ជាតិ
នយោបាយជាតិ
ការរំលាយ CNRP នាំឲ្យសមាជិកព្រឹទ្ធសភា២រូប នៃបក្សភ្លើងទៀន អស់តំណែង រូបភាព៖ លោក សោ ចាន់ដេត និងលោកស្រី គុណ លំអង អតីតសមាជិកព្រឹទ្ធសភា ពីគណបក្សភ្លើងទៀន
× ភ្នំពេញ៖ ការរំលាយគណបក្សសង្គ្រោះជាតិ ក៏នាំឲ្យប៉ះពាល់ដល់សមាជិកព្រឹទ្ធសភាពីររូបពីគណបក្ស សម រង្ស៊ី ដែលទើបនឹងប្តូរឈ្មោះជាគណបក្សភ្លើងទៀន ផងដែរ។ គណៈកម្មាធិការអចិន្ត្រៃយ៍ព្រឹទ្ធភា បានបើកកិច្ចប្រជុំនៅព្រឹកថ្ងៃទី២៤ ខែវិច្ឆិកានេះ ដោយសម្រេចថា លោក សោ ចាន់ដេត និងលោកស្រី គុណ លំអង ដែលជាសមាជិកព្រឹទ្ធសភាពីគណបក្ស សម រង្ស៊ី លែងជាសមាជិកព្រឹទ្ធសភា ទៀតហើយ។
សេចក្តីប្រកាសព័ត៌មានស្តីពីលទ្ធផលនៃកិច្ចប្រជុំខាងលើ បានបង្ហាញថា គណៈកម្មាធិការអចិន្ត្រៃយ៍ព្រឹទ្ធសភា បានប្រាប់អគ្គលេខាធិការដ្ឋានរបស់ខ្លួន ឲ្យអនុវត្តនូវសាលដីការបស់តុលាការកំពូល ដែលប្រកាសរំលាយគណបក្សសង្គ្រោះជាតិ និងការដកសិទ្ធិនយោបាយពីថ្នាក់ដឹកនាំ១១៨រូប នៃគណបក្សនេះ។
លោក សោ ចាន់ដេត និងលោកស្រី គុណ លំអង មិនត្រឹមតែជាសមាជិកព្រឹទ្ធសភារបស់គណបក្ស សម រង្ស៊ី នោះទេ ប៉ុន្តែក៏ជាសមាជិកក្នុងគណៈកម្មាធិការនាយកនៃគណបក្សសង្គ្រោះជាតិផងដែរ។ លោក សោ ចាន់ដេត និងលោកស្រី គុណ លំអង ស្ថិតនៅក្នុងចំណោមថ្នាក់ដឹកនាំទាំង១១៨រូប នៃគណបក្សសង្គ្រោះជាតិ ដែលត្រូវតុលាការកំពូល ដាក់ទណ្ឌកម្ម ដោយមិនឲ្យធ្វើនយោបាយរយៈពេល៥ឆ្នាំ។ នេះ ជាមូលហេតុ ដែលគណៈកម្មាធិការអចិន្ត្រៃយ៍ព្រឹទ្ធសភា សម្រេចដកអ្នកទាំង២ ចេញពីសមាជិកព្រឹទ្ធសភា។
សារព័ត៌មានថ្មីៗ មិនអាចសុំការបកស្រាយពីលោក ទាវ វណ្ណុល ប្រធានគណបក្ស សម រង្ស៊ី បានទេ ដោយសារតែលោក មិនលើកទូរសព្ទ៕
Tag:
បក្ស សម រង្ស៊ី
CNRP
ព្រឹទ្ធសភា
© រក្សាសិទ្ធិដោយ thmeythmey.com