អន្តរជាតិ
អ៊ីស្រាអែលថា ខ្លូនមិនបានទម្លាក់គ្រាប់បែកសម្លាប់មនុស្សនៅតំបន់កាហ្សាដូចគេចោទឡើយ
× យោធាអ៊ីស្រាអែលបានប្រកាសនៅថ្ងៃអង្គារទី ១២ ខែធ្នូដោយទាត់ចោលការចោទប្រកាន់ថា ខ្លួនបានទម្លាក់គ្រាប់បែកសម្លាប់ប្រជាជនប៉ាឡេស្ទីនកន្លងមកក្រោយមានចលនាបះបោរប្រឆាំងខ្លួនពាក់ព័ន្ធបញ្ហាក្រុងហ្ស៊េរុយសាឡិម។
ក្រោយមានការចោទប្រកាន់ថាកងទ័ពអ៊ីស្រាអែលបានបើកការវាយប្រហារតាមផ្លូវអាកាសសម្លាប់ប្រជាជនប៉ាឡេស្ទីនពីរនាក់ អ៊ីស្រាអែលបានចេញមុខបដិសេធការចោទប្រកាន់ និងអះអាងថាខ្លួនមិនបានធ្វើបែបនោះឡើយ។
កាលពីដើមសប្តាហ៍នេះ សារព័ត៌មានជាច្រើនបានផ្សាយថា អ៊ីស្រាអែលបានទម្លាក់គ្រាប់បែកនៅតំបន់ កាហ្សា ដោយសម្លាប់ជនជាតិប៉ាឡេស្ទីនពីរនាក់ដែលជាក្រុមសកម្មប្រយុទ្ធជីហាត។យោងតាមទីភ្នាក់ងារព័ត៌មាន Xinhua អ្នកនាំពាក្យយោធាអ៊ីស្រាអែលបានចេញសេចក្តីថ្លែងការណ៍មួយដើម្បីបដិសេធរបាយការណ៍នេះ។
«ផ្ទុយនឹងរបាយការណ៍ដែលចេញផ្សាយកន្លងមក កងទ័ពអ៊ីស្រាអែលមិនបានវាយប្រហារនៅភាគខាងកើតតំបន់កាហ្សាឡើយ»។ សេចក្តីថ្លែងការណ៍ទាហានអ៊ីស្រាអែលបានបញ្ជាក់ដូច្នេះ។
ចន្លោះពីថ្ងៃចន្ទនិងថ្ងៃអង្គារ រថក្រោះអ៊ីស្រាអែលមួយគ្រឿង និងយន្តហោះមួយគ្រឿបានវាយប្រហារភាគខាងជើងតំបន់កាហ្សា ប៉ុន្តែខាងអ្នកនាំពាក្យទាហានអ៊ីស្រាអែលបានអះអាងថា គេវាយប្រហារទីតាំងក្រុមហាម៉ាដែលបានប្រើគ្រាប់រ៉ុក្កែតផ្លោងមកលើខ្លួនប៉ុណ្ណោះ។ដូច្នេះហើយអ៊ីស្រាអែលចាត់ទុកថា វាជាវិធានការសមស្របសម្រាប់ឆ្លើយតប និងប្រឆាំងអ្នកទទួលខុសត្រូវករណីវាយប្រហារនេះ។
តាមពិតទៅចលនាវាយប្រហារដោយគ្រាប់រ៉ុក្កែតប្រឆាំងអ៊ីស្រាអែលនេះកើតឡើងក្រោយពេលដែលមានការទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែលពីសំណាក់រដ្ឋបាលលោក ដូណាល់ ត្រាំ កាលពីសប្តាហ៍មុន។ សកម្មភាពឯកតោភាគីនេះបានបង្កឲ្យមានការខឹងសម្បារ និងមានការថ្កោលទោសអ៊ីស្រាអែលជាបន្តបន្ទាប់ទាំងមិត្ត ដៃគូ និងសត្រូវ ហើយសកម្មភាពនេះក៏បង្កឲ្យការដោះស្រាយវិបត្តិមជ្ឈិមបូព៌ាកាន់តែលំបាកខ្លាំងផងដែរ៕
Tag:
អ៊ីស្រាអែល
ប៉ាឡេស្ទីន
កាហ្សា
ហ្ស៊េរុយសាឡិម
© រក្សាសិទ្ធិដោយ thmeythmey.com