កីឡាជាតិ
ជាតិ
ប្រធាន FIFA លោក Gianni Infantino មកដឹកនាំកិច្ចប្រជុំបាល់ទាត់នៅភ្នំពេញ ប្រធាន FIFA លោក Gianni Infantino (ឆ្វេង) និងលោក ខៀវ សាម៉េត អនុប្រធាន FFC នាកិច្ចប្រជុំ FIFA Executive Football Summit នៅសិង្ហបុរី
× រាជធានីភ្នំពេញ ត្រូវបានជ្រើសរើសជាទីតាំងនៃកិច្ចប្រជុំប្រតិបត្តិបាល់ទាត់ជាស៊េរីរបស់ សហព័ន្ធកីឡា បាល់ទាត់អន្តរជាតិ (FIFA Executive Football Summit of the 2017/2018 Series)។ ប្រធាន FIFA លោក Gianni Infantino នឹងដឹកនាំកិច្ចប្រជុំនេះផ្ទាល់នាថ្ងៃទី៩ ខែកុម្ភៈ នៅសណ្ឋាគារសូហ្វីតែលភ្នំពេញ។ នេះបើតាមការអះអាងរបស់លោក ម៉ៃ តុលា អគ្គលេខាធិការស្តីទីសហព័ន្ធកីឡាបាល់ទាត់កម្ពុជា (FFC)។
លោក Gianni Infantino នឹងមកកាន់ទឹកដីកម្ពុជាជាលើកដំបូង បន្ទាប់ពីលោកបានកាន់តំណែងជាប្រធានសហព័ន្ធកីឡាបាល់ទាត់អន្តរជាតិ (FIFA) ចាប់តាំងពីថ្ងៃទី២៦ ខែកុម្ភៈ ឆ្នាំ២០១៦ មេស្ថាប័នបាល់ទាត់កំពូលវ័យ៤៧ឆ្នាំរូបនេះ ត្រូវដឹកនាំកិច្ចប្រជុំ កិច្ច FIFA Executive Football Summit of the 2017/2018 Series ដែលលោកបានផ្តួចផ្តើមដោយផ្ទាល់។
FIFA Executive Football Summit គឺជាកិច្ចប្រជុំដែលត្រូវបានរៀបចំឡើងជាស៊េរីនៅតាមបណ្តារដ្ឋមួយចំនួនដែលជាសមាជិករបស់ FIFA។ កិច្ចប្រជុំប្រព្រឹត្តទៅនៅ១២កន្លែងផ្សេងៗគ្នា ចន្លោះខែវិច្ឆិកា ឆ្នាំ២០១៧ ដល់ខែមីនា ឆ្នាំ២០១៨ ។
ក្នុងកិច្ចប្រជុំ ថ្នាក់ដឹកនាំ FIFA លើកទឹកចិត្តដល់សមាជិករបស់ខ្លួន បង្ហាញពីគំនិតផ្តួចផ្តើមជាគន្លឹះលើការអភិវឌ្ឍន៍ និងកែទម្រង់ក្នុងវិស័យបាល់ទាត់ ក៏ដូចជាការផ្លាស់ប្តូរ បទពិសោធន៍ និងមតិយោបល់គ្នា។
លោក ម៉ែ តុលា បានអះអាងប្រាប់សារព័ត៌មានថ្មីៗថា លោក Gianni Infantino ដែលមានសញ្ជាតិស្វីស -អ៊ីតាលី មកដល់កម្ពុជានាថ្ងៃទី៨ ខែកុម្ភៈ។ អគ្គលេខាធិការស្តីទី FFC មិនបានបញ្ជាក់ព័ត៌មានលំអិតបន្ថែមទៀតឡើយ ដោយលោកលើកឡើងថា FIFA ទទួលបន្ទុករៀបចំទាំងអស់ ហើយរាជធានីគ្រាន់តែជាទីតាំងមួយនៃកិច្ចប្រជុំប៉ុណ្ណោះ។
FIFA Executive Football Summit ជាស៊េរី ចាប់ផ្តើមពីថ្ងៃទី២១ ខែវិច្ឆិកា ឆ្នាំ២០១៧ នៅក្រុងបាគូ ប្រទេសអាស៊ែបៃហ្សង់ ហើយកិច្ចប្រជុំចុងក្រោយ គ្រោងរៀបចំនៅក្រុងលីម៉ា ប្រទេសប៉េរូ នាខែមីនា ឆ្នាំ២០១៨ ។
យោងតាមគេហទំព័ររបស់ FIFA កិច្ចប្រជុំនៅឆ្នាំនេះ ផ្តោតជាពិសេសលើការអភិវឌ្ឈន៍បាល់ទាត់យុវជន និងនារី។ មតិយោបល់ និងខ្លឹមសារសំខាន់ៗ នឹងលើកយកទៅបង្ហាញនាកិច្ចប្រជុំក្រុមប្រឹក្សា FIFA និងសមាជ FIFA ផងដែរ៕
Tag:
FIFA
បាល់ទាត់
Gianni Infantino
© រក្សាសិទ្ធិដោយ thmeythmey.com