គ្រូបង្វឹកកម្ពុជាប្តេជ្ញាលេងអស់ពីសមត្ថភាពតែគ្រូមីយ៉ាន់ម៉ាថាមកកម្ពុជាដើម្បីឈ្នះ

កីឡាជាតិ

ជាតិ

គ្រូបង្វឹកកម្ពុជាប្តេជ្ញាលេងអស់ពីសមត្ថភាពតែគ្រូមីយ៉ាន់ម៉ាថាមកកម្ពុជាដើម្បីឈ្នះ

08, Nov 2017 , 6:08 pm

រូបភាព

លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជា(ឆ្វេង) និងលោក Gerd Zeise គ្រូបង្វឹកមីយ៉ាន់ម៉ាពេលចូលរួមសន្និសីទមុនការប្រកួតនៅវិមានពហុកីឡដ្ឋានជាតិ

ដោយ:

គ្រូបង្វឹកក្រុមជម្រើសជាតិកម្ពុជាលោក ប្រាក់ សុវណ្ណារ៉ា ប្តេជ្ញាប្រឹងប្រែងលេងអស់ពីសមត្ថភាពសម្រាប់ការប្រកួតមិត្តភាពអន្តរជាតិជាមួយមីយ៉ាន់ម៉ានាល្ងាចថ្ងៃទី៩ វិច្ឆិកា នៅពហុកីឡដ្ឋានជាតិ ខណៈគ្រូបង្វឹកមីយ៉ាន់ម៉ាលោក Gerd Zeise អះអាងយ៉ាងខ្លីថា លោកមកកម្ពុជាគឺដើម្បីឈ្នះ។ គ្រូបង្វឹកទាំងពីររំពឹងការប្រកួតមិត្តភាពដើម្បីត្រៀមការប្រកួតផ្លូវការនេះ នឹងក្លាយជាជំនួបដ៏តានតឹង និងជក់ចិត្តសម្រាប់ទស្សនិកជន។

នាសន្និសីទសារព័ត៌មាននៅព្រឹកថ្ងៃទី៨ វិច្ឆិកា លោក ប្រាក់ សុវណ្ណារ៉ា គ្រូបង្វឹកក្រុមជម្រើសជាតិកម្ពុជាទន្ទឹមនឹងការអះអាងពីការត្រៀមខ្លួនរួចរាល់សម្រាប់ជំនួបមិត្តភាពអន្តរជាតិជាមួយមីយ៉ាន់ម៉ា លោក ប្តេជ្ញាធ្វើឲ្យជំនួបនេះក្លាយជាការប្រកួតដ៏តានតឹង និងទាក់ទាញបំផុតសម្រាប់ទស្សនិកជន។ កម្ពុជានឹងបើកទ្វារពហុកីឡដ្ឋានជាតិស្វាគមន៍មីយ៉ាន់ម៉ានាការប្រកួតមិត្តភាពអន្តរជាតិនាវេលាម៉ោង៦:៣០នាទីល្ងាចថ្ងៃទី៩ វិច្ឆិកា។

«ជំនួបមិត្តភាពអន្តរជាតិនេះជាការប្រកួតមួយដ៏សំខាន់សម្រាប់កម្ពុជាក្នុងការត្រៀមប្រកួតវគ្គជម្រុះ AFC Asian Cup ជាមួយក្រុមហ្ស៊កដានី។ ទោះបីវាជាការប្រកួតមិត្តភាព តែគ្រូទាំងអស់សុទ្ធតែផ្តោតលើលទ្ធផលដូចគ្នា។ ដូច្នេះសម្រាប់ការប្រកួតនេះ ខ្ញុំនឹងខិតខំប្រឹងប្រែងឲ្យអស់ពីសមត្ថភាពដើម្បីស្វែងរកជ័យជម្នះ»។ នេះជាការលើកឡើងរបស់លោក ប្រាក់ សុវណ្ណារ៉ា ដោយលោកបានបន្ថែមថា ការប្រកួតនេះក៏ជាជំនួបចុងក្រោយសម្រាប់កីឡាករដែលត្រូវជម្រុះចេញពីក្រុមជម្រើសជាតិ។

