពលរដ្ឋក្រីក្រ ដោយមិនយកថវិកា។ លោក សួន វិសាល ប្រធានគណៈមេធាវី បានប្រកាសយ៉ាងដូច្នេះ ក្នុងមហាសន្និបាតលើកទី២២ របស់គណៈមេធាវី ដែលរៀបចំឡើង នៅថ្ងៃទី១៦ ខែតុលា ឆ្នាំ២០១៧។
លោក ព្រហ្ម វិចិត្រអក្ខរា អគ្គលេខាធិការគណៈមេធាវី ប្រាប់សារព័ត៌មានថ្មីៗថា ការបង្កើតគោលនយោបាយថ្មីនេះ គឺដើម្បីជួយសម្រួលប្រជាពលរដ្ឋក្រីក្រ ឲ្យបានកាន់តែច្រើន ក្នុងការស្វែងរកមេធាវី ពេលមានក្តីក្កាំនៅតុលាការ។ លោក និយាយដូច្នេះថា៖«ពីមុន ប្រជាពលរដ្ឋ ត្រូវឡើងមកគណៈមេធាវី នៅភ្នំពេញ ដើម្បីសុំជំនួយផ្នែកច្បាប់ឬសុំមេធាវី ការពារក្តី។ តែឥឡូវ ពួកគាត់ អាចរកមេធាវី នៅតាមខេត្តរបស់គាត់តែម្តង មិនចាំបាច់ឡើងមកភ្នំពេញទេ»។
លោក ព្រហ្ម វិចិត្រអក្ខរា បន្តថា ជាទូទៅ ការិយាល័យរបស់ក្រុមមេធាវី (ប្រតិភូ) ដែលរង់ចាំជួយប្រជាពលរដ្ឋក្រីក្រ គឺនៅស្ថិតក្នុងបរិវេណតុលាការ តាមរាជធានី-ខេត្ត នីមួយៗ តែម្តង។ លោក បន្ថែមថា លុះត្រាតែតុលាការ មិនមានកន្លែងគ្រប់គ្រាន់ ទើបគណៈមេធាវី រៀបចំការិយាល័យសម្រាប់ក្រុមមេធាវី នៅតាំងផ្សេងវិញ។
សូមបញ្ជាក់ថា សម្រាប់ឆ្នាំ២0១៨ រដ្ឋាភិបាល ផ្តល់ថវិកាចំនួន ៩រយលានរៀល ដល់គណៈមេធាវី ដើម្បីចាយវាយលើការការពារក្តីឲ្យប្រជាពលរដ្ឋក្រីក្រ។ សំណុំរឿងរបស់ប្រជាពលរដ្ឋក្រីក្រ ដែលទៅពឹងពាក់នៅគណៈមេធាវីកន្លងមក មានរហូតដល់ទៅជាង ២ពាន់ករណី៕
Tag:
គណៈមេធាវី
ជនក្រីក្រ
© រក្សាសិទ្ធិដោយ thmeythmey.com