ជាតិ
គ.ជ.ប ឆ្ងល់ហេតុអ្វី អឺរ៉ុប ហ៊ានវាយតម្លៃថា ការបោះឆ្នោត២០១៨នឹងមិនត្រឹមត្រូវ? លោក ស៊ិក ប៊ុនហុក ប្រធានគ.ជ.ប
× ភ្នំពេញ៖ មួយថ្ងៃក្រោយសហភាពអឺរ៉ុប ផ្អាកការផ្តល់ជំនួយ គណៈកម្មាធិការជាតិរៀបចំការបោះឆ្នោត (គ.ជ.ប) ក៏ចេញសេចក្តីថ្លែងការណ៍មួយ ដោយសម្តែងការសោកស្តាយ។ ហើយគ.ជ.ប ក៏មិនយល់ដែរចំពោះហេតុផលមួយចំនួន ដែលសហភាពអឺរ៉ុប បានលើកឡើង ដើម្បីសម្រេចផ្អាកការផ្តល់ជំនួយនេះ។
គ.ជ.ប ហាក់មិនយល់ចំពោះការលើកឡើងរបស់សហភាពអឺរ៉ុប ដែលធ្លាប់សរសើរដំណើរការនៃការបោះឆ្នោតថ្នាក់ឃុំ-សង្កាត់ ក្នុងឆ្នាំ២០១៧ តែមកដល់ពេលនេះ បែរជាមើលស្រាលសមត្ថភាពរបស់គ.ជ.ប ក្នុងការរៀបចំការបោះឆ្នោតក្នុងឆ្នាំ២0១៨ទៅវិញ។ តាមរយៈសេចក្តីថ្លែងការណ៍ ដែលធ្វើឡើងនៅថ្ងៃទី១៣ ខែធ្នូ គ.ជ.ប លើកឡើងនូវចម្ងល់ទាំងនេះថា៖«តើមានហេតុផលអ្វីដែរ អាចវាយតម្លៃគ.ជ.ប ថា ការបោះឆ្នោតក្នុងឆ្នាំ២0១៨ មិនមានលក្ខណសេរី ត្រឹមត្រូវ និងយុត្តិធម៌ បើមេដឹកនាំ គ.ជ.ប នៅដដែល សមាជិកគ.ជ.ប ភាគច្រើននៅដដែល ហើយមន្ត្រីគ.ជ.ប រាប់រយនាក់ ក៏នៅដដែល?»។
យ៉ាងណាក៏ដោយចុះ គ.ជ.ប បានព្យាយាមបង្ហាញឲ្យសហភាពអឺរ៉ុបឃើញថា គ.ជ.ប នៅតែមានលទ្ធភាពគ្រប់គ្រាន់ ដើម្បីរៀបចំការបោះឆ្នោតក្នុងឆ្នាំ២0១៨ ឲ្យប្រព្រឹត្តទៅដោយរលូននិងត្រឹមត្រូវ ទោះរងការផ្អាកជំនួយក្តី។ សេចក្តីថ្លែងការណ៍ បានបញ្ជាក់ថា គ.ជ.ប បានត្រៀមថវិការួចរាល់ហើយ សម្រាប់ការបោះឆ្នោតនាពេលខាងមុខ។ សេចក្តីថ្លែងការណ៍ បានសង្កត់ធ្ងន់ថា គ.ជ.ប នឹងរក្សាគោលការណ៍ចម្បងទាំងពីរឲ្យបាន គឺការធ្វើបញ្ជីឈ្មោះបោះឆ្នោតឲ្យបានត្រឹមត្រូវ និងសិទ្ធិរបស់ប្រជាពលរដ្ឋ ក្នុងការចូលរួមបោះឆ្នោត។
លោក សោម សូរីដា អគ្គលេខាធិការរងគ.ជ.ប ធ្លាប់អះអាងថា គ.ជ.ប បានត្រៀមថវិកាប្រមាណ៥២លានដុល្លារ ហើយក៏មានសម្ភារបច្ចេកទេសគ្រប់គ្រាន់ហើយដែរ សម្រាប់បម្រើឲ្យការបោះឆ្នោត។ លោក ប្រាប់ថា ការផ្អាកជំនួយពីសហភាពអឺរ៉ុប មិនរាំងស្ទះដល់កិច្ចការរបស់គ.ជ.ប នោះទេ។
សម្តេច ហ៊ុន សែន នាយករដ្ឋមន្ត្រីកម្ពុជា ក៏បានបញ្ជាក់ដែរថា រដ្ឋាភិបាលកម្ពុជា មានលទ្ធភាពគ្រប់គ្រាន់ក្នុងការរៀបចំការបោះឆ្នោត។ លើសពីនេះ សម្តេច ហ៊ុន សែន ប្រកាសថា ឲ្យតែប្រជាពលរដ្ឋ បានចូលរួមការបោះឆ្នោត គឺគ្រប់គ្រាន់ហើយ ដោយមិនតម្រូវឲ្យប្រទេសដទៃ ឬអង្គការសហប្រជាជាតិទទួលស្គាល់នោះទេ។
សូមបញ្ជាក់ថា សហភាពអឺរ៉ុប បានចេញសេចក្តីថ្លែងការណ៍នៅថ្ងៃទី១២ ខែធ្នូ ដោយប្រកាសផ្អាកជំនួយ មកឲ្យគ.ជ.ប ដោយភ្ជាប់ជាមួយនឹងការលើកឡើងថា ការបោះឆ្នោតក្នុងឆ្នាំ២0១៨ នឹងមិនមានភាពស្របច្បាប់ឡើយ ប្រសិនបើអវត្តមានគណបក្សសង្គ្រោះជាតិ ហើយលោក កឹម សុខា នៅតែបន្តជាប់ឃុំក្នុងពន្ធនាគារ។ សហភាពអឺរ៉ុប បញ្ជាក់ថា ការបោះឆ្នោតក្នុងឆ្នាំ២0១៨ នឹងមិនគួរឲ្យទុកចិត្តនោះទេ។ សហរដ្ឋអាមេរិក គឺជាភាគីដំបូងគេ ដែលបានផ្តាច់ជំនួយលើការបោះឆ្នោតនៅកម្ពុជា៕
Tag:
គជប
អឺរ៉ុប
ផ្តាច់ជំនួយ
© រក្សាសិទ្ធិដោយ thmeythmey.com