បទយកការណ៍ / បទសម្ភាសន៍
រដូវអាពាហ៌ពិពាហ៌៖ ធៀបការ ក្លាយជាគំនាបហិរញ្ញវត្ថុ
×
រដូវរៀបអាពាហ៍ពិពាហ៍បានចូលមកដល់ មនុស្សម្នា ក៏ចាប់ផ្តើមសួរគ្នា ពីចំនួនលិខិតអញ្ជើញឲ្យចូលរួមពិធីការដែលពួកគេបានទទួល។ ពិតណាស់ថា ការអញ្ជើញចូលរួមពិធីអាពាហ៍ពិពាហ៍ ជាប្រពៃណីទំនៀមទម្លាប់មួយរបស់ខ្មែរ ប៉ុន្តែចំនួនធៀបការទាំងនោះ ក្លាយជាសម្ពាធហិរញ្ញវត្ថុ សម្រាប់អ្នកដែលទទួលបានលិខិតអញ្ជើញទាំងនោះ ដោយត្រូវចំណាយប្រាក់កាន់តែច្រើន ដើម្បីចូលរួមពិធី។ ភ្ញៀវស្រីៗទៀតសោត ក៏ត្រូវចំណាយច្រើនជាងបុរសដែរ ដែលមិនត្រឹមតែចំណងដៃទៀត ប៉ុន្តែចំណាយសម្លៀកបំពាក់ ការតែងលំអកាយ និងរួមទាំងការចងដៃ បូកបញ្ចូលគ្នា ធ្វើឲ្យស្ត្រីកាន់តែរអានឹងការអញ្ជើញចូលរួមក្នុងពិធីមង្គលការ។
នៅក្នុងរដូវរៀបអាពាហ៍ពិពាហ៍ម្ដងៗ ពលរដ្ឋភាគច្រើនប្រាកដជាទទួលបាននូវសំបុត្រការពីសំណាក់ ញាតិមិត្តរបស់ខ្លួនជាក់ជាមិនខាន។ នៅពេលខ្លះមនុស្សម្នាក់អាចទទួលសំបុត្រការចាប់ពី៣ ទៅ៥ សំបុត្រក្នុងមួយខែ។ ការទទួលសំបុត្រការច្រើនបែបនេះ គេក៏ប្រឈមទៅនឹងការរកប្រាក់ជាច្រើន ដើម្បីទៅចូលរួមក្នុងពិធីមង្គលការនោះ ដែលហាក់ដូចជាគំនាបផ្លូវចិត្ត និងសេដ្ឋកិច្ចមួយទៅវិញ។
កញ្ញា ឌី លីតា បុគ្គលិកក្រុមហ៊ុនឯកជនមួយនៅភ្នំពេញ បានប្រាប់សារព័ត៌មានថ្មីៗថា ធៀបការដែលនាងទទួលបាន គឺសុទ្ធតែជាសាច់ញាតិដែលមិនអាចខកខានបាន។ មែនទែនទៅ បើគ្រាន់តែចំណាយលើចំណងដៃ ប្រហែល លីតា មិនរអ៊ូ ខ្លាំងនោះទេ ប៉ុន្តែ លីតា ត្រូវចំណាយយ៉ាងច្រើនលើសម្លៀកបំពាក់ កាបូប ស្បែកជើង និងការតុបតែងលំអប្រាណ ដើម្បីចូលរួមពិធីមង្គលរបស់មិត្តភក្តិ និងសាច់ញាតិ។ ហេតុដូច្នេះហើយ ពេលខ្លះ កញ្ញា ឌី លីតា ប្រឈមនឹងបញ្ហាហិរញ្ញវត្ថុ ដែលពេលខ្លួនត្រូវបង្ខំចិត្តខ្ចីប្រាក់មិត្តភក្តិទៀតផង ដើម្បីចងដៃ។ កញ្ញា ឌី លីតា បញ្ជាក់បន្ថែមដូច្នេះថា៖ «និយាយពីរឿងទៅការគេ ខែខ្លះ ខ្ញុំចូលដល់៤ ៥ រោង។ ចំណាយច្រើនណាស់ មួយរោងៗ លើរ៉ូប ផាត់មុខ ធ្វើសក់ ហើយនៅថ្លៃចំណងដៃទៀត។ ពេលខ្លះដោះស្រាយមិនទាន់ មានតែខ្ចីគេយកទៅចងដៃសិន។ ពេលខ្លះការមិត្តភ័ក្តជិតស្និទ្ធ ក៏ជំពាក់ចំណងដៃគេសិន ហើយសម្រាប់មិត្តភក្តិជិតស្និទ្ធ ពេលខ្លះក៏មិនចងដៃតែម្តង»។
