ពីនេះ ពីនោះ
ត្រីគល់រាំង ក្រោយពីបំពាក់ស្លាកសញ្ញា ត្រូវបានគម្រោងអច្ឆរិយភាពនៃទន្លេមេគង្គ លែងចូលទៅក្នុងធម្មជាតិវិញ លោកថាច ផាណារ៉ា ប្រធានមន្ទីរពីសោធន៍វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប និងលោក ណេន ផាណា ប្រធានការិយាល័យផ្សព្វផ្សាយវារីវប្បកម្ម នៃវិទ្យាស្ថានស្រាវជ្រាវវារីវប្បកម្ម សម្តេច តេជោ ហ៊ុន សែន ក្នុងសកម្មភាពបំពាក់ស្លាកសញ្ញាដល់ត្រីគល់រាំងមុននឹងលែងចូលធម្មជាតិវិញ
× នេះជាសកម្មភាព បំពាក់ស្លាកសញ្ញាដល់ត្រីគល់រាំង ដែលមានឈ្មោះវិទ្យាសាស្ត្រ Catlocarpio siamensis និងឈ្មោះជាភាសាអង់គ្លេស Giant barb មុនលែងចូលទៅក្នុងធម្មជាតិវិញ របស់គម្រោងអច្ឆរិយភាពនៃទន្លេមេគង្គ។ នេះជាកិច្ចសហប្រតិបត្តិការរវាងគម្រោងជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល។
នៅក្នុងការសិក្សាស្រាវជ្រាវ និងអភិរក្សប្រភេទត្រីជិតផុតពូជរបស់ខ្លួន គម្រោងអច្ឆរិយភាពនៃទន្លេមេគង្គ បានប្រមូលកូនត្រីពីធម្មជាតិ យកមកថែបំប៉ននៅក្នុងស្ថានីយ៍ស្រាវជ្រាវ និងផលិតកូនត្រីពូជ បាទី ដែលមានទីតាំងស្ថិតនៅស្រុកពាមរក៍ ខេត្តព្រៃវែង របស់រដ្ឋបាលជលផល។ ក្នុងគោលបំណងដើម្បីឲ្យចំនួនត្រីក្នុងធម្មជាតិកើនឡើងវិញ គម្រោងមានគោលដៅថែរក្សាកូនត្រីតូចៗ ដែលជាប្រភេទត្រីជិតផុតពូជ រហូតដល់វាមានសុខភាពល្អ និងធំល្មម បន្ទាប់មក គេក៏ព្រលែងវាចូលទៅក្នុងទន្លេវិញ ដោយមានបំពាក់សា្លកសញ្ញាសម្គាល់ដើម្បីតាមដានផងដែរ។ ក្នុងនោះ គម្រោងក៏រក្សាទុកមួយចំនួនផងដែរ សម្រាប់ធ្វើមេពូជ។ ក្រៅពីត្រីគល់រាំង ក៏មានត្រីរាជ ដែលមានឈ្មោះវិទ្យាសាស្ត្រ Pangasianodon gigas ឈ្មោះជាភាសាអង់គ្លេស Mekong giant catfish និងត្រីជិតផុតពូជមួយចំនួនទៀតផងដែរ។
លោក ណេន ផាណា ប្រធានការិយាល័យផ្សព្វផ្សាយវារីវប្បកម្ម នៃវិទ្យាស្ថានស្រាវជ្រាវវារីវប្បកម្ម សម្តេច តេជោ ហ៊ុន សែន និង លោក បណ្ឌិត ហ្សេប ហូហ្គេន ប្រធានគម្រោងអច្ឆរិយភាពនៃទន្លេមេគង្គ កំពុងរៀបចំបំពាក់ស្លាកសញ្ញា និងថ្លឹងទម្ងន់ត្រីគល់រាំងមុននឹងលែងចូលធម្មជាតិវិញ
ការនេសាទហួសកម្រិតក្នុងពេលបច្ចុប្បន្ន និងទៅអនាកត ការប្រើប្រាស់ឧបករណ៍នេសាទល្មើសច្បាប់ផ្សេងៗ ជាពិសេស ឧបករណ៍ឆក់ ការបាត់បង់ទីជម្រក និងការកសាងទំនប់វារីអគ្គិសនី បានធ្វើឲ្យប៉ះពាល់យ៉ាងធ្ងន់ធ្ងរដល់កំណើនត្រី ជាពិសេសត្រីធំៗ ដែលមានរស់នៅច្រើនក្នុងប្រព័ន្ធទន្លេមេគង្គ។ ការកាប់ការដុតបំផ្លាញព្រៃលិចទឹក ដើម្បីទន្ទ្រានយកដីធ្វើជាកម្មសិទ្ធ ជាទង្វើនៃការបំផ្លាញទីជម្រករបស់មច្ឆជាតិ នៅក្នុងធម្មជាតិ។
(អត្ថបទ និងរូបភាពៈ Chhut Chheana / USAID Wonders of the Mekong).
© រក្សាសិទ្ធិដោយ thmeythmey.com