ជាតិ
សេដ្ឋកិច្ច
ក្រុមហ៊ុន Walmart របស់អាមេរិករំឮករដ្ឋមន្ត្រីកម្ពុជាអំពីបរិយាកាសជំនួញនៅកម្ពុជា លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ
× ក្រុមហ៊ុនបញ្ជាទិញផលិតផលវាយនភណ្ឌរបស់សហរដ្ឋអាមេរិកបានប្រាប់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈរបស់កម្ពុជាថា ជោគជ័យជំនួញរបស់ពួកគេនៅកម្ពុជាស្ថិតនៅលើបរិយាកាសធុរកិច្ចល្អ និងស្តង់ដារនៃលក្ខខណ្ឌការងារខ្ពស់។
«ស្ថិរភាព, ការរំពឹងទុកនៃការបញ្ជាទិញគ្មានបញ្ហា និងការអនុវត្តច្បាប់ត្រឹមត្រូវ គឺជាមូលដ្ឋាននៃជំនួញរបស់ពួកយើងនៅលើពិភពលោកនេះ ហើយប្រធានបទទាំងនេះក៏ជាមូលដ្ឋានដែលអនុញ្ញាតឲ្យយើងប្តេជ្ញាចិត្តសម្រាប់រយៈពេលវែងនៅក្នុងការវិនិយោគនៅលើទីផ្សារមួយដែរ»។
នេះជាខ្លឹមសារមួយនៅក្នុងលិខិតរបស់ក្រុមហ៊ុនអ្នកបញ្ជាទិញផលិតផលវាយនភណ្ឌរបស់សហរដ្ឋអាមេរិក Walmart ពីកម្ពុជា ដែលត្រូវបានផ្ញើមកលោក អ៊ិត សំហេង រដ្ឋមន្ត្រីក្រសួងការងារកម្ពុជាកាលពីដើមខែធ្នូនេះ។
លិខិតនេះត្រូវបានផ្ញើមកលោក អ៊ិត សំហេង បន្ទាប់ពីប្រតិភូនៃក្រុមហ៊ុនដែលអះអាងថា ខ្លួនជាក្រុមហ៊ុននាំចេញសម្ភារស្បែកជើងធំជាងគេពីកម្ពុជា ហើយនិងជាអ្នកនាំចេញផលិតផលសំលៀកបំពាក់ធំទីពីរពីកម្ពុជាដែរនោះ បានមកទស្សនកិច្ចនៅកម្ពុជានាដើមខែវិច្ឆិកា។
ក្រុមហ៊ុន Walmart ដែលមានគម្រោងនាំចេញផលិតផលធ្វើដំណើរកម្សាន្ត (កាបូប, វ៉ាលីស…) ពីកម្ពុជានៅឆ្នាំក្រោយនេះ បាននិយាយឡើងវិញនៅក្នុងលិខិតរបស់ខ្លួនប្រាប់រដ្ឋមន្ត្រីក្រសួងការងារកម្ពុជាថា អតិថិជនរបស់ពួកគេត្រូវទាមទារឲ្យមានការគោរពលក្ខខណ្ឌការងារ នៅក្នុងប្រទេសដែលក្រុមហ៊ុននេះបញ្ជាទិញផលិតផល។ លិខិតដែលចុះហត្ថលេខាដោយ លោក Scott Price ដែលជាអនុប្រធានប្រតិបត្តិរបស់ក្រុមហ៊ុន Walmar បានសរសេរថា៖ «យើងសូមស្នើដោយក្តីគោរព ឲ្យរដ្ឋាភិបាលរបស់លោកធ្វើឲ្យកាន់តែប្រសើរឡើងនូវលក្ខខណ្ឌការងារសម្រាប់កម្មករ កម្មការិនី និងយកចិត្តទុកដាក់ចំពោះរដ្ឋាភិបាលរបស់យើង និងសង្គមស៊ីវិលដោយភាពត្រឹមត្រូវ ដោយអនុលោមទៅតាមស្តង់ដារអន្តរជាតិ»។
ក្នុងរយៈកាលចុងក្រោយនេះ មជ្ឈដ្ឋាននានាបានបង្ហាញក្តីបារម្ភថា កម្ពុជាអាចរងវិបត្តិសេដ្ឋកិច្ច ប្រសិនបើប្រទេសធំៗ ឈប់បញ្ជាទិញផលិតផលនិងទំនិញពីកម្ពុជា។ ពួកគេយល់ថា ប្រទេសនានាអាចនឹងធ្វើបែបនេះដាក់កម្ពុជា ដោយសារតែមិនសប្បាយចិត្ត ដែលគណបក្សសង្គ្រោះជាតិ ត្រូវបានរំលាយចោល ហើយលោក កឹម សុខា ក៏ជាប់ពន្ធនាគារ។
ជាក់ស្តែង សហភាពអឺរ៉ុប និងសហរដ្ឋអាមេរិក បានចេញមុខគេ ក្នុងការព្រមានដាក់ទណ្ឌកម្មបែបនេះ។ ថ្មីៗនេះ ក្រុមសមាជិកសភាអឺរ៉ុប បានស្នើឲ្យផ្អាកការអនុគ្រោះពន្ធសម្រាប់កម្ពុជា ក្នុងការនាំផលិតផលនិងទំនិញចូលទៅកាន់ទីផ្សារអឺរ៉ុប។
ទាក់ទងបញ្ហាខាងលើ លោក ប៉ាវ ស៊ីណា ប្រធានសហជីពចលនាកម្មករ ធ្លាប់លើកឡើងថា បណ្ដារោងចក្រមួយចំនួននៅកម្ពុជា កំពុងរងការកាត់បន្ថយការបញ្ជារទិញបណ្ដើរៗពីសំណាក់ពីអ្នកបញ្ជាទិញ។ លោក ប៉ាវ ស៊ីណា ដែលទទួលដំណឹងនេះពីសមាជិកសហជីពរបស់ខ្លួន បានប្រាប់សារព័ត៌មានថ្មីៗកន្លងមកថា មូលហេតុដែលអ្នកបញ្ជារទិញ កាត់បន្ថយការទិញទំនិញពីកម្ពុជា ដោយសារការព្រមានដកការអនុគ្រោះពន្ធពីកម្ពុជា។
ប្រធានសហជីពចលនាកម្មកររូបនេះ អំពាវនាវឲ្យអ្នកនយោបាយដោះស្រាយបញ្ហារួមគ្នា ដើម្បីបញ្ចៀសការធ្លាក់ចុះសេដ្ឋកិច្ច។ លោក ក៏ស្នើដល់សហគមន៍អន្តរជាតិ កុំឲ្យយករឿងនយោបាយកម្ពុជា មកភ្ជាប់ការអនុគ្រោះពន្ធសេដ្ឋកិច្ច៕
Tag:
Walmart
កាត់ដេរ
Textile
វាយនភណ្ឌ
© រក្សាសិទ្ធិដោយ thmeythmey.com