កីឡាអន្តរជាតិ
រថយន្ត
AVB អតីតគ្រូ Chelsea នឹងចូលប្រកួតក្នុងព្រឹត្តិការណ៍ប្រណាំងរថយន្ត Dakar Rally
× គ្រូបង្វឹកកីឡាបាល់ទាត់សញ្ជាតិព័រទុយហ្គាល់លោក Andre Villas-Boas (AVB) នឹងចូលរួមប្រកួតប្រជែងក្នុងព្រឹត្តិការណ៍ប្រណាំងរថយន្ត Dakar Rally នាខែមករា ឆ្នាំ២០១៨ ខាងមុន។ បើតាមការប្រកាសរបស់អង្គភាព Amaury Sport Organisation (ASO) ដែលជាអ្នកទទួលបន្ទុករៀបចំព្រឹត្តិការណ៍។
លោក Andre Villas-Boas ដែលហៅកាត់ថា AVB ទើបតែចាកចេញពីតួនាទីជាគ្រូបង្វឹកក្លិប Shanghai SIPG របស់ចិន បន្ទាប់ពីដឹកនាំបានមួយរដូវកាល។ កាលពីថ្ងៃទី២៩ ខែវិច្ឆិកា អង្គភាពរៀបចំព្រឹត្តិការណ៍ប្រឆាំងរថយន្ត ASO បានប្រកាសថា គ្រូបង្វឹកកីឡាបាល់ទាត់វ័យ៤០ឆ្នាំរូបនេះ នឹងប្រកួតប្រជែងក្នុងព្រឹត្តិការណ៍ Dakar Rally ឆ្នាំ២០១៨ ដោយមានលោក Ruben Faria ជាដៃគូបើកបរ។
លោក AVB និង Ruben Faria នឹងបើករថយន្ត Toyota Hilux ក្នុងព្រឹត្តិការណ៍ប្រកួតប្រជែងដែលមានរយៈពេល១៥ថ្ងៃ ដោយចាប់ផ្តើមពីប្រទេសប៉េរូនៅថ្ងៃទី៦ ខែមករា ដោយឆ្លងកាត់បូលីវី មុននឹងបញ្ចប់នៅអាហ្សង់ទីននាថ្ងៃទី២០ ខែមករា។
លោក AVB កាលពីក្មេងគឺជាមនុស្សម្នាក់ដែលស្រឡាញ់ការប្រណាំងរថយន្ត ព្រោះលោកមានឪពុកមាឈ្មោះ Pedro Villas-Boas បានប្រកួតប្រជែងក្នុងព្រឹត្តិការណ៍ Paris-Dakar កាលពីឆ្នាំ១៩៨២ ដោយបើកបររថយន្ត 4x4 ផងដែរ។
អតីតគ្រូបង្វឹកក្លិប Porto, Chelsea និង Tottenham Hotspur រូបនេះ បានប្រកាសថា ខ្លួនត្រៀមខ្លួនរួចរាល់ហើយក្នុងការចាប់ដៃចង្កូតរថយន្ត ខណៈលោក Ruben Faria ដែលមិត្តរួមជាតិព័រទុយហ្គាល់របស់លោក ធ្លាប់បានចំណាត់ថ្នាក់លេខ២ នាព្រឹត្តិការណ៍ Dakar កាលពីឆ្នាំ២០១៣ កន្លងមកផងដែរ៕
© រក្សាសិទ្ធិដោយ thmeythmey.com