ជាតិ
នយោបាយជាតិ
លុះត្រាតែស្ថានការណ៍ល្អ ទើបគណបក្សភ្លើងទៀន ចូលរួមការបោះឆ្នោត លោក ទាវ វណ្ណុល ប្រធានគណបក្សភ្លើងទៀន ឡើងថ្លែងសារនៅព្រឹកថ្ងៃទី៣0 ខែមីនា ឆ្នាំ២0១៨ ក្នុងពិធីបង្សុលជូនបាតុករដែលស្លាប់ដោយសារការបំផ្ទុះគ្រាប់បែកក្នុងឆ្នាំ១៩៩៧
× ភ្នំពេញ៖ ពេលវេលានៃការបោះឆ្នោតឆ្នាំ២0១៨ កាន់តែកៀកមែនទែនហើយ ប៉ុន្តែគណបក្សភ្លើងទៀន ដែលមានឈ្មោះដើមថា គណបក្ស សម រង្ស៊ី មិនទាន់បានគិតនៅឡើយទេ។ គណបក្សនេះ នៅរង់ចាំមើលស្ថានការណ៍បន្តិចទៀនសិន ទើបអាចសម្រេចចិត្តបានថា ចូលរួម ឬក៏មិនចូលរួម។
គណបក្សភ្លើងទៀន កំពុងស្ទាក់ស្ទើរថា ត្រូវចូលរួមប្រកួតប្រជែងក្នុងបោះឆ្នោតនៅឆ្នាំ២0១៨ ឬមិនចូលរួម។ មូលហេតុដែលធ្វើឲ្យគណបក្សភ្លើងទៀន ពិបាកសម្រេចចិត្តបែបនេះ គឺដោយសារតែស្ថានការណ៍នយោបាយ ហាក់មិនសូវអំណោយផល។
លោក ទាវ វណ្ណុល ប្រធានគណបក្សភ្លើងទៀន បានលើកឡើងថា លទ្ធិប្រជាធិបតេយ្យនៅកម្ពុជាបច្ចុប្បន្ន កាន់តែធ្លាក់ចុះ និងមិនបានបើកទូលាយសម្រាប់គណបក្សប្រឆាំងនោះទេ។ លោក និយាយយ៉ាងខ្លីថា គណបក្សរបស់លោក ចូលរួមការបោះឆ្នោតឬមិនចូលរួម គឺអាស្រ័យលើស្ថានការណ៍នៅពេលនោះ។
ការថ្លែងរបស់លោក ទាវ វណ្ណុល ទៅកាន់អ្នកកាសែត គឺនៅពេលដែលលោក ចូលរួមរៀបចំពិធីបង្សុកូល នៅព្រឹកថ្ងៃទី៣0 ខែមីនា ឆ្នាំ២0១៨នេះ ដើម្បីឧទ្ធិសកុសលជូនវិញ្ញាណក្ខន្ធអ្នកដែលបាត់បង់ជីវិត ដោយសារការបំផ្ទុះគ្រាប់បែក កាលពីថ្ងៃទី៣0 ខែមីនា ឆ្នាំ១៩៩៧។ ប្រធានគណបក្សភ្លើងទៀន បញ្ជាក់បែបនេះថា៖«បើលទ្ធិប្រជាធិបតេយ្យ នៅតែធ្លាក់ចុះរបៀបហ្នឹង យើងប្រហែលជាមិនចូលរួមទេ។ លុះត្រាស្ថានភាពនយោបាយ និងលទ្ធិប្រជាធិបតេយ្យ មានភាពទូលំទូលាយដូចពីមុន ទើបយើងគិតថា យើងនឹងចូលរួម»។
សម្រាប់សហគមន៍អន្តរជាតិមួយចំនួន សិទ្ធិមនុស្ស ប្រជាធិបតេយ្យ នីតិរដ្ឋ និងប្រព័ន្ធផ្សព្វផ្សាយនៅកម្ពុជា កំពុងធ្លាក់ចុះយ៉ាងគំហុក។ សហគមន៍អន្តរជាតិ វាយតម្លៃដូច្នេះ ដោយសារតែគណបក្សសង្គ្រោះជាតិ ដែលជាគណបក្សប្រឆាំងធំជាងនៅកម្ពុជា ត្រូវបានរំលាចោល ហើយលោក កឹម សុខា ត្រូវបានឃុំខ្លួន រួមទាំងស្ថាប័នសារព័ត៌មានខ្លះទៀត ដូចជា វិទ្យុអាស៊ីសេរី និងកាសែត ខេមបូឌា ដេលី ជាដើម បានដកខ្លួនពីកម្ពុជា។
សហគមន៍អន្តរជាតិ ដោយមានសហរដ្ឋអាមេរិក និងសហភាពអឺរ៉ុប ជាអ្នកចេញមុខខ្លាំងជាងគេ បានទាមទារឲ្យរដ្ឋាភិបាលកម្ពុជា កែប្រែស្ថានការណ៍ឲ្យវិលទៅរកសភាពដើម មុនការបោះឆ្នោតថ្នាក់ជាតិ នៅថ្ងៃទី២៩ ខែកក្កដា ឆ្នាំ២0១៨ មកដល់។ ហើយដើម្បីឲ្យស្ថានការណ៍មានភាពល្អប្រសើរនោះ គឺមានតែដោះលែងលោក កឹម សុខា និងបើកផ្លូវឲ្យគណបក្សសង្គ្រោះជាតិ ធ្វើសកម្មភាពឡើងវិញ។ បើពុំដូច្នេះទេ ប្រទេសធំៗទាំងពីរ នឹងមិនទទួលស្គាល់ការបោះឆ្នោតឡើយ។
យ៉ាងណាក៏ដោយ ការទាមទាររបស់សហគមន៍អន្តរជាតិ មិនទាន់ទទួលបានផលវិជ្ជមាននៅឡើយទេ មកដល់ពេលនេះ។ ផ្ទុយទៅវិញ រដ្ឋាភិបាលកម្ពុជា មានតែប្រតិកម្មទៅវិញថា កុំឲ្យលូកដៃចូលកិច្ចផ្ទៃក្នុងរបស់កម្ពុជា។ រដ្ឋាភិបាលកម្ពុជា ប្រកាសជំហរថា ការបោះឆ្នោតនឹងដំណើរការតាមការគ្រោងទុក ដោយមិនខ្វល់ពីការទទួលស្គាល់ឬមិនទទួលស្គាល់ពីសហគមន៍អន្តរជាតិនោះទេ៕
Tag:
គណបក្សភ្លើងទៀន
ទាវ វណ្ណុល
© រក្សាសិទ្ធិដោយ thmeythmey.com