ជាតិ
កិច្ចប្រជុំអាយស៊ីស៊ី-អង្គរ បានរម្លឹកពីវីរភាពរបស់លោក វណ្ណ ម៉ូលីវណ្ណ
× សៀមរាប៖ នៅថ្ងៃទី១៤ ធ្នូនេះ គឺជាថ្ងៃចុងក្រោយនៃកិច្ចប្រជុំពេញអង្គលើកទី២៤ នៃគណៈកម្មាធិការអាយស៊ីស៊ី-អង្គរ។ ថ្ងៃចុងក្រោយនៃកិច្ចប្រជុំនេះ បានរម្លឹកពីវីរភាពរបស់ លោកតា វណ្ណ ម៉ូលីវណ្ណ បិតាស្ថាបត្យកម្មកម្ពុជា និងជាប្រធានអាជ្ញាធរអប្សរាដំបូងគេបង្អស់។
លោកសាស្ត្រាចារ្យ Azedine BESCHAOUCH លេខាធិការអចិន្ត្រៃយ៍ និងជាទីព្រឹក្សាអាជ្ញាធរអប្សរា បានរម្លឹកពីវីរភាពរបស់ លោកតា វណ្ណ ម៉ូលីវណ្ណ ក្នុងកិច្ចប្រជុំអាយស៊ីស៊ី-អង្គរ។ តាមលោកសាស្ត្រាចារ្យ កម្ពុជាជំពាក់គុណបំណាច់របស់លោក វណ្ណ ម៉ូលីវណ្ណ ក្នុងការកសាងប្រទេសជាតិ។ ក្នុងនោះលោកបាន លះបង់ពេលវេលាជាច្រើន ក្នុងការចងក្រងឯកសារស្តីពីការរៀបចំក្រុង មានក្រុងសៀមរាប និងភ្នំពេញជាដើម។
ក្រៅពីនេះ លោកសាស្ត្រាចារ្យ Azedine BESCHAOUCH ក៏បានរម្លឹកពីសំណង់មួយចំនួន ដែលជាស្នាដៃរបស់លោក វណ្ណ ម៉ូលីវណ្ណ រួមមាន សាលចតុមុខ និងវិមានឯករាជ្យជាដើម។ ក្នុងការរៀបចំក្រុងនេះ លោក វណ្ណ ម៉ូលីវណ្ណ បានសរសេរសៀវភៅប្រមាណ ៦ក្បាល សម្រាប់ ទុកជាឯកសារ។
«ខ្ញុំសុំឧន្ទិសដល់លោក វណ្ណម៉ូលីវណ្ណ ដែលបានជួយកម្ពុជាជាច្រើន ក្នុងនោះក៏មានប្រាសាទអង្គរវត្តផងដែរ។ លោកជាមនុស្សមានទស្សនៈវិស័យវែងឆ្ងាយ ក្នុងការងាររៀបចំក្រុង ហើយការងារនៅអាជ្ញាធរអប្សរា លោកបានជួយបណ្តុះបណ្តាលធនធានមនុស្សបានយ៉ាងច្រើន»។ នេះជាការលើកឡើងរបស់លោកសាស្ត្រាចា Azedine BESCHAOUCH។
គួររម្លឹកថា លោក វណ្ណ ម៉ូលីវណ្ណ ជាអតីតប្រធានអគ្គនាយកអាជ្ញាធរអប្សរា ចាប់ពីឆ្នាំ ១៩៩៥ ដល់ឆ្នាំ ២០០២។ លោកបានទទួលមរណភាពនៅថ្ងៃទី ២៨ ខែកញ្ញា ឆ្នាំ២០១៧ វេលាម៉ោង ៩និង៤៥នាទី នៅគេហដ្ឋានរបស់លោកក្នុងខេត្តសៀមរាប៕
© រក្សាសិទ្ធិដោយ thmeythmey.com