ជាតិ
គ.ជ.ប. ប្តេជ្ញារៀបចំការបោះឆ្នោតឲ្យបានល្អ ស្របពេលអន្តរជាតិខ្លះ កំពុងអស់ជំនឿ លោក ស៊ិ ក ប៊ុនហុក ប្រធានគជប
× គណៈកម្មាធិការជាតិរៀបចំការបោះឆ្នោត (គ.ជ.ប.) បានចេញសេចក្តីប្រកាសព័ត៌មានមួយ ដោយបង្ហាញពីជំហររឹងមាំរបស់ខ្លួន ក្នុងការរៀបចំការបោះឆ្នោតនៅឆ្នាំ២0១៨។
សេចក្តីប្រកាសព័ត៌មាននោះ បានសរសេរពីប្រសាសន៍របស់លោក ស៊ិក ប៊ុនហុក ប្រធានគ.ជ.ប. យ៉ាងដូច្នេះថា៖«គ.ជ.ប. ប្តេជ្ញារៀបចំការបោះឆ្នោតនាពេលខាងមុខ ឲ្យបានល្អក្នុងនាមជាខ្មែរ»។
ការប្តេជ្ញារបស់គ.ជ.ប. ធ្វើឡើងស្របពេលដែលការបោះឆ្នោតជ្រើសតាំងតំណាងរាស្ត្រ នៅថ្ងៃទី២៩ ខែកក្កដា ឆ្នាំ២0១៨ កាន់តែខិតជិតមកដល់។ ម្យ៉ាងទៀត ការប្តេជ្ញានេះ ក៏ចំពេលដែលសហគមន៍អន្តរជាតិមួយចំនួន ដូចជាសហរដ្ឋអាមេរិក និងសហភាពអឺរ៉ុប ជាដើម រួមទាំងស្ថាប័នអន្តរជាតិផ្សេងទៀត កំពុងមើលមកគ.ជ.ប. ក្នុងផ្លូវអវិជ្ជមាន។
សហរដ្ឋអាមេរិក និងសហភាពអឺរ៉ុប បានចាប់ផ្តើមមុនគេ ក្នុងការផ្តាច់ជំនួយលើការបោះឆ្នោត។ ការផ្តាច់ជំនួយនេះ គឺដោយសារតែពួកគេ មិនពេញចិត្តនឹងការឃុំលោក កឹម សុខា និងការរំលាយគណបក្សសង្គ្រោះជាតិ។
សហគមន៍អន្តរជាតិ យល់ថា ការបោះឆ្នោតនៅកម្ពុជា នឹងមិនមានលក្ខណប្រជាធិបតេយ្យ និងស្របច្បាប់នោះទេ ប្រសិនបើលោក កឹម សុខា ប្រធានគណបក្សសង្គ្រោះជាតិ នៅតែជាប់ឃុំ ហើយគណបក្សរបស់លោក មិនបានចូលរួម។ សហគមន៍អន្តរជាតិ ប្រកាសថា ពួកគេ ទទួលស្គាល់ការបោះឆ្នោត លុះត្រាតែមានវត្តមានរបស់គណបក្សសង្គ្រោះជាតិ។
យ៉ាងណាក៏ដោយ រដ្ឋាភិបាលកម្ពុជា មិនខ្វល់ឡើយ ដែលសហគមន៍អន្តរជាតិ ផ្តាច់ជំនួយ និងមិនទទួលស្គាល់លទ្ធផលបោះឆ្នោត។ រដ្ឋាភិបាលកម្ពុជា នៅតែប្រកាសថា ការបោះឆ្នោត នឹងប្រព្រឹត្តទៅតាមគ្រោងទុក៕
© រក្សាសិទ្ធិដោយ thmeythmey.com