ពីនេះ ពីនោះ
ព័ត៍មានសុខភាព
របបអាហារអ្នករស់នៅសមុទ្រមេឌីទែរ៉ាណេអាចបន្ថយការកើតជំងឺមហារីកសុដន់បាន
× យោងទៅតាមសេចក្តីរាយការណ៍របស់សារព័ត៌មាន Mail Online បានឲ្យដឹងថា ស្ត្រីក្រោយរ៉ាំងរដូវ៖ ការញ៉ាំរបបអាហារបែបអ្នករស់នៅសមុទ្រមេឌីទែរ៉ាណេអាចកាត់បន្ថយការប្រឈមនឹងជំងឺមហារីកសុដន់រហូតដល់ស្លាប់បាន ៤០ភាគរយ។ ការសិក្សានេះធ្វើឡើងដោយអ្នកស្រាវជ្រាវមកពីប្រទេស Netherlands។ អ្នកស្រាវជ្រាវបានពិនិត្យទៅលើទិន្នន័យមកពីការសិក្សាមួយដែលចូលរួមដោយស្ត្រីអាយុចាប់ពី ៥៥ទៅ៦៩ឆ្នាំ ដែលមានច្រើនជាង ៦០០០០នាក់ រយៈពេល២០ឆ្នាំ។ ក្នុងពេលចាប់ផ្តើមសិក្សា ស្ត្រីទាំងនោះតម្រូវឲ្យប្រាប់ច្បាស់លាស់អំពីរបបអាហារ សកម្មភាពរាងកាយ និងការប្រឈមមុខនានាទាក់ទងនឹងមហារីក។
បន្ទាប់មក អ្នកស្រាវជ្រាវបានធ្វើការប្រៀបធឿបរបបអាហាររបស់ស្ត្រីច្រើនជាង ២០០០នាក់ដែលបានកើតជំងឺមហារីកសុដន់ ជាមួយនឹងស្ត្រីក្រុមដូចគ្នាតែមិនបានកើតជំងឺនេះឡើយ។ ជាលទ្ធផលគេរកឃើញថា វាមិនមានអ្វីទាក់ទងគ្នាឡើងរវាងរបបអាហារបែបប្រជាជនមេឌីទែរ៉ាណេ និងការប្រឈមនឹងជំងឺមហារីកសុដន់។
ទោះបីជាយ៉ាងណាក៏ដោយ អ្នកស្រាវជ្រាវបានរកឃើញថា ស្ត្រីដែលមានរបបអាហារបែបអ្នករស់នៅសមុទ្រមេឌីទែរ៉ាណេភាគច្រើនមិនសូវកើតជាជំងឺមហារីកសុដន់ប្រភេទ Oestrogen Receptor-Positive Breast Cancer ឡើយ ហើយក៏មានតិចជាង ៤០ភាគរយដែរ។
ជាមួយគ្នានឹងការសិក្សាទាំងអស់ទាក់ទងនឹងមហារីកប្រភេទនេះ វាជារឿងពិបាកមួយក្នុងការញែកឲ្យដឹងអំពីឥទ្ធីពលនៃរបបអាហារ និងកត្តារបៀបរស់នៅផ្សេងៗទៀតដូចជា ការហាត់ប្រាណ និងជក់បារីជាដើម។ រឿងនេះនឹងធ្វើឲ្យកាន់តែពិបាកក្នុងការបង្ហាញភាពខុសគ្នាលើការប្រឈមមុខដែលផ្អែកទៅលើលទ្ធផលនៃរបបអាហារប្រភេទនេះតែមួយមុខ។
របបអាហារបែបអ្នករស់នៅសមុទ្រមេឌីទែរ៉ាណេ ត្រូវបានគេរកឃើញថាមានទំនាក់ទំនងនឹងសុខភាពច្រើនយ៉ាងណាស់។ ការដែលញ៉ាំអាហារផ្តល់សុខភាព អាហារមានតុល្យភាពជាមួយបន្លែ និងផ្លែឈើ គ្រាប់ធញ្ញជាតិ និងត្រីមួយចំនួន ហើយញ៉ាំសាច់ក្រហមនិងអាហារផ្អែមតិចទៀតនោះគឺជាអ្វីដែលគ្រូពេទ្យភាគច្រើនបានណែនាំ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com