ជាតិ
មាត្រាថ្មី ដែលដាក់ទោសអ្នកប្រមាថព្រះមហាក្សត្រ ឲ្យជាប់ពន្ធនាគារពី ១ ទៅ ៥ឆ្នាំ ត្រូវបានសភាអនុម័ត សម្តេចក្រុមព្រះនរោត្តម រណឫទ្ធី ប្រធានគណបក្សហ៊្វុនស៊ិនប៉ិច ចូលរួមក្នុងកិច្ចប្រជុំពេញអង្គនៃរដ្ឋសភា នៅព្រឹកថ្ងៃទី១៤ ខែកុម្ភៈ ឆ្នាំ២0១៨
× ភ្នំពេញ៖ តាមរយៈកិច្ចប្រជុំពេញអង្គនៃរដ្ឋសភា នៅព្រឹកថ្ងៃទី១៤ ខែកុម្ភៈ ឆ្នាំ២0១៨នេះ តំណាងរាស្ត្រទាំង១២៣រូប មកពីគណបក្សទាំង៤ បានអនុម័តមាត្រាថ្មី នៃក្រមព្រហ្មទណ្ឌ ដើម្បីដាក់ទោសរូបវន្តបុគ្គល និងនីតិបុគ្គល ដែលប្រមាថព្រះមហាក្សត្រ។
មាត្រាថ្មីនេះ ដែលទើបនឹងតាក់តែង ដើម្បីបញ្ចូលទៅក្នុងក្រមព្រហ្មទណ្ឌ បានចែងថា បុគ្គលណា (រូបវន្តបុគ្គល) ប្រមាថព្រះមហាក្សត្រ នឹងត្រូវផ្តន្ទាទោសឲ្យជាប់ពន្ធនាគារពី ១ ទៅ ៥ឆ្នាំ និងពិន័យជាប្រាក់ពី ២លានរៀល ទៅ១0លានរៀល។ រីឯ នីតីបុគ្គល ដែលសំដៅលើអង្គភាព ស្ថាប័ន អង្គការ ឬក្រុមហ៊ុន ជាដើម អាចនឹងត្រូវពិន័យជាប្រាក់ពី ១០លានរៀល ទៅ៥០លានរៀល ព្រមទាំងទោសផ្សេងៗទៀត ក្នុងករណីប្រមាថព្រះមហាក្សត្រ។
យ៉ាងណាក៏ដោយ មាត្រាថ្មីខាងលើ នឹងក្លាយជាច្បាប់ ហើយដាក់ឲ្យអនុវត្តទៅបាន លុះត្រាតែ ព្រះមហាក្សត្រ ចេញព្រះរាជក្រម ប្រកាសឲ្យប្រើប្រាស់ជាមុនសិន។
រដ្ឋធម្មនុញ្ញកម្ពុជា បានចែងថា ព្រះមហាក្សត្រ ជាព្រះប្រមុខរដ្ឋមួយជីវិត ដោយមិនអាចនរណា រំលោភបំពានបានឡើយ៕
Tag:
ព្រះមហាក្សត្រ
ច្បាប់
© រក្សាសិទ្ធិដោយ thmeythmey.com