បច្ចុប្បន្នក្រុមជម្រើសជាតិកម្ពុជាក្នុងជម្រើសដំបូងរបស់លោក ប្រាក់ សុវណ្ណារ៉ា មានកីឡាកររហូតដល់២៥រូប ដូច្នេះត្រូវជម្រុះពីររូបទុក២៣រូប ដើម្បីត្រៀមស្វាគមន៍ក្រុមហ្ស៊កដានីក្នុងវគ្គជម្រុះ AFC Asian Cup នាថ្ងៃទី១៤ វិច្ឆិកា នៅពហុកីឡដ្ឋានជាតិ។ សម្រាប់ការប្រកួតជើងទី១ក្រុមកម្ពុជាក្រោមការដឹកនាំរបស់លោក Leonardo Vitorino បានចាញ់ម្ចាស់ផ្ទះហ្ស៊កដានីក្នុងលទ្ធផល ៧-០។

ទន្ទឹមនឹងនេះ លោក Gerd Zeise គ្រូបង្វឹកក្រុមមីយ៉ាន់ម៉ាបានបញ្ជាក់ថា តាមរយៈមើលការប្រកួតកន្លងមក កម្ពុជាមានការរីកចម្រើនបើធៀបទៅនឹងក្រុមកម្ពុជាដែលលោកធ្លាប់ជួបនៅឆ្នាំ២០១១ ទោះបីមួយរយៈមកនេះមិនទទួលបានលទ្ធផលល្អក៏ដោយ។ សម្រាប់ការជួបគ្នាលើកនេះ លោកគិតថា កម្ពុជាជាក្រុមខ្លាំងដែលមិនងាយយកឈ្នះនោះទេ។

«តាមរយៈការប្រកួតរបស់កម្ពុជាជាមួយវៀតណាម ខ្ញុំចូលចិត្តទម្រង់លេងរបស់កម្ពុជា ព្រោះកីឡាករបត់បែនបានល្អ និងវាយបកលឿន។ ខ្ញុំគិតថាបើធៀបទៅនឹងឆ្នាំ២០១១ កម្ពុជាមានការរីចចម្រើនគួរឲ្យកត់សម្គាល់ ទោះបីមិនទទួលបានលទ្ធផលល្អក៏ពិតមែន។ ខ្ញុំរំពឹងថា ការប្រកួតដើម្បីតេស្តសមត្ថភាព និងមើលចំណុចខ្វះខាតរបស់កីឡាករ នឹងក្លាយជាការប្រកួតដ៏ទាក់ទាញ»។ នេះជាការលើកឡើង របស់គ្រូបង្វឹកមីយ៉ាន់ម៉ា។

ទន្ទឹមនឹងក្តីសង្ឃឹមថា កូនក្រុមធ្វើតាមយុទ្ធសាស្ត្រដែលបានកំណត់ លោក Gerd Zeise គ្រូបង្វឹកក្រុមជម្រើសជាតិមីយ៉ាន់ម៉ាបានបញ្ចាក់យ៉ាងខ្លីថា លោកមកកម្ពុជាគឺដើម្បីឈ្នះ និងធ្វើឲ្យការប្រកួតមានការទាញទាញសម្រាប់ទស្សនិកជនកម្ពុជា។ ជាមួយគ្នានេះ លោកបានចាត់ទុកជំនួបមិត្តភាពនេះ ជាការប្រកួតមួយដ៏សំខាន់សម្រាប់ក្រុមលោក ព្រោះនៅពេលឆាប់ៗខាងមុខ ក្រុមលោកនឹងជួបប្រកួតផ្លូវការ ជាមួយក្រុមឥណ្ឌា៕