ជាតិ
មហាផ្ទៃហៅស្នងការរងខេត្តតាកែវ ចូលបំភ្លឺករណីស្ត្រីម្នាក់ចងកកាលពីចុងខែមករា
× លោក ឡាយ ណារិទ្ធ ស្នងការរងខេត្តតាកែវ ត្រូវបាននាយកដ្ឋានព្រហ្មទណ្ឌនៃក្រសួងមហាផ្ទៃ កោះហៅឲ្យចូលទៅបំភ្លឺ នៅថ្ងៃទី២៩ ខែមីនា ឆ្នាំ២០១៨នេះ ជុំវិញរឿងរ៉ាវរបស់ស្ត្រីម្នាក់ឈ្មោះ ចែវ សុវឌ្ឍនា ដែលធ្វើអត្តឃាត ដោយចងក។
លោក ឡាយ ណារិទ្ធ គឺជាបងប្រុសបង្កើតរបស់លោក ឡាយ វណ្ណៈ អតីតអភិបាលខេត្តតាកែវ។ លោក ឡាយ វណ្ណៈ ទើបនឹងត្រូវបានសម្តេច សាយ ឈុំ ប្រធានព្រឹទ្ធសភា ដែលកំពុងទទួលរាជានុសិទ្ធិជាប្រមុខរដ្ឋស្តីទី ចេញព្រះរាជក្រឹត្យបញ្ចប់តំណែងជាអភិបាលខេត្តតាកែវ ហើយឲ្យមកបម្រើការងារនៅក្រសួងមហាផ្ទៃវិញ កាលពីប៉ុន្មានថ្ងៃមុន។
ក្រៅពីលោក ឡាយ ណារិទ្ធ ក៏នៅមាននគរបាល៧រូបទៀតដែរ ដែលត្រូវចូលទៅបំភ្លឺពីករណីនេះ។ លោក នេត សាវឿន អគ្គស្នងការនគរបាលជាតិ បានប្រាប់ Fresh News យ៉ាងដូច្នេះថា៖«គេហៅ [ពួកគាត់] មកសួរនាំ ដើម្បីពិនិត្យពាក់ព័ន្ធនឹងកន្លែងកើតហេតុឡើងវិញ»។
លោក ខៀវ សុភ័គ ប្រាប់សារព័ត៌មានថ្មីៗតាមទូរសព្ទថា លោក មិនអាចអត្ថាធិប្បាយពីរឿងនេះបានទេ ដោយសារតែមិនទាន់បានទទួលព័ត៌មានច្បាស់លាស់។ លោក និយាយដូច្នេះថា៖«ព័ត៌មាន ដែលពាក់ព័ន្ធនឹងក្រសួងមហាផ្ទៃច្រើនណាស់។ ហើយសម្រាប់ព័ត៌មាននេះ ខ្ញុំមិនដឹងទេ»។
គួររម្លឹកថា ស្ត្រីឈ្មោះ ចែវ សុវឌ្ឍនា មានវ័យ៣៦ឆ្នាំ បានស្លាប់ ដោយចងក នៅក្នុងផ្ទះ ដែលស្ថិតក្រុងដូនកែវ ខេត្តតាកែវ កាលពីចុងខែមករា ឆ្នាំ២០១៨។ ប៉ុន្តែសាធារណជនខ្លះ សង្ស័យថា មរណភាពរបស់ស្ត្រីខាងលើ ទំនងជាមិនមែនដោយសារអត្តឃាតនោះទេ៕
Tag:
ឡាយ ណារិទ្ធ
ឃាតកម្ម
© រក្សាសិទ្ធិដោយ thmeythmey.com