សហភាពអឺរ៉ុប៖ ការបំបាត់បក្សប្រឆាំង ស្មើនឹងការបំបាត់ប្រជាធិបតេយ្យ

ជាតិ

សហភាពអឺរ៉ុប៖ ការបំបាត់បក្សប្រឆាំង ស្មើនឹងការបំបាត់ប្រជាធិបតេយ្យ

15, Mar 2018 , 9:59 pm

រូបភាព

សកម្មភាព ដែលសមត្ថកិច្ចដកផ្ទាំងគណបក្សសង្គ្រោះជាតិ។ រូបពីហ្វេសបុក Luon Sovath

ដោយ: ម៉ៅ សុផា

ភ្នំពេញ៖ សហភាពអឺរ៉ុប ចាត់ទុកការធ្វើទុក្ខបុកម្នេញលើក្រុមប្រឆាំង រហូតដល់រំលាយគណបក្សរបស់ពួកគេចោល ថាជាដើមទង ដែលរុញច្រានកម្ពុជា ឲ្យចាកឆ្ងាយពីប្រជាធិបតេយ្យ។ ភាគីបក្សកាន់អំណាច និយាយបញ្ច្រាស់ថា វិធានការលើក្រុមប្រឆាំង គឺដើម្បីពង្រឹងនីតិរដ្ឋ និងប្រជាធិបតេយ្យនៅកម្ពុជា។

សហភាពអឺរ៉ុប បានចេញសេចក្តីថ្លែងការណ៍ជាថ្មីម្តងទៀត ដោយបង្ហាញក្តីបារម្ភកាន់តែខ្លាំងជាងមុន ពីស្ថានភាពនយោបាយ និងការធ្លាក់ចុះនៃសិទ្ធិមនុស្សនៅកម្ពុជា។ សេចក្តីថ្លែងការណ៍នោះ ត្រូវបានតំណាងសហភាពអឺរ៉ុប យកទៅអាននៅក្នុងកិច្ចប្រជុំនៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅថ្ងៃទី១៤ ខែមីនា ឆ្នាំ២0១៨។

កិច្ចប្រជុំនៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នាឆ្នាំ២0១៨នេះ ត្រូវចំណាយពេលដល់ទៅ២៩ថ្ងៃ គឺចាប់ពីថ្ងៃទី២៦ ខែកុម្ភៈ ដល់ថ្ងៃទី២៣ ខែមីនា។ ស្ថានភាពសិទ្ធិមនុស្សនៅតាមប្រទេសនានា ដែលរួមទាំងកម្ពុជាផងនោះ ត្រូវបានសហភាពអឺរ៉ុប លើកយកទៅបរិយាយ នៅក្នុងកិច្ចប្រជុំខាងលើ។

តាមរយៈសេចក្តីថ្លែងការណ៍ សហភាពអឺរ៉ុប បានលើកឡើងថា ការបង្ក្រាបទៅលើគណបក្សសង្គ្រោះជាតិ សង្គមស៊ីវិល និងប្រព័ន្ធផ្សព្វផ្សាយ ជាមូលហេតុដែលធ្វើឲ្យប៉ះពាល់ប្រជាធិបតេយ្យនិងសិទ្ធិមនុស្ស។ សហភាពអឺរ៉ុប បានរម្លឹករដ្ឋាភិបាលកម្ពុជា ក៏ដូចជាបក្សកាន់អំណាច ឲ្យផ្លាស់ប្តូរឥរិយាបទឲ្យបានឆាប់រហ័ស ចំពោះការរំលាយគណបក្សសង្គ្រោះជាតិ ហើយទាមទារឲ្យថ្នាក់ដឹកនាំទាំងអស់របស់គណបក្សនេះ ធ្វើសកម្មភាពនយោបាយឡើងវិញ។ សហភាពអឺរ៉ុប ឆ្លៀតអំពាវនាវឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិជាបន្ទាន់។

