លោក ឱម យិនទៀង៖ «ម្ចាស់សង្វៀនជល់មាន់ មិនខ្លាចចៅហ្វាយខេត្ត ខ្លាចតែសម្ដេចទេ»

ជាតិ

លោក ឱម យិនទៀង៖ «ម្ចាស់សង្វៀនជល់មាន់ មិនខ្លាចចៅហ្វាយខេត្ត ខ្លាចតែសម្ដេចទេ»

26, Dec 2017 , 8:39 pm

រូបភាព

ដោយ: ថ្មីៗ

ភ្នំពេញ៖ ប្រធានអង្គភាពប្រឆាំងអំពើពុករលួយ (ACU) លោក ឱម យ៉ិនទៀង បានលើកមូលហេតុ ដែលអាជ្ញាធរទើបបង្ក្រាបសង្វៀនជល់មាន់នៅខេត្តកណ្ដាល និងតាកែវកាលពេលថ្មីៗនេះ ដោយសារតែម្ចាស់ទីតាំងជល់មាន់នោះ អាងប្រើឈ្មោះសម្ដេចនាយករដ្ឋមន្ត្រី ហ៊ុន សែន សម្រាប់កាងកន្លែងខ្លួន។ បើតាមលោក ឱម យ៉ិនទៀង សូម្បីតែចៅហ្វាយខេត្តក៏មិនហ៊ានប៉ះពាល់កន្លែងជល់មាន់ដែរ ។ ឆ្លើយតបចម្ងល់ទាក់ទងនិងបញ្ហាអ្នកកាសែត ដែលទទួលលុយពីម្ចាស់សង្វៀនជល់មាន់នេះ លោក ឱម យ៉ិនទៀង ៖«(អ្នកកាសែត) អត់មានគំរាមសោះ ទៅគំរាមកន្លែងជល់មាន់នេះ ចៅហ្វាយខេត្តវាមិនខ្លាចផង មកខ្លាចអ្នកកាសែតប៉ុណ្ណឹង ។ និយាយគ្នាតាមពិត វាខ្លាចតែសម្ដេច ហ៊ុន សែន មួយតើ ឃើញដូចនេះទេ មេប៉ូលិសវាមិនខ្លាចផង ចៅហ្វាយខេត្តវាមិនខ្លាចផង ក្រសួងមហាផ្ទៃវាមិនខ្លាចផង វានៅតែបើក វាថាបងប្អូនសម្ដេច ហ៊ុន សែន»។

ប្រធានអង្គភាពប្រឆាំងអំពើពុករលួយរូបនេះ បានបញ្ជាក់ថា បញ្ហាអ្នកកាសែតជាង២០០នាក់ ដែលត្រូវបានចោទពាក់ព័ន្ធការទទួលប្រាក់ពីម្ចាស់សង្វៀនជល់មាន់នៅខេត្តកណ្ដាល និងតាកែវនោះ មិនមានកំហុសទេ ដោយសារតែពួកគេមិនមែនជាអ្នកកាសែតមន្ត្រីរាជការសាធារណៈ។

សូមស្ដាប់លោក ឱម យ៉ិនទៀង៖

កាលពីខែវិច្ឆិកាកន្លងមក អាជ្ញាធរ បានបង្ក្រាបសង្វៀនជល់មាន់ក្នុងខេត្តកណ្តាល និងតាកែវ ដែលជារបស់លោក ថៃ ម៉ាប់ ហើយត្រូវបានគេផ្សព្វផ្សាយថា ជាក្មួយប្រសានាយករដ្ឋមន្ត្រី ហ៊ុន សែន ។ លោក ថៃ ម៉ាប់ បានប្រគល់ខ្លួនឲ្យសមត្ថកិច្ច ក្រោយពីមានបញ្ជាពីនាយករដ្ឋមន្ត្រីឲ្យតាមចាប់ខ្លួន៕