ជាតិ
នយោបាយជាតិ
លោក ប៉ុល ហំម ឈប់ធ្វើនយោបាយ បើគណបក្សសង្គ្រោះជាតិត្រូវរំលាយ រូបភាព៖ លោក ប៉ុល ហំម អនុប្រធានគណបក្សសង្គ្រោះជាតិ
× ភ្នំពេញ៖ គ្មានគណបក្សសង្គ្រោះជាតិ ក៏គ្មានលោក ប៉ុល ហំម លើឆាកនយោបាយដែរ។ នេះជាសាររបស់លោក ប៉ុល ហំម ដែលលើកឡើង ស្របពេលគណបក្សសង្គ្រោះជាតិ ប្រឈមនឹងការរំលាយចោល នៅពាក់កណ្តាលខែវិច្ឆិកានេះ។
គ្មានវត្តមានលោក ប៉ុល ហំម លើឆាកនយោបាយកម្ពុជាទៀតឡើយ ប្រសិនបើតុលាការកំពូល ពិតជារំលាយគណបក្សសង្គ្រោះជាតិ។ លោក ប៉ុល ហំម ដែលមានតំណែងជាអនុប្រធានគណបក្សសង្គ្រោះជាតិ និងជាមនុស្សម្នាក់ជិតស្និទ្ធ ហើយបានដើរតាមឯកឧត្តម កឹម សុខា អស់ជាច្រើនឆ្នាំក្នុងការធ្វើនយោបាយ បាននិយាយដោយមិនស្ទាក់ស្ទើរយ៉ាងដូច្នេះថា៖«នៅធ្វើអីទៀត បើគណបក្សរលាយហើយហ្នឹង»។
ការលាឈប់ពីនយោបាយរបស់លោក ប៉ុល ហំម ទំនងជាការលាឈប់ជារៀងរហូត។ ៥ឆ្នាំក្រោយ តើលោក អាចនឹងវិលមកធ្វើនយោបាយសាជាថ្មីទេ? លោក ប៉ុល ហំម អ្នកនយោបាយ វ័យ៧២ឆ្នាំហើយនោះ បានឆ្លើយបែបនេះថា៖«ប្រហែលជាមិនមកវិញទេ។ ដូចជាចាស់ណាស់ដែរហើយ ហើយសុខភាពក៏មិនសូវល្អទៀត»។
ការប្រកាសរបស់លោក ប៉ុល ហំម ខាងលើ ធ្វើឡើងក្រោយពីសម្តេច ហ៊ុន សែន ប្រធានគណបក្សប្រជាជនកម្ពុជា ដែលកំពុងដឹកនាំរដ្ឋាភិបាល បានអះអាងពីការបិទសិទ្ធិមិនឲ្យមន្ត្រីជាន់ខ្ពស់ជាង១00នាក់ ក្នុងគណៈកម្មាធិការនាយកនៃគណបក្សសង្គ្រោះជាតិ ធ្វើនយោបាយរយៈពេល៥ឆ្នាំ ក្នុងករណីគណបក្សប្រឆាំងដ៏ធំមួយនេះ ត្រូវបានតុលាការកំពូល រំលាយចោល នៅថ្ងៃទី១៦ ខែវិច្ឆិកា ឆ្នាំ២0១៧។ សម្តេច ហ៊ុន សែន ក៏កំពុងអំពាវនាវឲ្យសមាជិកគណបក្សសង្គ្រោះជាតិចូលរួមជីវភាពនយោបាយជាមួយគណបក្សប្រជាជនកម្ពុជា។
សូមបញ្ជាក់ថា ក្រសួងមហាផ្ទៃ ដែលដើរតួជាដើមបណ្តឹង មិនត្រឹមតែសុំឲ្យតុលាការកំពូលរំលាយគណបក្សសង្គ្រោះជាតិនោះទេ ប៉ុន្តែថែមទាំងសុំឲ្យផ្អាកថ្នាក់ដឹកនាំនៃគណបក្សនេះ ក្នុងការធ្វើនយោបាយរយៈពេល៥ឆ្នាំទៀតផង។ ក្រសួងមហាផ្ទៃ អះអាងថា គណបក្សសង្គ្រោះជាតិ អាចនឹងជាប់ពាក់ព័ន្ធនឹងអំពើក្បត់ជាតិ ដូចឯកឧត្តម កឹម សុខា ដែរ ទើបក្រសួងប្តឹងទៅតុលាការកំពូល ដើម្បីសុំឲ្យរំលាយចោលបែបនេះ៕
© រក្សាសិទ្ធិដោយ thmeythmey.com