ក្រុមជម្រើសជាតិកម្ពុជាចេញទៅតាហ្ស៊ីគីស្ថានដើម្បីត្រៀមប៉ះអាហ្វហ្គានីស្ថាន

កីឡាជាតិ

ជាតិ

ក្រុមជម្រើសជាតិកម្ពុជាចេញទៅតាហ្ស៊ីគីស្ថានដើម្បីត្រៀមប៉ះអាហ្វហ្គានីស្ថាន

23, Mar 2018 , 4:04 pm

រូបភាព

ក្រុមកីឡាករជម្រើសជាតិកម្ពុជាត្រៀមចាកចេញពីអាកាសយានដ្ឋានអន្តរជាតិភ្នំពេញទៅប្រទេសតាហ្ស៊ីគីស្ថាន, រូបភាពពីហ្វេសប៊ុក FFC

ដោយ:

ក្រុមកីឡាករជម្រើសជាតិកម្ពុជាបានចាកចេញពីទឹកដីកម្ពុជាទៅកាន់ប្រទេសតាហ្ស៊ីគីស្ថាន កាលពីព្រឹកថ្ងៃទី២៣ មីនា ឆ្នាំ២០១៨ ដើម្បីត្រៀមប្រកួតបង្គ្រប់កិច្ចជាមួយក្រុមអាហ្វហ្គានីស្ថានសម្រាប់វគ្គជម្រុះ AFC Asian Cup 2019 នាថ្ងៃទី២៧ មីនា ខាងមុខ។ នៅមុនការចាកចេញរបស់ក្រុមកម្ពុជាលើកនេះ ពួកគេបានយកឈ្នះ១-០ លើក្រុមជម្រើសជាតិឡាវ។

លោក ប្រាក់ សុវណ្ណារ៉ា ត្រូវដឹកនាំក្រុមកីឡាករជម្រើសជាតិកម្ពុជាប្រកួតបង្គ្រប់ជាមួយក្រុមអាហ្វហ្គានីស្ថានសម្រាប់វគ្គជម្រុះពូល C ពានរង្វាន់ AFC Asian Cup 2019 នាថ្ងៃទី២៧ មីនា នៅកីឡដ្ឋាន Republican Central Stadium ក្នុងទីក្រុងឌូស្ហាន់បេ ប្រទេសតាហ្ស៊ីគីស្ថាន។ នាការប្រកួតជើងទី១កាលពីថ្ងៃទី១៣ មិថុនា ឆ្នាំ២០១៧ នៅពហុកីឡដ្ឋានជាតិ កម្ពុជាបានយកឈ្នះក្រុមអាហ្វហ្គានីស្ថានក្នុងលទ្ធផល ១-០ ដែលគ្រាប់បាល់ជ័យជម្នះនេះសម្រេចដោយកីឡាករ ប្រាក់ មុន្នីឧត្តម។

ដើម្បីត្រៀមប្រកួតបង្គ្រប់កិច្ចខាងលើ លោក ប្រាក់ សុវណ្ណារ៉ា បានដឹកនាំក្រុមគោព្រៃកម្ពុជាចាកចេញពីទឹកដីកំណើតទៅកាន់ប្រទេសតាហ្ស៊ីគីស្ថានកាលពីព្រឹកថ្ងៃទី២៣ ខែមីនា ឆ្នាំ២០១៨។ មុនចាកចេញលើកនេះ ក្រុមគោព្រៃកម្ពុជាទទួលបានកាដូលើកទឹកចិត្តដ៏ធំមួយតាមរយៈការយកឈ្នះក្រុមជម្រើសជាតិឡាវ ១-០ នាជំនួបមិត្តភាពអន្តរជាតិកាលពីថ្ងៃទី២១ មីនា ឆ្នាំ២០១៨ នៅទីក្រុងវៀងចន្ទន៍ប្រទេសឡាវ។

ខ្សែប្រយុទ្ធ ឃួន ឡាបូរ៉ាវី ដែលប្តូរចូលជំនួសកីឡាករ ចាន់ វឌ្ឍនាកា នៅ១០នាទីចុងក្រោយនៃវគ្គទី២ បានតែតបាល់បញ្ចូលទីយ៉ាងល្អក្រោមការបញ្ជូនរបស់ ប្រាក់ មុន្នីឧត្តម ដើម្បីបង្កើតកាដូលើកទឹកចិត្ត ក៏ដូចជាទុនសម្រាប់ក្រុមជម្រើសជាតិ៕