ជាតិ
នយោបាយជាតិ
រំលាយCNRP៖ សហភាពអឺរ៉ុប និងអាមេរិករំឮកពីការបាត់បង់ប្រយោជន៍របស់កម្ពុជា
×![]()
ដោយ: ថ្មីៗ
ប្រតិកម្មពីសហគមន៍អន្តរជាតិ និងដៃគូអភិវឌ្ឍន៍ចំពោះករណីរំលាយគណបក្សប្រឆាំងដ៏មានឥទ្ធិពលរបស់កម្ពុជា ត្រូវតែមានដោយចៀសមិនរួច។ ទន្ទឹមគ្នានឹងរដ្ឋាភិបាលអូស្ត្រាលី និងការិយាល័យសិទ្ធិមនុស្សនៃអង្គការសហប្រជាជាតិ ដែលវាយតម្លៃអំពីការធ្លាក់ចុះលទ្ធិប្រជាធិបតេយ្យ រដ្ឋាភិបាលសហរដ្ឋអាមេរិក និងសហភាពអឺរ៉ុប បានលើកឡើងអំពីការលទ្ធភាពនៃការបាត់បង់ជំនួយខ្លះរបស់កម្ពុជា។
ការធ្លាក់ចុះនៃការអនុវត្តលទ្ធិប្រជាធិបតេយ្យ គឺជាការវាយតម្លៃរួមរបស់សហគមន៍អន្តរជាតិមួយចំនួនដែលអធិប្បាយអំពីការរំលាយគណបក្សសង្គ្រោះជាតិ និងការព្យួរសិទ្ធិនយោបាយរបស់ថ្នាក់ដឹកនាំនៃគណបក្សនេះ។ ប៉ុន្តែ សហភាពអឺរ៉ុប និងសហរដ្ឋអាមេរិក បានទៅលើសពីការអត្ថាធិប្បាយ ដោយបានព្រមានដល់ការកាត់បន្ថយផលប្រយោជន៍ដែលកម្ពុជាអាចទទួលបានពីពួកគេ។
នៅក្នុងសេចក្តីថ្លែងការណ៍របស់ខ្លួន សហភាពអឺរ៉ុបបានគូសបញ្ជាក់អំពីការធានានូវការគោរពសិទ្ធិមនុស្សជាមួលដ្ឋាននៅកម្ពុជា ដែលជាលក្ខខណ្ឌនៃការទទួលបានផលប្រយោជន៍ពីគម្រោង«អ្វីៗទាំងអស់លើកលែងតែអាវុធ»របស់សហភាពអឺរ៉ុប។ សហភាពអឺរ៉ុបដែលជាអ្នកផ្តល់ជំនួយផ្នែកបោះឆ្នោតដ៏សំខាន់មួយនោះ បានកត់សម្គាល់អំពីសកម្មភាពបន្តបន្ទាប់ដែលអាជ្ញាធរបានប្រព្រឹត្តិទៅលើគណបក្សប្រឆាំងដែលទទួលបានសំឡេងគាំទ្រ៤៤,៥ ភាគរយនៅក្នុងការបោះឆ្នោតសកលឆ្នាំ២០១៣ និង៤៣,៨ ភាគរយនៅក្នុងការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧។
«ដំណើរការបោះឆ្នោតមួយដែលគណបក្សប្រឆាំងដ៏សំខាន់មួយត្រូវបានផាត់ចេញដោយបំពាន គឺជាដំណើរការបោះឆ្នោតដែលមិនស្របច្បាប់ពេញលេញ។ គេត្រូវបង្កើតឲ្យមានឡើងវិញជាបន្ទាន់នូវស្ថានភាពដែលមានគណបក្សនយោបាយទាំងអស់ ដោយរួមទាំងគណបក្សសង្គ្រោះជាតិផង ហើយដែលថ្នាក់ដឹកនាំ និងអ្នកគាំទ្ររបស់ពួកគេអាចអនុវត្តការងារស្របច្បាប់ដោយសេរី»។ នេះជាសេចក្តីថ្លែងការណ៍របស់អ្នកនាំពាក្យនៃសហភាពអឺរ៉ុបស្តីការរំលាយគណបក្សប្រឆាំងនៅកម្ពុជា។