សហភាពអឺរ៉ុប បានបញ្ជាក់ក្នុងសេចក្តីថ្លែងការណ៍យ៉ាងដូច្នេះថា៖«ការបំផ្លាញបក្សប្រឆាំង ជាការដើរចេញពីផ្លូវនៃលទ្ធិប្រជាធិបតេយ្យ ដែលបានបញ្ញត្តិក្នុងរដ្ឋធម្មនុញ្ញកម្ពុជា។ ដំណើរការបោះឆ្នោតនាពេលខាងមុខ ដែលបក្សប្រឆាំងដ៏ធំ ត្រូវបានដកចេញតាមអំពើចិត្ត មិនមែនជារឿងស្របច្បាប់នោះទេ»។

ក្រៅពីនេះ សហភាពអឺរ៉ុប ក៏រំពឹងទុកជាមុនផងដែរថា រដ្ឋាភិបាលកម្ពុជា នឹងអនុញ្ញាតឲ្យអង្គការសង្គមស៊ីវិល បំពេញតួនាទីឲ្យបានពេញលេញ និងស្របតាមលក្ខន្តិកៈរបស់ពួកគេ។

លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា នៅតែអះអាងដដែលថា ចំណាត់ការលើក្រុមប្រឆាំង គឺស្របតាមច្បាប់។ លោក បកស្រាយផ្ទុយពីសហភាពអឺរ៉ុបថា ចំណាត់ការទាំងនោះ ដើម្បីពង្រឹងនីតិរដ្ឋនិងប្រជាធិបតេយ្យនៅកម្ពុជា។ លោក បន្តថា កម្ពុជា មិនអាចដោះលែងលោក កឹម សុខា មិនអាចបើកផ្លូវឲ្យគណបក្សសង្គ្រោះជាតិ ធ្វើសកម្មភាពឡើងវិញ ហើយក៏មិនអាចផ្តល់សិទ្ធិនយោបាយឲ្យថ្នាក់ដឹកនាំនៃគណបក្សនេះដែរ។

អ្នកនាំពាក្យបក្សកាន់អំណាចរូបនេះ ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«ការលើកឡើងរបស់សហភាពអឺរ៉ុប គឺផ្ទុយពីការពិតនិងភាពជាក់ស្តែងនៅកម្ពុជា។ សហភាពអឺរ៉ុប មិនមែនជាចៅហ្វាយនាយរបស់កម្ពុជានិងប្រជាជនយើងទេ។ ប្រទេសយើង គឺឯករាជ្យ។ ដូច្នេះ សំណើរបស់សហភាពអឺរ៉ុប អត់មានប្រសិទ្ធភាពទេ។ យើង មិនអាចទទួលយកបានឡើយចំពោះសំណើបែបនេះ»។

ក្រោយគណបក្សសង្គ្រោះជាតិ ត្រូវបានរំលាយ ហើយលោក កឹម សុខា ត្រូវបានចាប់ខ្លួន សហភាពអឺរ៉ុប និងសហរដ្ឋអាមេរិក បានចេញមុខមាត់ខ្លាំងជាងគេ ក្នុងការប្រឈមុខដាក់រដ្ឋាភិបាលកម្ពុជា។ ប្រទេសធំៗទាំងពីរ បានដាក់ទណ្ឌកម្មផងនិងផ្តាច់ជំនួយផង ដើម្បីបង្ខំឲ្យរដ្ឋាភិបាលកម្ពុជា កែលម្អស្ថានភាពឡើងវិញ។

យ៉ាងណាក៏ដោយ វិធាការជាហូរហែរបស់សហភាពអឺរ៉ុបនិងសហរដ្ឋអាមេរិក នៅមិនទាន់មានឥទ្ធិពលមកលើរដ្ឋាភិបាលកម្ពុជា ឲ្យធ្វើតាមការចង់បានរបស់ពួកគេឡើយ។ រដ្ឋាភិបាលនិងបក្សកាន់អំណាច ថែមទាំងព្រមានត្រឡប់ទៅវិញថា បរទេសមិនអាចជ្រៀតជ្រែកចូលកិច្ចការផ្ទៃក្នុងរបស់កម្ពុជា ជាដាច់ខាត៕