ជាតិ
នយោបាយជាតិ
ស្ថានទូតខ្លះប្រយ័ត្នប្រយែងចំពោះការអធិប្បាយលើស្ថានការណ៍នយោបាយចុងក្រោយរបស់កម្ពុជា
សម្តេច ហ៊ុន សែន និង លោក សម រង្ស៊ី នាជំនួបដោះស្រាយនយោបាយកាលពីពីរឆ្នាំមុន
×![]()
ដោយ: ថ្មីៗ
បំណងរបស់លោក សម រង្ស៊ី ដែលចង់បានការចរចានយោបាយត្រឡប់មកវិញ មិនបានផ្លែផ្កាឡើយ ប៉ុន្តែលោក សម រង្ស៊ី បានទទួលការវាយប្រហារពាក្យសំដីពីសម្តេច ហ៊ុន សែន ទៀតវិញ។ ស្ថានទូតមួយចំនួនក៏មិនអធិប្បាយលើសំណុំរឿងនយោបាយចុងក្រោយរបស់កម្ពុជានេះទៀត។
អតីតប្រធានគណបក្សសង្គ្រោះជាតិ លោក សម រង្ស៊ី បានបង្ហើបពីបំណងចរចានយោបាយជាមួយគណបក្សកាន់អំណាចនៃសម្តេចនាយករដ្ឋមន្ត្រី ហ៊ុន សែន។ តាមរយៈរលកធាតុអាកាសនៃវិទ្យុបារាំងអន្តរជាតិផ្សាយជាភាសាខ្មែរកាលពីថ្ងៃទី២៥ខែមីនា លោក សម រង្ស៊ី ដែលកំពុងរស់នៅនិរទេសខ្លួនពីដីកាស្ថាពរនៃតុលាការកម្ពុជាលើសំណុំក្តីក្តាំមួយចំនួន ក៏បានឆ្លៀតឱកាសនិយាយយកចំណេញពីដំណើរទស្សនកិច្ចនៃទីប្រឹក្សានាយករដ្ឋមន្ត្រីជប៉ុននៅកម្ពុជា និងពីសារសំខាន់នៃរដ្ឋាភិបាលក្រុងតូក្យូក្នុងដំណោះស្រាយនយោបាយរបស់កម្ពុជាដែរ។
ប្រមុខរដ្ឋាភិបាលកម្ពុជាមិនត្រឹមតែបានឆ្លើយតបជាអវិជ្ជមានទៅចំណុចទាំងពីរដែលលោក សម រង្ស៊ី បានលើកឡើងនោះឡើយ។ ការឆ្លើយតបរបស់បុរសខ្លាំងរបស់កម្ពុជា បានហៀរប៉ះដល់រឿងមួយចំនួនទៀតផង ដូចជា ការមិនបន្ធូរបន្ថយទោសដល់ទណ្ឌិតអតីតសមាជិកគណបក្សប្រឆាំងក្នុងពេលចូលឆ្នាំខ្មែរខាងមុខ បញ្ចប់ការប្រើទូរសព្ទរបស់លោក មាជ សុវណ្ណារ៉ា។
ពីវេទិកាចែកសញ្ញាបត្រដល់និស្សិតកាលពីព្រឹកថ្ងៃទី២៧ខែមីនា សម្តេច ហ៊ុន សែន បានផ្ញើសារទៅលោក សម រង្ស៊ី ដែលកំពុងរស់នៅប្រទេសបារាំងយ៉ាងដូច្នេះ៖«គ្មានការចរចាជាមួយពួកក្បត់ជាតិ។ គ្មានការចរចាជាមួយអ្នកឯងទេ អ្នកឯងកុំសង្ឃឹមថាមានដំណោះស្រាយ។ គ្មានបរទេសណាមកត្រួតក្បាល ហ៊ុន សែន បានទេ។ សុំនិយាយឲ្យច្បាស់!»។