រដ្ឋាភិបាលសហរដ្ឋអាមេរិកវិញ ក្រៅពីព្រមានឆ្លើយតបជាមួយវិធានការជាក់ស្តែងក្នុងពេលខាងមុខ បានបញ្ជាក់នៅក្នុងសេចក្តីថ្លែងការណ៍របស់ខ្លួនថា វិធានការបន្ទាន់របស់ខ្លួនប្រឆាំងការរំលាយគណបក្សសង្គ្រោះជាតិនោះ គឺការបញ្ចប់ការឧត្ថម្ភចំពោះគណៈកម្មាធិការជាតិរៀបចំការបោះឆ្នោតឆ្នាំ២០១៨។ សម្រាប់សហរដ្ឋអាមេរិក មូលហេតុគឺសាមញ្ញបំផុត។ «ការបោះឆ្នោតឆ្នាំក្រោយ នឹងមិនពេញលេញតាមច្បាប់ មិនសេរី និងមិនយុត្តិធម៌ឡើយ»។ នេះគឺជាការអះអាងរបស់អ្នកនាំពាក្យសេតវិមាន។
រដ្ឋាភិបាលអូស្ត្រាលីវិញក៏ដូចគ្នា។ រដ្ឋមន្ត្រីការបរទេសអូស្ត្រាលីបានបង្ហាញក្តីបារម្ភលើបញ្ហាជាច្រើនដែលបានកើតឡើងក្នុងរយៈពេលចុងក្រោយនេះនៅកម្ពុជា ដោយអត្ថាធិប្បាយការថយចុះនៃការអនុវត្តសេរីភាពសារព័ត៌មាន ការរឹតត្បិតចំពោះសង្គមស៊ីវិល ការគម្រាមកំហែងទៅលើគណបក្សប្រឆាំង រួមទាំងការឃុំខ្លួនប្រធានគណបក្សប្រឆាំង។
ថ្លែងក្នុងនាមជាមិត្តភក្តិរបស់កម្ពុជា រដ្ឋាភិបាលអូស្រាលីបានអំពាវនាវដល់រដ្ឋាភិបាលកម្ពុជាធ្វើយ៉ាងណាអនុញ្ញាតឲ្យពលរដ្ឋរបស់ខ្លួនអនុវត្តសិទ្ធិប្រជាធិបតេយ្យរបស់ពួកគេ ពិសេសនៅមុនការបោះឆ្នោតតំណាងរាស្ត្រឆ្នាំ២០១៨។ «ពលរដ្ឋកម្ពុជាបានប្តេជ្ញាអនុវត្តលទ្ធិប្រជាធិបតេយ្យ ដោយបានចូលរួមបោះឆ្នោតក្រុមប្រឹក្សាឃុំសង្កាត់យ៉ាងច្រើន។ ការរំលាយគណបក្សសង្គ្រោះជាតិ បង្ហាញថាសំឡេងឆ្នោតជាច្រើនដែលបានមកពីការបោះឆ្នោតនោះ លែងមានតម្លៃទៀតហើយ»។ ប្រមុខការទូតនៃរដ្ឋាភិបាលក្រុងកង់បេរ៉ាបានសម្តែងការសោកស្តាយយ៉ាងដូច្នេះ។
ការិយាល័យសិទ្ធិមនុស្សនៃអង្គការសហប្រជាជាតិក៏បារម្ភអំពីបរិយាកាសនៃការបោះឆ្នោតឆ្នាំ២០១៨ដែរ។ ការិយាល័យនេះចង់ឃើញគណបក្សប្រឆាំងអាចធ្វើការងាររបស់ខ្លួនដោយសេរី និងដោយគ្មានការបំភិតបំភ័យ។ ប្រធានការិយាល័យសិទ្ធិមនុស្សនៃអង្គការសហប្រជាជាតិលោក Zeid Ra’ad Al Hussein បានបញ្ចេញប្រតិខ្លាំងៗចំពោះការរំលាយគណបក្សសង្គ្រោះជាតិ។ លោក Zeid ថ្លែងថា៖«ការប្រើប្រាស់ច្បាប់ប្រឆាំងគណបក្សសង្គ្រោះជាតិ និងថ្នាក់ដឹកនាំរបស់គណបក្សនោះ គ្រាន់តែជាការបិទបាំងមួយតែប៉ុណ្ណោះ»៕
© រក្សាសិទ្ធិដោយ thmeythmey.com
