អត្តពលិកជិត១ពាន់នាក់ចូលរួមរត់ប្រណាំងអបអរបុណ្យសមុទ្រថ្ងៃទី១នៅខេត្តកែបព្រឹកនេះ

កីឡាជាតិ

ជាតិ

អត្តពលិកជិត១ពាន់នាក់ចូលរួមរត់ប្រណាំងអបអរបុណ្យសមុទ្រថ្ងៃទី១នៅខេត្តកែបព្រឹកនេះ

22, Dec 2017 , 9:26 am

រូបភាព

ដោយ:

អត្តពលិកជាតិនិងអន្តរជាតិប្រមាណជិត១ពាន់នាក់ចូលរួមរត់ប្រណាំងដើម្បីអបអរពិធីបុណ្យសមុទ្រថ្ងៃទី១នៅខេត្តកែបនាព្រឹកថ្ងៃទី២២ ខែធ្នូ ឆ្នាំ២០១៧នេះ។ អត្តពលិកទាំងនេះប្រកួតប្រជែងលើពីរវិញ្ញាសា គឺរត់ចម្ងាយ៥គីឡូម៉ែត្រ និង៣គីឡូម៉ែត្រ ដោយ៥គីឡូម៉ែត្របញ្ជាចេញដោយអភិបាលខេត្តកែប លោក កែន សត្ថា និង៣គីឡូម៉ែត្រដោយលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។

ដើម្បីអបអរពិធីបុណ្យសមុទ្រលើកទី៦នៅខេត្តកែប គណៈកម្មាធិការជាតិអូឡាំពិកបាននាំយកកីឡាមហាជននិងអាជីពចំនួន១១ប្រភេទដាក់ឲ្យចូលរួមប្រកួតនិងសម្តែងនៅឆ្នាំនេះ។ ជាក់ស្តែងនៅព្រឹកថ្ងៃទី២២ ខែធ្នូ ឆ្នាំ២០១៧ ដែលជាថ្ងៃទី១នៃពិធីបុណ្យសមុទ្រគណៈកម្មាធិការជាតិអូឡាំពិកកម្ពុជាបានរៀបចំកាប្រកួតរត់ប្រណាំងបែបកម្សាន្តនៅមុខមន្ទីរទេសចរណ៍ខេត្តកែបដែលមានអត្តពលិកជាតិនិងអន្តរជាតិប្រមាណជិត១ពាន់នាក់ចូលរួម។

ក្នុងចំណោមអត្តពិកទាំងអស់អត្តពលិកមួយចំនួនប្រកួតលើវិញ្ញាសារត់ចម្ងាយ៥គីឡូម៉ែត្រ និងមួយចំនួនរត់លើវិញ្ញាសា៣គីឡូម៉ែត្រ។ សម្រាប់ការប្រកួតនៅព្រឹកនេះដែរ អភិបាលខេត្តកែប លោក កែន សត្ថា ជាអ្នកបញ្ជាចេញរត់ចម្ងាយ៥គីឡូម៉ែត្រ រីឯលោក វ៉ាត់ ចំរើន អគ្គលេខាធិការ NOCC និងជាអនុរដ្ឋលេខាធិការក្រសួងទេសចរណ៍បញ្ជា៣គីឡូម៉េត្រ។ ការរត់បែបកម្សាន្តនេះ អត្តពលិកភាគច្រើនជាសិស្សានុសិស្សរស់នៅក្នុងខេត្តកែប ខេត្តកំពត និងរាជធានីភ្នំពេញ។

បើយោងតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា នៅរសៀលថ្ងៃទី២២ ធ្នូ នេះ ក៏មានការប្រកួតកីឡាទូកក្តោងជ្រើសរើសជើងឯកថ្នាក់ជាតិប្រចាំឆ្នាំ២០១៧ ថ្ងៃដំបូងរបស់ខ្លួនផងដែរ៕