ឆ្លើយតបមកសារព័ត៌មានថ្មីៗ ដែលស្នើសុំការអធិប្បាយលើសំណុំរឿងនយោបាយចុងក្រោយរបស់កម្ពុជានេះ ទាំងស្ថានទូតបារាំង និងស្ថានទូតសហរដ្ឋអាមេរិកប្រចាំកម្ពុជាថ្លែងថា ពួកគេ«មិនមានការអត្ថាធិប្បាយ»ឡើយ។
សារព័ត៌មានថ្មីៗក៏បានផ្ញើសំណួរទៅកាន់ប្រតិភូសហភាពអឺរ៉ុបប្រចាំកម្ពុជាដែរ។ លោក George Edgar ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជាមិនបានឆ្លើយចំសំណួរទេ ប៉ុន្តែបានផ្តល់ខ្លឹមសារនៃសេចក្តីថ្លែងការណ៍ និងការសម្រេចចិត្តកន្លងមកដែលបង្ហាញពីជំហររបស់សហភាពអឺរ៉ុបចំពោះកម្ពុជា។ ការឆ្លើយតបមួយរបស់លោកឯកអគ្គរដ្ឋទូត George Edgar មកសារព័ត៌មានថ្មីៗ គឺជាផ្នែកមួយនៃខ្លឹមសារសេចក្តីថ្លែងការណ៍ចុះថ្ងៃទី១២ខែធ្នូឆ្នាំ២០១៧ របស់សហភាពអឺរ៉ុបស្តីពីការព្យួរជំនួយរបស់ខ្លួនទៅគណៈកម្មាធិការជាតិរៀបចំការបោះឆ្នោត បន្ទាប់ពីមានការរំលាយគណបក្សសង្គ្រោះជាតិ និងការហាមសិទ្ធិនយោបាយលើបុគ្គល១១៨នាក់។
តាមរយៈការឆ្លើយតបមកសារព័ត៌មានថ្មីៗដដែល ប្រតិភូសហភាពអឺរ៉ុបក៏បានរម្លឹកឡើងវិញនូវសេចក្តីថ្លែងការណ៍របស់រដ្ឋមន្ត្រីការបរទេសរបស់សហភាពអឺរ៉ុប ដែលទាមទារឲ្យរដ្ឋាភិបាលកម្ពុជាស្តារប្រជាធិបតេយ្យឡើងវិញ និងធានាឲ្យគណបក្សប្រឆាំង សង្គមស៊ីវិល និងសារព័ត៌មានអាចអនុវត្តការងាររបស់ពួកគេដោយសេរី៕
អតីតប្រធានគណបក្សសង្គ្រោះជាតិ លោក សម រង្ស៊ី បានបង្ហើបពីបំណងចរចានយោបាយជាមួយគណបក្សកាន់អំណាចនៃសម្តេចនាយករដ្ឋមន្ត្រី ហ៊ុន សែន។ តាមរយៈរលកធាតុអាកាសនៃវិទ្យុបារាំងអន្តរជាតិផ្សាយជាភាសាខ្មែរកាលពីថ្ងៃទី២៥ខែមីនា លោក សម រង្ស៊ី ដែលកំពុងរស់នៅនិរទេសខ្លួនពីដីកាស្ថាពរនៃតុលាការកម្ពុជាលើសំណុំក្តីក្តាំមួយចំនួន ក៏បានឆ្លៀតឱកាសនិយាយយកចំណេញពីដំណើរទស្សនកិច្ចនៃទីប្រឹក្សានាយករដ្ឋមន្ត្រីជប៉ុននៅកម្ពុជា និងពីសារសំខាន់នៃរដ្ឋាភិបាលក្រុងតូក្យូក្នុងដំណោះស្រាយនយោបាយរបស់កម្ពុជាដែរ។
