កីឡាអន្តរជាតិ
អន្តរជាតិ
ហ្វីលីពីនបានកៅអី AFC Asian Cup លើកដំបូងក្នុងប្រវត្តិសាស្ត្រ រូបភាពពី (ABS-CBN)
× ក្រុមកីឡាបាល់ទាត់ជម្រើសជាតិហ្វីលីពីនបានកក់កៅអីដើម្បីចូលរួមក្នុងព្រឹត្តិការណ៍ AFC Asian Cup 2019 ដែលអេមីរ៉ាតអារ៉ាប់រួមធ្វើជាម្ចាស់ផ្ទះ ក្រោយយកឈ្នះតាហ្ស៊ីគីស្ថាន ២-១ ក្នុងវគ្គជម្រុះ នាការប្រកួតនៅកីឡដ្ឋាន Rizal Memorial នៅថ្ងៃអង្គារទី ២៧ខែមីនាម្សិលមិញ។
ក្រោមក្រសែភ្នែកអ្នកគាំទ្រផ្ទាល់ជាង ៤៦០០នាក់ ហ្វីលីពីនមិនបានធ្វើឲ្យពួកគេខកចិត្តឡើយដោយអាចយកឈ្នះក្រុមភ្ញៀវ ក្នុងការប្រកួតវគ្គជម្រុះពូល F ពានរង្វាន់ AFC Asian Cup 2019។ ពីរគ្រាប់របស់ហ្វីលីពីនធ្វើបានដោយកីឡាករ Kevin Ingreso និងPhil Younghusband មុនការនាំមុខមុនរបស់តាហ្ស៊ីគីស្ថានពីសំណាក់កីឡាករ Akhtam Nazarov។
ជ័យជម្នះនេះបានធ្វើឲ្យហ្វីលីពីនស្ថិតនៅកំពូលតារាងដោយមាន១២ពិន្ទុ ក្រោយការប្រកួតទាំង៦លើក ឈ្នះ៣ ស្មើ៣ អាចមានសិទ្ធិទៅប្រកួតវគ្គផ្តាច់ព្រ័ត្រ AFC Asian Cup ឆ្នាំ២០១៩ ដែលធ្វើឡើងនៅប្រទេសអេមីរ៉ាតអារ៉ាប់រួម។ នេះគឺជាលើកទីមួយផងដែរសម្រាប់ក្រុមមកពីតំបន់អាស៊ានក្នុងប្រវត្តិសាស្ត្រកីឡាបាល់ទាត់របស់ហ្វីលីពីនសម្រាប់ពានរង្វាន់កីឡាបាល់ទាត់ទ្វីបអាស៊ីនេះ។
នៅក្នុងពូល F នេះដែរ ក្រៅពីហ្វីលីពីន ក៏មានក្រុមជម្រើសជាតិយេម៉ែនដែលបានកៅអី១ដែរក្នុងនាមក្រុមទទួលបានចំណាត់ថ្នាក់លេខ២។
ក្រុមដែលស្ថិតនៅតំបន់អាស៊ានដែលទទួលបានកៅអីទៅជុំផ្តាច់ព្រ័ត្រ AFC Asian Cup ឆ្នាំ២០១៩ គឺមានតែ៣ប្រទេសប៉ុណ្ណោះគឺ ថៃដែលឡើងតាំងពីវគ្គជម្រុះជុំទី១ វៀតណាមបានលេខ២ពូល C ហើយនិងហ្វីលីពីនលេខ១ពូល F។
ចំណែកក្រុមដ៏ទៃទៀតដែលបានសិទ្ធិឈានទៅប្រកួតពានរង្វាន់ខាងលើនេះរួមមាន ឥណ្ឌា កៀហ្ស៊ីស៊ីស្ថាន លីបង់ កូរ៉េខាងត្បូង ហ្សូកដានី អូម៉ង់ ប៉ាឡេស្ទីន បារ៉ែន និងតួកម៉េនីស្ថាន៕
Tag:
បាល់ទាត់
AFC Asian Cup 2019
ហ្វីលីពីន
© រក្សាសិទ្ធិដោយ thmeythmey.com