ជាតិ
នយោបាយជាតិ
បក្សហ្វ៊ុនស៊ិនប៉ិច សុំកុំឲ្យបន្ទោសខ្លួន បើបក្សសង្គ្រោះជាតិ ត្រូវរំលាយ
× ភ្នំពេញ៖ គណបក្សសង្គ្រោះជាតិ ត្រូវបានរំលាយឬមិនរំលាយ គឺជាដែនសមត្ថកិច្ចរបស់តុលាការកំពូល និងក្រសួងមហាផ្ទៃ ដោយមិនពាក់ព័ន្ធនឹងគណបក្សហ្វ៊ុនស៊ិនប៉ិចឡើយ។ មន្ត្រីជាន់ខ្ពស់គណបក្សហ្វ៊ុនស៊ិនប៉ិច ចេញមកការពារបែបនេះ ស្របពេលមានការរិះគន់ថា ចង់ឲ្យមានការរំលាយគណបក្សសង្គ្រោះជាតិ ដើម្បីបានអាសនៈ។
គណបក្សហ្វ៊ុនស៊ិនប៉ិច នឹងមិនទទួលយកឡើយ ចំពោះការទម្លាក់កំហុសលើខ្លួន ប្រសិនបើគណបក្សសង្គ្រោះជាតិ ត្រូវបានរំលាយ នាពេលខាងមុខ។ គណបក្សរាជានិយម ដែលធ្លាប់ដឹកនាំរដ្ឋាភិបាលមួយនេះ ប្រកាសថា គណបក្សសង្គ្រោះជាតិ ត្រូវបានរំលាយឬយ៉ាងណានោះ គឺត្រូវសម្រេចដោយច្បាប់ ហើយស្ថាប័នដែលមានដែនសមត្ថកិច្ច ក្នុងចំណាត់ការនេះ គឺក្រសួងមហាផ្ទៃនិងតុលាការកំពូល។
«គណបក្សហ្វ៊ុនស៊ិនប៉ិច ទៅជាជនរងគ្រោះវិញ។ ពេលគេរំលាយគាត់ [គណបក្សសង្គ្រោះជាតិ] គាត់នាំគ្នា មកជេរគណបក្សហ្វ៊ុនស៊ិនប៉ិច។ គាត់នាំគា្នថា មកពីគណបក្សហ្វ៊ុនស៊ិនប៉ិច។ វា អត់យុត្តិធម៌»។ លោក ញ៉េប ប៊ុនជិន អនុប្រធានគណបក្សហ្វ៊ុនស៊ិនប៉ិចនិងមានតួនាទីជាអ្នកនាំពាក្យផងនោះ បានលើកឡើងយ៉ាងដូច្នេះ ក្នុងសន្និសីទកាសែតមួយស្តីពីស្ថានការណ៍នយោបាយបច្ចុប្បន្ន ដែលរៀបចំឡើងនៅទីស្នាក់ការកណ្តាលរបស់ខ្លួន នាថ្ងៃទី២៧ ខែតុលា ឆ្នាំ២0១៧នេះ។
រូបភាព៖ លោក ញ៉េប ប៊ុនជិន អ្នកនាំពាក្យនិងជាអនុប្រធានគណបក្សហ្វ៊ុនស៊ិនប៉ិច (នៅកណ្តាល) ថ្លែងក្នុងសន្និសីទកាសែតស្តីពីស្ថានការណ៍នយោបាយនៅកម្ពុជា ដែលធ្វើឡើងនៅថ្ងៃទី២៧ ខែតុលា ឆ្នាំ២0១៧
លោក ញ៉េប ប៊ុនជិន អះអាងថា គណបក្សហ្វ៊ុនស៊ិនប៉ិច មិនប្រាថ្នាឲ្យគណបក្សសង្គ្រោះជាតិ រលាយ ហើយរំពៃមើលអាសនៈក្នុងរដ្ឋសភាឬអាសនៈក្រុមប្រឹក្សាឃុំ-សង្កាត់របស់គណបក្សនេះឡើយ។ ប៉ុន្តែ លោក បញ្ជាក់ថា ប្រសិនបើតុលាការកំពូល រំលាយចោលមែន ហើយរាល់អាសនៈនិងភាពជាតំណាងរបស់គណបក្សសង្គ្រោះជាតិ ត្រូវបែងចែកទៅឲ្យគណបក្សហ្វ៊ុនស៊ិនប៉ិច នោះគណបក្សហ្វ៊ុនស៊ិនប៉ិច ក៏មិនប្រកែកដែរ។ លោក យល់ថា ការទទួលយកអាសនៈទាំងនោះ គឺស្របនឹងច្បាប់ ដោយមិនមានកំហុសអ្វីឡើយ។
ថ្លែងក្នុងសន្និសីទនោះ អនុប្រធានគណបក្សហ្វ៊ុនស៊ិនប៉ិច ឆ្លៀតបន្ទោសគណបក្សសង្គ្រោះជាតិ ថាជាអ្នកសាងកំហុសដោយខ្លួនឯង។ លោក និយាយបែបនេះថា៖«កំហុសរបស់គាត់ផ្ទាល់ បើគណបក្សសង្គោះជាតិត្រូវបានរំលាយ។ គណបក្សហ្វ៊ុនស៊ិនប៉ិច អត់ដែលច្រណែន ស្អប់ ខឹងគាត់ទាល់តែសោះ»។
