ចូលឆ្នាំចិន៖ ទេសចរជាង៣៧ម៉ឺននាក់ទៅកម្សាន្ត នៅខេត្តជាប់ឆ្នេរសមុទ្រ

ជាតិ

សេដ្ឋកិច្ច

ចូលឆ្នាំចិន៖ ទេសចរជាង៣៧ម៉ឺននាក់ទៅកម្សាន្ត នៅខេត្តជាប់ឆ្នេរសមុទ្រ

19, Feb 2018 , 7:19 pm

រូបភាព

ដោយ:

រយៈពេល៤ថ្ងៃ នៃឱកាសបុណ្យចូលឆ្នាំចិន-វៀតណាមកន្លងទៅ បណ្តាខេត្តជាប់ឆ្នេរសមុទ្រទាំង៤របស់កម្ពុជា ទទួលបានទេសចរជាតិ និងអន្តរជាតិ ជាង៣៧ម៉ឺននាក់។ ក្នុងនោះ ខេត្តព្រះសីហុមានភ្ញៀវទេសចរទៅកម្សាន្តជាង៨ម៉ឺននាក់ ខេត្តកែបជាង១០ម៉ឺននាក់ កោះកុងជាង ៥ម៉ឺននាក់ និងខេត្តកំពតជាង ១០ម៉ឺននាក់។

យោងតាមរបាយការណ៍ទេសចរណ៍ ពីមន្ទីរទេសចរណ៍នៃបណ្តាខេត្តជាប់ឆ្នេរសមុទ្ររបស់កម្ពុជា មានទេសចរជាតិ និងអន្តរជាតិជាង៣៧ម៉ឺន បានទៅកម្សាន្តតាមតំបន់ឆ្នេរសមុទ្រ តំបន់កោះ និងតាមរមណីយដ្ឋានធម្មជាតិនានា។

លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ ដែលស្រង់សម្ដីដោយ នគរបាលជាតិ បានឲ្យដឹងថា ខេត្តព្រះសីហនុ ទទួលបានភ្ញៀវទេសចរប្រមាណ ៨៨,០០០នាក់ កើនឡើង ៦.៥០ភាគរយ ធៀបនឹងឆ្នាំ២០១៧ ។

ចំណែកឯខេត្តកែបវិញ ទទួលបានទេសចរជាតិ និងអន្តរជាតិសរុបជាង ១០ម៉ឺននាក់ និងកើនឡើងជាង៦ភាគរយដែរ ខណៈខេត្តកំពត មានភ្ញៀវទេសចរទៅកម្សាន្តជាង១២ម៉ឺននាក់ កើនឡើងជាង៥០ភាគរយ ធៀបនឹងឆ្នាំ២០១៧ ។

ដោយឡែកខេត្តកោះកុង ក៏ទាក់ទាញបានភ្ញៀវទេសចរជាតិ និងអន្តរជាតិទៅកម្សាន្តយ៉ាងកុះករដែរ នាឱកាសបុណ្យចូលឆ្នាំចិន-វៀតណាមនេះ គឺប្រមាណ ៥៤,០០០នាក់។ នេះបើតាម លោក ប៊ុន បៀវ ប្រធានមន្ទីរទេសចរណ៍ខេត្តកោះកុង ដែលបានប្រាប់សារព័ត៌មានថ្មីៗតាមទូរសព្ទ៕