ឆ្នាំ២០១៧ អ្នកសេពគ្រឿងញៀន កើនឡើង២៦ភាគរយ

ជាតិ

ឆ្នាំ២០១៧ អ្នកសេពគ្រឿងញៀន កើនឡើង២៦ភាគរយ

05, Feb 2018 , 9:59 pm

រូបភាព

ដោយ:

ភ្នំពេញ៖ ក្នុងឆ្នាំ២០១៧ អ្នកញៀនគ្រឿងញៀន មានចំនួន ១៤៧៨២នាក់ ដែលទទួលការព្យាបាល នៅតាមមូលដ្ឋានសុខាភិបាលសាធារណៈ និងមណ្ឌលបណ្ដោះអាសន្ន។ នេះបើតាមរបាយការណ៍ ពីគណៈកម្មាធិការទទួលបន្ទុកការព្យាបាល និងស្ដារនីតិសម្បទាអ្នកញៀនគ្រឿងញៀន ដែលត្រូវបានផ្សាព្វផ្សាយ ក្នុងសន្និបាតបូកសរុបលទ្ធផលការងារត្រួតពិនិត្យអ្នកញៀនគ្រឿងញៀនឆ្នាំ២១៧ ដែលរៀបចំឡើងនៅថ្ងៃទី៥ ខែកុម្ភៈ ឆ្នាំ២០១៨។

របាយការណ៍ខាងលើ បានឲ្យដឹងថា អ្នកញៀនគ្រឿងញៀន បានកើនឡើង៣១០១នាក់ ដែលស្មើនឹង២៦ភាគរយ បើប្រៀបធៀបនឹងឆ្នាំ២0១៦។ បើតាមរបាយការណ៍ដដែល គណៈកម្មាធិការទទួលបន្ទុកការព្យាបាល និងស្ដារនីតិសម្បទាអ្នកញៀនគ្រឿងញៀន នឹងលើកទិសដៅបន្ត ដោយយកចិត្តទុកដាក់លើការងារអាទិភាពមួយចំនួន មានដូចជា ការពង្រឹងគុណភាពនិងសេវាសម្រាប់ព្យាបាលអ្នកញៀនគ្រឿងញៀន នៅតាមសហគមន៍និងមូលដ្ឋានសុខាភិបាល រួមទាំងការអប់រំ និងការផ្សព្វផ្សាយស្តីពីផលប៉ះពាល់នៃគ្រឿងញៀន ដល់ប្រជាពលរដ្ឋ ជាដើម។

កិច្ចប្រជុំបូកសរុបការងារប្រចាំឆ្នាំ របស់គណៈកម្មាធិការទទួលបន្ទុកការព្យាបាល និងស្ដារនីតិសម្បទា ដែលធ្វើឡើងកាលពីដើមខែធ្នូ ឆ្នាំ២០១៧ កន្លងនៅ បានឲ្យដឹងថា បច្ចុប្បន្ន នៅទូទាំងប្រទេសកម្ពុជា មានមណ្ឌលបណ្ដោះអាសន្នរបស់រដ្ឋ និងឯកជនមានចំនួន១៦កន្លែង សម្រាប់ព្យាបាលអ្នកញៀនគ្រឿងញៀន។ ជាមួយគ្នាដែរ នៅឆ្នាំ២០១៧ ក្រសួងសុខាភិបាល បានពង្រីកសេវាព្យាបាលជំងឺផ្លូវចិត្ត និងការបំពានគ្រៀងញៀន នៅក្នុងមូលដ្ឋានចំនួន ៤១៩កន្លែង តាមបណ្តារាជធានី ខេត្តនានាក្នុងប្រទេសកម្ពុជា។

រីឯ គណៈកម្មការសម្បសម្រួលឃុំ សង្កាត់ សម្រាប់ការព្យាបាលអ្នកញៀនគ្រឿងញៀន មានតែ៥ខេត្តបណ្ណោះ ក្នុងនោះមានខេត្ត បន្ទាយមានជ័យ ស្ទឹងត្រែង កំពង់ស្ពឺ ឧត្តរមានជ័យ និងកំពង់ចាម៕