អន្តរជាតិ
អ្នកនាំពាក្យ ៖ ការចាកចេញរបស់ហ្វីលីពីន គឺជាការចាប់ផ្តើមនៃទីបញ្ចប់របស់តុលាការព្រហ្មទណ្ឌអន្តរជាតិ
×![]()
រដ្ឋាភិបាលហ្វីលីពីនរបស់លោក រ៉ូឌ្រីហ្គោ ឌូទើតេ ទំនងជាមិនបកក្រោយឡើយ ក្រោយបញ្ជាឲ្យមានការបញ្ចប់សមាជិកភាពនៅក្នុងតុលាការព្រហ្មទណ្ឌអន្តរជាតិ (ICC) ។ ជាមួយនឹងការប្រកាសដកខ្លួនពីតុលាការអន្តរជាតិមួយនេះ រដ្ឋាភិបាលហ្វីលីពីន ថែមទាំងបានផ្ញើសារថា វាអាចជាការចាប់ផ្តើមនៃទីបញ្ចប់របស់តុលាការអន្តរជាតិនេះផងដែរ។
«ការបញ្ចប់សមាជិកភាពរបស់ហ្វីលីពីនក្នុងតុលាការព្រហ្មទណ្ឌអន្តរជាតិ អាចក្លាយជាការចាប់ផ្តើម នៃទីបញ្ចប់នៃស្ថាប័នហើយ ដ្បិតមានប្រទេសជាច្រើនទៀតនឹងធ្វើតាមហ្វីលីពីន ខណៈប្រទេសដែលមិនទាន់ក្លាយជាសមាជិក ក៏អស់ទំនុកចិត្តលែងចង់ចូលរួមជាមួយតុលាការនេះ » ។ នេះគឺជាសេចក្តីថ្លែងការណ៍របស់អ្នកនាំពាក្យហ្វីលីពីន Harry Roque នៅថ្ងៃ១៥ មីនា ដែលចុះផ្សាយដោយសារព័ត៌មាន Jakarta Globe ។
អ្នកនាំពាក្យបានលើកឡើងថា ការប្រកាសបើកការពិនិត្យ និងវិនិច្ឆ័យបឋមរបស់រដ្ឋអាជ្ញាតុលាការព្រហ្មទណ្ឌអន្តរជាតិ គឺជាការបំពានគោលការណ៍ជាមូលដ្ឋានមួយក្នុងនាមជាសមាជិក។ លោកមិនបញ្ជាក់ថា ការបំពារបំពាននោះសំដៅលើចំណុចណាមួយច្បាស់លាស់ឡើយ ។
ក៏ប៉ុន្តែ តាមសេចក្តីថ្លែងការណ៍របស់លោក ឌូទើតេ ដែលធ្វើឡើងមុនមួយថ្ងៃនៃសេចក្តីថ្លែងការណ៍នេះ បានអះអាងថា តុលាការនេះ និង អ្នករាយការណ៍សិទ្ធិមនុស្សពិសេសរបស់អង្គការសហប្រជាជាតិ អាចមានទំនាក់ទំនងសម្ងាត់ជាមួយនឹងគ្នា ហើយពួកគេ មានចេតនា ចោទប្រកាន់លោកតាមរយៈតុលាការដើម្បីធ្វើឲ្យលោក បាត់បង់កិត្តិយសនៅឆាកអន្តរជាតិ ។
អ្វីដែលគួរកត់សម្គាល់នោះ លោក Roque ដែលមេធាវី និងអ្នកប្រឹក្សារបស់លោក ឌូទើតេ ក៏បានថ្លែងទៅកាន់អ្នកសារព័ត៌មានយ៉ាងដូច្នេះថា៖« តុលាការព្រហ្មទណ្ឌអន្តរជាតិ បានបាត់សម្ព័ន្ធមិត្តដ៏រឹងមាំ (ហ្វីលីពីន) នៅក្នុងតំបន់អាស៊ីហើយ » ។ ហ្វីលីពីន បានក្លាយជាសមាជិករបស់តុលាការព្រហ្មទណ្ឌអន្តរជាតិ នៅឆ្នាំ ២០១១ ។
បើនិយាយនៅក្នុងក្របខណ្ឌអាស៊ាន មានតែប្រទេសពីរប៉ុណ្ណោះ ដែលជាសមាជិករបស់តុលាការព្រហ្មទណ្ឌអន្តរជាតិ ។ បើ់ហ្វីលីពីន ពិតជានឹងចាកចេញមែននោះ កម្ពុជា នឹងក្លាយជាប្រទេសតែមួយគត់ ដែលនៅស្មោះស្មគ្រ័ នឹងតុលាការមួយនេះ ៕
Tag:
ហ្វីលីពីន
ICC
អាស៊ាន
© រក្សាសិទ្ធិដោយ thmeythmey.com
