ជាតិ
កម្ពុជា ដាក់ឲ្យប្រើប្រាស់គោលការណ៍ណែនាំពីរបបអាហារ ដើម្បីជំរុញការលូតលាស់កុមារ
× កុមារកម្ពុជា កំពុងប្រឈមនឹងការខ្វះអាហារូបត្ថម្ភ ជាងកុមារនៅក្នុងតំបន់អាស៊ាន។ ដូច្នេះហើយ ទើបកុមារកម្ពុជា មានកម្ពស់ និងរូបរាងកាយតូច ជាងកុមារនៃប្រទេសអាស៊ាន។ នេះបើតាមរបាយការណ៍ អង្កេតប្រជាសាស្ត្រ និងសុខភាព នៅក្នុងប្រទេសកម្ពុជា នៅឆ្នាំ២០១៤។ ក្រៅពីកុមារដែលខ្វះអាហាររូបបត្ថម្ភ ក៏មានកុមារដែលលើសកម្រិតអាហារូបត្ថម្ភ ដែលនាំឲ្យពួកគេ មានធំ ឬធាត់ខុសធម្មតា។
អាហារ គឺពិតជាសំខាន់ណាស់សម្រាប់កុមារ ជាពិសេសគឺការជ្រើសអាហារណា ដែលមានកម្រិតអាហាររូបត្ថមចាំបាច់ សម្រាប់រូបរាងកាយ ដើម្បីការលូតលាស់ត្រឹមត្រូវតាមអាយុ។ ដោយមើលឃើញពីកង្វះអាហារូបត្ថម្ភរបស់កុមារនៅកម្ពុជា ក្រសួងសុខាភិបាល និងក្រសួងអប់រំ បានសហការរៀបចំឲ្យមានគោការណ៍ណែនាំ អំពីរបបអាហារដល់កុមារ ដែលមានអាយុចាប់ពី៥ឆ្នាំ រហូតដល់១៧ឆ្នាំ ពោលគឺអាយុដែលកុមារចាប់ផ្ដើមចូលសាលារៀន។ គម្រោងនេះ គាំទ្រដោយអង្គការ Foundation For International Development (FIDR) នៃប្រទេសជប៉ុន។
លោកស្រី តាន់ វួចឆេង រដ្ឋលេខាធិការនៃក្រសួងសុខាភិបាល បានលើកថ្លែងក្នុងសិក្ខាសាលាស្ដីពីការដាក់ឲ្យប្រើប្រាស់គោលការណ៍ណែនាំស្ដីពីរបបអាហារ នៅថ្ងៃទី២០ ខែវិច្ឆិកាថា មិនមែនតែក្រសួងសុខាភិបាលទេ ដែលត្រូវដោះស្រាយលើបញ្ហានេះ តែត្រូវមានការចូលរួម ពីក្រសួងពាក់ព័ន្ធ ដៃគូជាតិ និងអន្តរជាតិដែរ ដើម្បីឲ្យកុមារកម្ពុជា អាចទទួលបានអាហារូបត្ថម្ភគ្រប់គ្រាន់។
ប្រធាននាយកដ្ឋានការពារសុខភាព នៃក្រសួងសុខាភិបាល លោកវេជ្ជបណ្ឌិត កុល ហេរ៉ូ បានឲ្យដឹងថា គោលការណ៍ណែនាំនេះ ត្រូវបានធ្វើជាសៀវភៅ ដាក់នៅតាមសាលារៀន ដើម្បីឲ្យលោកគ្រូ អ្នកគ្រូ អាចពន្យល់ណែនាំសិស្ស ឲ្យដឹងពីការជ្រើសរើសអាហារដែលល្អ សម្រាប់ការលូតលាស់របស់កុមារ។ វេជ្ជបណ្ឌិត កុល ហេរ៉ូ បញ្ជាក់ដូច្នេះ៖«ជាដំបូងយើងដាក់ជាសៀវភៅគោលការណ៍ ដែលក្រសួងសុខាភិបាលដាក់ឲ្យប្រើប្រាស់ ហើយពេលខាងមុខ យើងនឹងដាក់បញ្ចូលទៅក្នុងកម្មវិធីសិក្សា និងផ្សព្វផ្សាយបន្ដនៅមន្ទីរពេទ្យ និងនៅតាមសហគមន៍»។
ដើម្បីជំរុញបន្ថែម ក្រសួងសុខាភិបាលក៏បានផ្សព្វផ្សាយឲ្យគ្រូពេទ្យនៅតាមមូលដ្ឋាន ចូលរួមផ្សាព្វផ្សាយដល់មាតាបិតា ដែលនាំកូនមកពិនិត្យសុខភាពនៅមន្ទីរពេទ្យ ឲ្យបានដឹងថាអាហារណាខ្លះ ដែលល្អសម្រាប់ការលូតលាស់របស់កូន។ ចំណែកអង្គការ Foundation For International Development (FIDR) ក៏មានគម្រោងចុះបង្រៀនប្រជាពលរដ្ឋ នៅតាមមូលដ្ឋានអំពីការជ្រើសរើសអាហារ ដែលមានអាហារូបត្ថម្ភខ្ពស់ សម្រាប់កូនៗផងដែរ។
សម្រាប់ការអនុវត្តគោលការណ៍ណែនាំនេះ ត្រូវបានលោកសាស្ត្រាចារ្យ ណូបូអុ យូស៊ីអ៊ិកិ ពីសាកលវិទ្យាល័យអាម៉ូរ ប្រទេសជប៉ុន លើកឡើងថាជាការចាប់ផ្ដើមដំបូងក្នុងប្រទេសកម្ពុជាតែប៉ុណ្ណោះ ព្រោះថា ការបរិភោគចំណីអាហាររបស់កុមារ អាចចេញលទ្ធផលបាន នៅរយៈពេល ៥ទៅ១០ឆ្នាំទៀត។ សាស្ត្រាចារ្យដដែល បន្ថែមដូច្នេះ៖ «ដើម្បីជំរូឲ្យការអនុវត្តនេះ មានប្រសិទ្ធភាព អង្គការនឹងធ្វើយ៉ាងណា ឲ្យក្រសួងអប់រំដាក់បញ្ចូលគោលការណ៍ណែនាំនេះ ទៅក្នុងកម្មវិធីសិក្សា និងគ្រូបង្រៀនតែម្ដង ដើម្បីអាចបង្រៀនដល់សិស្ស និងអាណាព្យាបាលសិស្សអាចដឹងច្បាស់ ពីអាហារូបត្ថម្ភដ៏ល្អសម្រាប់កុមារ»។
សូមបញ្ជាក់ថា កន្លងមកក្រសួងសុខាភិបាល និងក្រសួងអប់រំ បានធ្វើការយ៉ាងខ្លាំង ដើម្បីជំរុញឲ្យមានការផ្ដល់អាហារ ដែលសម្បូរអាហាររូបត្ថមសម្រាប់ទារក។ នេះជាគោលការណ៍ណែនាំដំបូងបំផុតសម្រាប់កុមារ ដើម្បីឲ្យការលូតលាស់កុមារកម្ពុជា ប្រហាក់ប្រហែលកុមារនៅប្រទេសក្នុងតំបន់អាស៊ាន៕
Tag:
របបអាហារ
កុមារ
ការលូតលាស់
© រក្សាសិទ្ធិដោយ thmeythmey.com