ធៀបការចូលផ្ទះច្រើន ក៏កំពុងធ្វើឲ្យ អ្នកនាង ហេង បូរី ពិបាកចិត្តដែរ។ ពិបាកចិត្ត ក៏ព្រោះតែត្រូវចំណាយច្រើន និងមិនអាចខកខានបាន។ ស្ត្រីវ័យ ២៥ឆ្នាំ រូបនេះ ថានាងត្រូវចំណាយប្រមាណ៦០ដុល្លារ លើធៀបការមួយ។ ស្ត្រីរូបនេះ ក៏បង្ហើបដែរថា នាងធ្លាប់ ខ្ចីលុយគេបង្គ្រប់ថ្លៃចងដៃ ដោយសារចំណាយច្រើនពេក ហើយពេលខ្លះ ក៏ផ្ញើតែប្រាក់ចំណងដៃប៉ុណ្ណោះ ដើម្បីកាត់បន្ថយចំណាយដទៃទៀត។ អ្នកនាង ហេង បូរី រអ៊ូរទាំទៀតថា៖«ខ្ញុំចងដៃគេ ពី២០ ទៅ៣០ដុល្លារ ផាត់មុខធ្វើសក់ទៀត១០ដុល្លារ ហើយបើចំណាយទៅលើការទិញរ៉ូបថ្មីទៀតនោះ យ៉ាងហោច ក៏ត្រូវចំណាយ៥០ដុល្លារថែមទៀតដែរ។ ព្រោះមនុស្សស្រីមិនសូវស្លៀករ៉ូបដដែលៗ ទៅការគេនោះទេ»។
ទោះជាបុរសៗ មិនសូវចំណាយច្រើនលើការតុបតែងខ្លួនក៏ដោយ ប៉ុន្តែការទទួលបានធៀបការច្រើន ក្នុងមួយខែៗ ក៏ធ្វើឲ្យពួកគេមិនសប្បាយចិត្តដែរ។ បុរស វ័យ៣៨ឆ្នាំថា នៅពេលដែលធៀបការចូលច្រើននៅក្នុងខែតែមួយ អ្វីដែលលោកអាចធ្វើបាន គឺខ្ចីប្រាក់ពីកន្លែងធ្វើការមុន ដើម្បីមានប្រាក់គ្រប់គ្រាន់សម្រាប់ចាយវាយ និងចងដៃ។ ពេលខ្លះ ចំណាយអាចកើនឡើងទ្វេដង បើសិនជាមង្គលការនោះត្រូវចូលរួមជាលក្ខណៈគ្រួសារ ហើយពេលខ្លួនលោក វី គ្រាន់តែផ្ញើប្រាក់ចំណងដៃទៅតែប៉ុណ្ណោះ សម្រាប់អ្នកមិនសូវស្និទ្ធ ព្រោះវិធីនេះចំណាយតិចជាង។
សម្រាប់លោក ប៊ី វី ទោះជាមង្គលការ ជារឿងម្នាក់ម្តង ប៉ុន្តែលោក ត្រូវប្រឈមនឹងការវិបត្តិហិរញ្ញវត្ថុ ដោយសារតែការរក្សាមិត្តភាព និងទំនាក់ទំនងក្នុងសង្គម។
នេះគឺជាបញ្ហាសង្គមមួយ ដែលត្រូវចូលរួមដោះស្រាយទាំងអស់គ្នា ហើយត្រូវចាប់ផ្តើមពីម្ចាស់ដើមការ ដែលគួរតែគិតគូរមុននឹងអញ្ជើញភ្ញៀវឲ្យចូលរួមពិធីមង្គលការកូន ឬមង្គលការខ្លួន។ ភ្ញៀវដែលត្រូវអញ្ជើញ គួរតែអ្នកដែលជិតស្និទ្ធ ដើម្បីឲ្យស័ក្តិសមនឹងតម្លៃនៃការរាប់អានគ្នា និងកុំឲ្យអ្នកដែលត្រូវបានអញ្ជើញឲ្យចូលរួមពិធីមង្គលការ យល់ថា មានគំរាបហិរញ្ញវត្ថុ៕
Tag:
ធៀបការ
មិត្តភាព
ហិរញ្ញវត្ថុ
© រក្សាសិទ្ធិដោយ thmeythmey.com