ជាតិ
មេនគរបាល ប្រាប់ឲ្យកម្លាំងតាមព្រំដែន កម្ទេចចោលភ្លាម បើចលនាណា ចង់ផ្តួលរដ្ឋាភិបាល លោក ដាំ វុទ្ធី អគ្គស្នងការរងនៃអគ្គស្នងការនគរបាលជាតិ
× ភ្នំពេញ៖ កងកម្លាំងដែលឈរជើងនៅតាមព្រំដែន មិនមែនការពារតែព្រំដែននោះទេ ប៉ុន្តែក៏ត្រូវជួយការពាររដ្ឋធម្មនុញ្ញ និងរដ្ឋាភិបាលកម្ពុជាផងដែរ។ នេះជាការលើកឡើងរបស់នាយឧត្តមសេនីយ៍ ដាំ វុទ្ធី អគ្គស្នងការរងមួយរូបនៃអគ្គស្នងការនគរបាលជាតិ។
ការថ្លែងរបស់លោក ដាំ វុទ្ធី គឺធ្វើឡើងក្នុងកិច្ចប្រជុំបូកសរុបលទ្ធផលនៃកិច្ចប្រតិបត្តិការការពារសន្តិសុខ តាមតំបន់ព្រំដែនប្រចាំឆ្នាំ២០១៧ និងលើទិសដៅការងារឆ្នាំ២០១៨ របស់នាយកដ្ឋានកណ្តាលនគរបាលការពារព្រំដែន ដែលប្រព្រឹត្តទៅ នៅព្រឹកថ្ងៃទី៣០ ខែមីនា ឆ្នាំ២០១៨នេះ។ លោក ដាំ វុទ្ធី ធ្វើជាអធិបតី ជំនួសលោក នេត សាវឿន អគ្គស្នងការនគរបាលជាតិ ក្នុងកិច្ចប្រជុំនេះ។
គេហទំព័រនៃអគ្គស្នងការនគរបាលជាតិ បានចុះផ្សាយពីបញ្ជារបស់លោក ដាំ វុទ្ធី យ៉ាងដូច្នេះថា៖«កងកម្លាំងនគរបាលការពារព្រំដែនទាំងអស់ ត្រូវគោរពតាមរដ្ឋធម្មនុញ្ញ ការពារបូរណភាពទឹកដី ការពាររដ្ឋាភិបាលស្របច្បាប់ និងកម្ទេចចោលរាល់ចលនាទាំងឡាយណា ដែលប៉ុនប៉ងផ្គួលរំលំរដ្ឋាភិបាល»។
ទោះជាមិនបញ្ចេញឈ្មោះក្តី ប៉ុន្តែ ចលនាដែលមេនគរបាលជាន់ខ្ពស់រូបនេះ ចង់សំដៅ ទំនងជាមិនមានចលនាណាផ្សេងក្រៅពីចលនាសង្គ្រោះជាតិ ឬក្រុមប្រឆាំងនោះទេ។ ចលនាសង្គ្រោះជាតិ ដែលមានលោក សម រង្ស៊ី ជាប្រធាន និងកំពុងធ្វើសកម្មភាពយ៉ាងផុសផុលនៅក្រៅប្រទេស បានរងនូវការព្រមានផ្ទួនៗ ពីសំណាក់មេទ័ព និងមេនគរបាល រួមទាំងមន្ត្រីជាន់ខ្ពស់ជាច្រើនទៀតនៃរដ្ឋាភិលបាកម្ពុជាផងដែរ។
រដ្ឋាភិបាលកម្ពុជា ជាពិសេសកងកម្លាំងប្រដាប់អាវុធគ្រប់លំដាប់ថ្នាក់ បានប្តេជ្ញាថា មិនឲ្យចលនាសង្គ្រោះជាតិ មានសកម្មភាពនៅលើទឹកដីកម្ពុជាជាដាច់ខាត។ សម្រាប់រដ្ឋាភិបាលកម្ពុជា ចលនាសង្គ្រោះជាតិរបស់លោក សម រង្ស៊ី គឺជាក្រុមឧទ្ទាម ដែលស្ថិតក្រៅប្រព័ន្ធច្បាប់។
យ៉ាងណាក៏ដោយ លោក សម រង្ស៊ី ថ្លែងការពារកន្លងមកថា លោក និងចលនាសង្គ្រោះជាតិ មិនមែនជាក្រុមឧទ្ទាមឬភេរវករនោះទេ។ លោក បកស្រាយថា ការបង្កើតចលនាសង្គ្រោះជាតិ គឺគ្រាន់តែដើម្បីបន្តទាមទារឲ្យដោះលែងលោក កឹម សុខា និងបើកផ្លូវឲ្យគណបក្សសង្គ្រោះជាតិ រស់ឡើងវិញប៉ុណ្ណោះ។ លោក បញ្ជាក់ថា បើការទាមទារខាងលើបានសម្រេច ចលនាសង្គ្រោះជាតិ នឹងត្រូវរំលាយចោលវិញជាមិនខាន៕
Tag:
នគរបាល
ចលនាសង្គ្រោះជាតិ
សម រង្ស៊ី
© រក្សាសិទ្ធិដោយ thmeythmey.com