ថ្មីៗនេះ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច បានចេញមកគាំទ្រចំណាត់ការរបស់រដ្ឋាភិបាល រួមទាំងតុលាការកំពូល ដែលចាត់ការលើឯកឧត្តម កឹម សុខា និងគណបក្សសង្គ្រោះជាតិ។ អ្នកនយោបាយចាស់វស្សា និងជាអតីតនាយករដ្ឋមន្ត្រីទីមួយរបស់កម្ពុជារូបនេះ បានបង្ហាញបំណងចង់ឲ្យតុលាការកំពូល ចាត់ការលើគណបក្សសង្គ្រោះជាតិ ឲ្យបានឆាប់រហ័ស។
សារព័ត៌មានថ្មីៗ មិនអាចសុំការឆ្លើយតបពីអ្នកនាំពាក្យគណបក្សសង្គ្រោះជាតិបានឡើយដោយសារមិនលើកទូរសព្ទ។ ប៉ុន្តែ កន្លងមក មន្ត្រីជាន់ខ្ពស់គណបក្សសង្គ្រោះជាតិមួយចំនួន បានប្រតិកម្មនឹងសម្តេចក្រុមព្រះ និងគណហ្វ៊ុនស៊ិនប៉ិច។ លើសពីនេះ សម្តេចក្រុមព្រះ និងគណហ្វ៊ុនស៊ិនប៉ិច ក៏រងការរិះគន់ពីសំណាក់ប្រជាពលរដ្ឋ ដែលគាំទ្រគណបក្សសង្គ្រោះជាតិផងដែរ។
គណបក្សហ្វ៊ុនស៊ិនប៉ិចរបស់សម្តេចក្រុមព្រះ និងគណបក្សយុវជនកម្ពុជារបស់លោក ពេជ្រ ស្រស់ ជាភាគីដំបូង ដែលនាំគ្នាយកសំណើទៅដាក់នៅក្រសួងមហាផ្ទៃ ដើម្បីសុំឲ្យប្តឹងរំលាយគណបក្សសង្គ្រោះជាតិ។ គណបក្សទាំងពីរនេះ យល់ថា ឯកឧត្តម កឹម សុខា ជាប់ពាក់ព័ន្ធនឹងអំពើក្បត់ជាតិ ហើយអាចរួមទាំងគណបក្សសង្គ្រោះជាតិផងដែរ។ បច្ចុប្បន្ន តុលាការកំពូល កំពុងតែចាត់ការលើបណ្តឹងសុំឲ្យរំលាយគណបក្សសង្គ្រោះជាតិ។
ប្រសិនបើគណបក្សសង្គ្រោះជាតិ ត្រូវបានរំលាយមែននោះ រាល់អាសនៈទាំង៥៥ ក្នុងរដ្ឋសភានិងអាសនៈជាសមាជិក្រុមប្រឹក្សាឃុំ-សង្កាត់ប្រមាណ៥ពាន់ រួមទាំងអាសនៈជាសមាជិកប្រឹក្សារាជធានី ខេត្ត ក្រុង ស្រុក ខណ្ឌ របស់គណបក្សសង្គ្រោះជាតិ នឹងត្រូវបែងចែកទៅឲ្យគណបក្សដទៃ។ ហើយគណបក្សហ្វ៊ុនស៊ិនប៉ិច អាចនឹងទទួលបានអាសនៈទាំងនោះខ្លះ។
ច្បាប់ចំនួន៤ ដែលទើបនឹងកែប្រែដោយតំណាងរាស្ត្រគណបក្សប្រជាជនកម្ពុជា បានអនុញ្ញាតឲ្យមានការបែងចែកអាសនៈរបស់គណបក្សណាមួយ ដែលត្រូវបានរំលាយ។ ច្បាប់ទាំង៤ រួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ។
បណ្តឹងសុំឲ្យរំលាយគណបក្សសង្គ្រោះជាតិ និងការកែប្រែច្បាប់ទាំង៤ ព្រមទាំងការចាប់ឯកឧត្តម កឹម សុខា បណ្តាលឲ្យរដ្ឋាភិបាលកម្ពុជា រងការថ្កោលទោសជាបន្តបន្ទាប់ពីសំណាក់សហគមន៍អន្តរជាតិ។ ប៉ុន្តែរដ្ឋាភិបាល នៅតែប្រកាន់ជំហរថា ចំណាត់ការខាងលើ គឺស្ថិតក្នុងដែនអធិបតេយ្យរបស់កម្ពុជា ដោយមិនអាចអនុញ្ញាតឲ្យបរទេសណាមួយ លូកដៃចូលបានឡើយ៕
Tag:
Funcinpec
CNRP
ញ៉េប ប៊ុនជិន
© រក្សាសិទ្ធិដោយ thmeythmey.com