ជាតិ
សង្គមជាតិ
សម្ដេច ហ៊ុន សែន បន្តព្រមានដកតំណែងមន្ត្រី ចំពោះវត្តមានរថយន្តតទ្រុង
× ភ្នំពេញ៖ កាលពីថ្ងៃទី ៩ កុម្ភៈកន្លងទៅ ប្រមុខរដ្ឋាភិបាលកម្ពុជា សម្ដេច ហ៊ុន សែន បានព្រមានដកអភិបាលរាជធានី-ខេត្ត ដោយសារបញ្ហារថយន្តតទ្រុងសណ្ដោង។ ក្រោយពីមានការព្រមានបែបនេះ អាជ្ញាធរពាក់ព័ន្ធគ្រប់លំដាប់ថ្នាក់បានចុះអន្តរាគមន៍តាមប្រសាសន៍របស់សម្ដេច។ បើតាមសម្ដេច ហ៊ុន សែន របាយការណ៍ជំហានដំបូង គឺរថយន្ត ៨១គ្រឿង ត្រូវបានកាត់ទ្រុងចេញ, ៧៦គ្រឿង ដោះទ្រុងសណ្តោងចេញ និង ៣១០គ្រឿងទៀតកំពុងត្រៀមកាត់ទ្រុងចេញ។
បើតាមទំព័រហ្វេសប៊ុកផ្លូវការរបស់សម្តេច ហ៊ុន សែន របាយការណ៍ជំហានដំបូងបង្ហាញថា មានរថយន្តកែច្នៃដាក់ទ្រុងសណ្តាងធំៗខុសបច្ចេកទេសចំនួន ៨១គ្រឿងដែលបានកាត់ទ្រុងចេញ និងរថយន្តចំនួន ៧៦គ្រឿងត្រូវបានដោះទ្រុងសណ្តោងចេញ។ ដោយឡែក រថយន្តចំនួន ៣១០គ្រឿងទៀត កំពុងត្រៀមកាត់ទ្រុងចេញ។
បន្ទាប់ពីអាជ្ញាធរពាក់ព័ន្ធចុះអន្តរាគមន៍លើបញ្ហានេះ សម្ដេច ហ៊ុន សែន ក៏បានសរសេរសារអរគុណយ៉ាងដូច្នេះ៖ «ខ្ញុំសូមអរគុណក្រសួងសាធារណការនិងដឹកជញ្ជូន គណកម្មាធិការជាតិសុវត្ថិភាពចរាចរណ៍ផ្លូវគោក អាជ្ញាធរ និងសមត្ថកិច្ចគ្រប់ជាន់ថ្នាក់ ដែលកំពុងពង្រឹងការអនុវត្តន៍ច្បាប់ចរាចរណ៍ និងត្រួតពិនិត្យយានយន្តកៃច្នៃខុសលក្ខណៈបច្ចេកទេសនៅទូទាំងប្រទេស ដើម្បីទប់ស្កាត់ការដឹកទំនិញលើស ទម្ងន់កំណត់ដោយច្បាប់ ដែលបង្កអោយខូចផ្លូវស្ពាន និងបង្កគ្រោះថ្នាក់ផ្សេងៗដល់អាយុជីវិតបងប្អូនប្រជាពលរដ្ឋ»។
សាររបស់សម្ដេចខាងលើ ក៏បានបញ្ជាក់ទៀតថា៖ «ចំពោះរថយន្តតទ្រុង និងកាត់តកែច្នៃទាំងអស់ បើឃើញមានបើកបរនៅខេត្តណា ឬស្រុកណា គឺត្រូវចាប់ទុកទាំងអស់។ ទាំងរដ្ឋមន្ត្រី ទាំងចៅហ្វាយខេត្ត ចៅហ្វាយខណ្ឌ ទាំងចៅហ្វាយស្រុក គឺត្រូវទទួលខុសត្រូវ។ បើមិនចាត់វិធានការទេ គឺប្រឈមនឹងការដកតួនាទីមុខតំណែង»។
សម្ដេច ក៏អនុញ្ញាតឲ្យពលរដ្ឋចូលបញ្ចេញយោបល់ (Comment) ចូលក្នុងទំព័រ Facebook របស់សម្ដេចផងដែរចំពោះបញ្ហារថយន្តតតទ្រុងនេះ។ សម្ដេច ហ៊ុន សែន លើកឡើងដូច្នេះ៖ «ជនរួមជាតិអាចចូលមកផ្ញើសារ ចូលក្នុង Facebook ខ្ញុំ។ ពេលនេះខ្ញុំនឹងចាត់វិធានការដោយខ្លួនឯង បើមន្ត្រីពាក់ព័ន្ឋទាំងនោះមិនអនុវត្តន៍»៕
Tag:
រថយន្តតទ្រុង
ហ៊ុន សែន
© រក្សាសិទ្ធិដោយ thmeythmey.com