ប្អូនប្រុសលោក កែម ឡី បង្កើតបក្សថ្មី ដើម្បីចូលរួមការបោះឆ្នោតឆ្នាំ២0១៨

ជាតិ

នយោបាយជាតិ

ប្អូនប្រុសលោក កែម ឡី បង្កើតបក្សថ្មី ដើម្បីចូលរួមការបោះឆ្នោតឆ្នាំ២0១៨

24, Feb 2018 , 12:27 pm

រូបភាព

ដោយ: ម៉ៅ សុផា

ភ្នំពេញ៖ លោក កែម រិទ្ធិសិត ប្អូនប្រុសបង្កើតរបស់លោកបណ្ឌិត កែម ឡី បានប្រកាសបង្កើតគណបក្សផ្ទាល់ខ្លួន ដោយដាក់ឈ្មោះថា «គណបក្ស កែម ឡី»។ តាមរយៈសេចក្តីប្រកាសព័ត៌មាន ដែលចុះនៅថ្ងៃទី២៤ ខែកុម្ភៈ ឆ្នាំ២0១៨នេះ លោក កែម រិទ្ធិសិត បញ្ជាក់ថា៖«ការបង្កើត គណបក្ស កែម ឡី គឺមានគោលបំណងយកទស្សនទានល្អៗ របស់លោកបណ្ឌិត កែម ឡី ទៅបន្តចូលរួមចំណែកក្នុងការអភិវឌ្ឍប្រទេសជាតិយើង»។

បន្ថែមពីលើសេចក្តីប្រកាសព័ត៌មាន លោក កែម រិទ្ធិសិត បានប្រាប់សារព័ត៌មានថ្មីៗ តាមទូរសព្ទថា បច្ចុប្បន្ន ការបង្កើតគណបក្សនេះ កំពុងស្ថិតក្នុងគម្រោង ដោយមិនទាន់បានរៀបចំគោលនយោបាយ លក្ខន្តិកៈ រចនាសម្ព័ននៃថ្នាក់ដឹកនាំ និងបែបបទគតិយុត្តិ ដែលត្រូវបញ្ជូនទៅក្រសួងមហាផ្ទៃនៅឡើយទេ។ លោក លើកឡើងថា លោក និងក្រុមការងារត្រូវការពេលវេលាប្រហែលជា១ខែទៀត ក្នុងការរៀបចំកិច្ចការទាំងនេះ ហើយបន្ទាប់មកទើបដាក់សំណើទៅក្រសួងមហាផ្ទៃ ដើម្បីសុំដំណើរការគណបក្សជាផ្លូវការ និងត្រៀមចូលរួមការបោះឆ្នោតថ្នាក់ជាតិ នៅខែកក្កដា ឆ្នាំ២0១៨។

លោក កែម រិទ្ធិសិត អះអាងថា លោក នឹងធ្វើជាប្រធានគណបក្សនេះ។ លោក បញ្ជាក់ដូច្នេះថា៖«ការបង្កើតគណបក្សហ្នឹងឡើង គឺអត់មានគណបក្សកាន់អំណាចឬគណបក្សប្រឆាំងណា នៅពីក្រោយខ្ញុំទេ។ នេះជាឆន្ទៈរបស់ខ្ញុំផ្ទាល់ រួមជាមួយយុវជនមួយចំនួន ដែលស្រឡាញ់និងគាំទ្រលោកបណ្ឌិត កែម ឡី»។

លោក កែម រិទ្ធិសិត បន្ថែមថា ដោយសារតែគុណតម្លៃនៃទស្សនទាននិងប្រជាប្រិយភាពរបស់បងប្រុស គណបក្សនេះ អាចនឹងទទួលបានការគាំទ្រពីប្រជាពលរដ្ឋ។ យ៉ាងណាក៏ដោយ លោក មិនរំពឹងខ្លាំងនោះទេ ចំពោះការគាំទ្រនេះ ដោយលោក អះអាងថា រង់ចាំមើលសភាពការណ៍ ក្រោយពីគណបក្ស លេចចេញជារូបរាងជាក់ស្តែងសិន។

លោក កែម រិទ្ធិសិត ប្អូនប្រុសបង្កើតរបស់លោក កែម ឡី

លោក កែម ឡី ជាអ្នកស្រាវជ្រាវផ្នែកការអភិវឌ្ឍសង្គម និងជាអ្នកវិភាគនយោបាយដ៏ល្បីល្បាញនៅកម្ពុជា។ លោក ត្រូវបានបាញ់សម្លាប់ នៅក្នុងស្តាម៉ាតមួយកន្លែង ស្ថិតនៅម្តុំស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦។

កាលពីអំឡុងខែមីនា ឆ្នាំ២0១៧ លោក អឿត អាង ហៅជួប សម្លាប់ ត្រូវបានកាត់ទោសឲ្យជាប់ពន្ធនាគារអស់មួយជីវិត ដោយរងការចោទប្រកាន់ថា បានបាញ់សម្លាប់លោក កែម ឡី។ យ៉ាងណាក៏ដោយ លោកស្រី ប៊ូ រចនា ដែលជាភរិយារបស់លោក កែម ឡី រួមទាំងសហគមន៍អន្តរជាតិមួយចំនួន ហាក់មិនសូវជឿនោះទេថា ជួប សម្លាប់ ពិតជាឃាតក។ ពួកគេ នៅតែចង់ឲ្យសមត្ថកិច្ចបន្តស្វែងរកអ្នកជាប់ពាក់ព័ន្ធផ្សេងទៀត។

បច្ចុប្បន្ន លោកស្រី ប៊ូ រចនា រួមទាំងកូនប្រុសទាំង៥នាក់ បានទៅរស់នៅឯប្រទេសអូស្ត្រាលីហើយ៕