ប្រមុខរដ្ឋាភិបាលកម្ពុជាមិនត្រឹមតែបានឆ្លើយតបជាអវិជ្ជមានទៅចំណុចទាំងពីរដែលលោក សម រង្ស៊ី បានលើកឡើងនោះឡើយ។ ការឆ្លើយតបរបស់បុរសខ្លាំងរបស់កម្ពុជា បានហៀរប៉ះដល់រឿងមួយចំនួនទៀតផង ដូចជា ការមិនបន្ធូរបន្ថយទោសដល់ទណ្ឌិតអតីតសមាជិកគណបក្សប្រឆាំងក្នុងពេលចូលឆ្នាំខ្មែរខាងមុខ បញ្ចប់ការប្រើទូរសព្ទរបស់លោក មាជ សុវណ្ណារ៉ា។
ពីវេទិកាចែកសញ្ញាបត្រដល់និស្សិតកាលពីព្រឹកថ្ងៃទី២៧ខែមីនា សម្តេច ហ៊ុន សែន បានផ្ញើសារទៅលោក សម រង្ស៊ី ដែលកំពុងរស់នៅប្រទេសបារាំងយ៉ាងដូច្នេះ៖«គ្មានការចរចាជាមួយពួកក្បត់ជាតិ។ គ្មានការចរចាជាមួយអ្នកឯងទេ អ្នកឯងកុំសង្ឃឹមថាមានដំណោះស្រាយ។ គ្មានបរទេសណាមកត្រួតក្បាល ហ៊ុន សែន បានទេ។ សុំនិយាយឲ្យច្បាស់!»។
ឆ្លើយតបមកសារព័ត៌មានថ្មីៗ ដែលស្នើសុំការអធិប្បាយលើសំណុំរឿងនយោបាយចុងក្រោយរបស់កម្ពុជានេះ ទាំងស្ថានទូតបារាំង និងស្ថានទូតសហរដ្ឋអាមេរិកប្រចាំកម្ពុជាថ្លែងថា ពួកគេ«មិនមានការអត្ថាធិប្បាយ»ឡើយ។
សារព័ត៌មានថ្មីៗក៏បានផ្ញើសំណួរទៅកាន់ប្រតិភូសហភាពអឺរ៉ុបប្រចាំកម្ពុជាដែរ។ លោក George Edgar ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជាមិនបានឆ្លើយចំសំណួរទេ ប៉ុន្តែបានផ្តល់ខ្លឹមសារនៃសេចក្តីថ្លែងការណ៍ និងការសម្រេចចិត្តកន្លងមកដែលបង្ហាញពីជំហររបស់សហភាពអឺរ៉ុបចំពោះកម្ពុជា។ ការឆ្លើយតបមួយរបស់លោកឯកអគ្គរដ្ឋទូត George Edgar មកសារព័ត៌មានថ្មីៗ គឺជាផ្នែកមួយនៃខ្លឹមសារសេចក្តីថ្លែងការណ៍ចុះថ្ងៃទី១២ខែធ្នូឆ្នាំ២០១៧ របស់សហភាពអឺរ៉ុបស្តីពីការព្យួរជំនួយរបស់ខ្លួនទៅគណៈកម្មាធិការជាតិរៀបចំការបោះឆ្នោត បន្ទាប់ពីមានការរំលាយគណបក្សសង្គ្រោះជាតិ និងការហាមសិទ្ធិនយោបាយលើបុគ្គល១១៨នាក់។
តាមរយៈការឆ្លើយតបមកសារព័ត៌មានថ្មីៗដដែល ប្រតិភូសហភាពអឺរ៉ុបក៏បានរម្លឹកឡើងវិញនូវសេចក្តីថ្លែងការណ៍របស់រដ្ឋមន្ត្រីការបរទេសរបស់សហភាពអឺរ៉ុប ដែលទាមទារឲ្យរដ្ឋាភិបាលកម្ពុជាស្តារប្រជាធិបតេយ្យឡើងវិញ និងធានាឲ្យគណបក្សប្រឆាំង សង្គមស៊ីវិល និងសារព័ត៌មានអាចអនុវត្តការងាររបស់ពួកគេដោយសេរី៕
© រក្សាសិទ្ធិដោយ thmeythmey.com
