ជាតិ
កាសែត និងទស្សនាវដ្តីចំនួន២៧៥ អាចត្រូវលុបចោលពីបញ្ជីក្រសួងព័ត៌មាន
× កាសែត និងទស្សនាវដ្តីចំនួន២៧៥ ដែលមិនបានប្រតិបត្តិការទាល់តែសោះនោះ នឹងត្រូវលុបចោលពីបញ្ជីអាជ្ញាប័ណ្ណនៅក្រសួងព័ត៌មានក្នុងពេលខាងមុខនេះ។ ដំណឹងនេះត្រូវបានបញ្ជាក់ដោយលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន។
អគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានរកឃើញមានអង្គភាពសារព័ត៌មានបោះពុម្ព រួមមានកាសែត និងទស្សនាវដ្តី ចំនួន២៧៥ ដែលមិនបានប្រតិបត្តិការ និងមិនបានបន្តអាជ្ញាប័ណ្ណក្នុងពេលកន្លងមក។ អគ្គនាយកនៃអគ្គនាយកដ្ឋាននេះ លោក ផុស សុវណ្ណ បានបញ្ជាក់ប្រាប់អ្នកសារព័ត៌មានថា អង្គភាពសារព័ត៌មានខាងលើនេះ នឹងអាចត្រូវលុបឈ្មោះចោលពីក្នុងបញ្ជីនៃក្រសួងព័ត៌មាន។
ថ្លែងប្រាប់អ្នកកាសែតនៅក្នុងសិក្ខាសាលាមួយស្តីពី «សន្តិភាព និងសុវត្ថិភាពប្រព័ន្ធផ្សព្វផ្សាយនៅកម្ពុជា»នាថ្ងៃទី១៥ខែធ្នូ លោក ផុស សុវណ្ណ បានពន្យល់យ៉ាងដូច្នេះ៖«អង្គភាពទាំងនោះ មិនបានធ្វើសកម្មភាពតែម្តង។ ជួនកាលអាច ពួកគាត់បោះបង់ដោយសារបញ្ហាសុខភាព ឬដោយឈប់ប្រកបរបរនេះក៏មិនដឹង»។ បើតាមការអះអាងរបស់លោក អគ្គនាយកដដែល បញ្ជីឈ្មោះអង្គភាពព័ត៌មានទាំងនោះត្រូវបានផ្ញើដល់ដៃលោករដ្ឋមន្ត្រីព័ត៌មានហើយ ដោយនៅសល់តែក្តីសម្រេចចុងក្រោយរបស់លោករដ្ឋមន្ត្រីតែប៉ុណ្ណោះ។
លោក ផុស សុវណ្ណ ក៏បានប្រាប់អ្នកកាសែតឲ្យដឹងដែរថា គឺលោករដ្ឋមន្ត្រីដែលបានបញ្ជាឲ្យលោកពិនិត្យ និងស្រង់ឈ្មោះអង្គភាពសារព័ត៌មានដែលមិនដំណើរការ និងមិនបានមកបន្តអាជ្ញាប័ណ្ណនេះ។
សព្វថ្ងៃនេះ នៅកម្ពុជាអង្គភាពព័ត៌មានជាតិ និងអន្តរជាតិដែលបានចុះបញ្ជីការនៅក្រសួងព័ត៌មានមានចំនួន៥៣០អង្គភាព។ ក្នុងចំណោមនោះ មានកាសែតផ្សាយជាភាសាខ្មែរចំនួន១៣៩អង្គភាព កាសែតផ្សាយជាភាសាបរទេសមាន៤៣អង្គភាព ទស្សនាវដ្តីចំនួន៣០៦អង្គភាព និងព្រឹត្តិប័ត្រចំនួន៤២អង្គភាព។ ចំណែកវិទ្យុមានចំនួន២១១ស្ថានីយ ក្នុងនោះវិទ្យុបរទេសមានចំនួន១០ស្ថានីយ។ ទូរទស្សន៍ផ្សាយផ្ទាល់មានចំនួន២១ស្ថានីយ និងទូរទស្សន៍ផ្សាយបន្តចំនួន១១២ស្ថានីយ។ ដោយឡែកទូរទស្សន៍អនឡាញមានចំនួន៥៨អង្គភាព។ រីឯការិយាល័យតំណាងទីភ្នាក់ងារសារព័ត៌មានបរទេស ការិយាល័យតំណាងវិទ្យុ ទូរទស្សន៍បរទេសប្រចាំការអចិន្ត្រៃយ៍មានចំនួន២១អង្គភាព៕
© រក្សាសិទ្ធិដោយ thmeythmey.com