អន្តរជាតិ
គ្រូជាង២០០០នាក់នៅអង់គ្លេស បើកដៃឲ្យសិស្សលួចចម្លងពេលប្រឡង រូបថត Daily Mirrior
× គ្រូបង្រៀនជាង២០០០នាក់គឺជាដៃគូសហការដ៏រីករាយរបស់សិស្សមួយចំនួន ដែលចូលចិត្តលួចចម្លងសំណៅឯកសារនៅពេលប្រឡង។ នេះបើតាមរបាយការណ៍អង្កេតរបស់ OCR (Oxford Cambridge and RSA) ដែលក្រុមប្រឹក្សាឯករាជ្យតាមដានការប្រឡងក្នុងគ្រឹះស្ថានសិក្សាធំៗនៅចក្រភពអង់គ្លេស ។
ចន្លោះពីឆ្នាំ២០១២ ដល់ឆ្នាំ២០១៦ គ្រូបង្រៀនចំនួន២៣០០នាក់ ជាប់ពាក់ព័ន្ធនឹងការបើកដៃឲ្យសិស្សលួចចម្លងសំណៅឯកសារនៅពេលប្រឡង។ OCR ដែលជាក្រុមប្រឹក្សាវាយតម្លៃវិស័យអប់រំ ដ៏មាន ឥទ្ធិពលនៅអង់គ្លេស វេលស៍ និងអៀរឡង់ខាងជើង។
តាមទិន្នន័យដែលផ្តល់ឲ្យកាសែត Sunday Times ក្រុមប្រឹក្សា OCR បានអះអាងថា គ្រូបង្រៀនជាងពាក់កណ្តាល សុទ្ធតែមានគំនិតធ្វើជាជំនួយការមិនស្របច្បាប់របស់សិស្សនៅពេលប្រឡង។ ក្នុងចំណោម ការលួចចម្លង ៣៦០៣ករណីចន្លោះពីឆ្នាំ២០១២ ដល់ឆ្នាំ២០១៦ មានការចូលរួមពីគ្រូរហូតដល់ទៅ២៣០០នាក់។
ទិន្នន័យបានបង្ហាញផងដែរថា គ្រូបង្រៀនចំនួន៨១នាក់ បានរងការព្រមាន ១១៣នាក់ ត្រូវទទួលការអប់រំបន្ថែម និង៨៣នាក់ ត្រូវបានព្យួរតួនាទីជាមេប្រយោគ។ ជាមួយគ្នានេះ បេក្ខជនប្រមាណ១០០០នាក់ ត្រូវធ្លាក់មុខវិជ្ជាដែលខ្លួនបានលួចចម្លង ហើយ១៤នាក់ ធ្លាក់សញ្ញាបត្រដោយស្វ័យប្រវត្តិ។
OCR អំពាវនាវដល់ស្ថាប័នអប់រំរួមគ្នាដោះស្រាយបញ្ហានេះឲ្យបានឆាប់រហ័ស ជាពិសេសក្រោមកិច្ចសហការពីសំណាក់អាណាព្យាបាលសិស្ស។
លោក Alan Smithers សាស្ត្រាចារ្យម្នាក់នៅសាកលវិទ្យាល័យ Buckingham បាននិយាយប្រាប់ Sunday Times ថា ការលួចម្លងនៅពេលប្រឡង ប្រៀបដូចជាការប្រើប្រាស់សារធាតុនៅក្នុងការប្រកួតកីឡាយ៉ាងដូច្នោះដែរ គ្រូបង្រៀនដែលសហការប្រព្រឹត្តបែបនេះ ក៏ត្រូវរងការពិន័យធ្ងន់ធ្ងរផងដែរ៕
© រក្សាសិទ្ធិដោយ thmeythmey.com