កីឡាអន្តរជាតិ
អន្តរជាតិ
Shaw សួរ Mourinho ថា «ហេតុអ្វីបានជាអ្នកតែងតែធ្វើបាបខ្ញុំ?»
× Luke Shaw បានចោទសួរអ្នកចាត់ការទូទៅលោក Jose Mourinho ថា «ហេតុអ្វីបានជាអ្នកតែងតែធ្វើបាបខ្ញុំ?»។ ខ្សែការពារស្លាបឆ្វេង សួរសំនួរបែបនេះទាំងកំហឹង ក្រោយត្រូវបានប្តូរចេញក្នុងអំឡុងការប្រកួតពាន FA Cup វគ្គ១/៤ផ្តាច់ព្រ័ត្រ បើទោះបី Manchester United យកឈ្នះ Brighton ២-០ ក៏ដោយ កាលពីថ្ងៃទី១៨ ខែមីនាកន្លងទៅ។ នេះបើតាមការផ្សាយរបស់ DailyMail។
ខ្សែការពារសញ្ជាតិអង់គ្លេស វ័យ២២ឆ្នាំរូបនេះ ក៏បានសួរលោក Mourinho អំពីរបៀបដែលអ្នកចាត់ការក្រុមរហស្សនាមបិសាចក្រហមរូបនេះដឹកនាំនាពេលបច្ចុប្បន្នផងដែរ នៅក្នុងបន្ទប់ប្តូរសម្លៀកបំពាក់ក្រោយបញ្ចប់តង់ទី១នៅទឹកដី Old Trafford។
Shaw ប្រតិកម្មយ៉ាងខ្លាំងទៅនឹងការសម្រេចចិត្តរបស់អ្នកចាត់ការសញ្ជាតិព័រទុយហ្គាល់ បន្ទាប់ពីជំនួសខ្លួននៅត្រឹមតង់ទី១ក្នុងការប្រកួត FA Cup ទល់នឹងក្រុម Brighton ដោយនិយាយថា៖«ហេតុអ្វីបានជាអ្នកតែងតែធ្វើបាបខ្ញុំ?»។
អតីតអ្នកចាត់ការ Real Madrid និង Chelsea ក៏បានឆ្លើយតបភ្លាមៗទៅកាន់ Shaw វិញថា រូបគេមិនបានការពារឲ្យល្អទេ ហើយ Brighton មានសេរីភាពក្នុងការលេងច្រើនពេកនៅតំបន់ស្លាបឆ្វេងរបស់ Man Utd។
ការប៉ះទង្គិចពាក្យសម្តីគ្នារវាងអ្នចាត់ការ និងកូនក្រុមនេះ ត្រូវបានគេលឺពីខាងក្រៅបន្ទប់ប្តូរសម្លៀកបំពាក់មុនពេល Mourinho សម្រេចឲ្យ Ashley Young ចូលជំនួសនៅតំបន់ការពារឆ្វេងនេះវិញ។
អតីតសមាជិកក្រុម Southampton ដែល Man Utd ទិញចូលកាលពីឆ្នាំ២០១៤ មានអារម្មណ៍ថារូបគេទទួលរងភាពអយុត្តិធម៌ ពីអ្នកចាត់ការខ្លួន និងកំពុងតែរកផ្លូវដើម្បីចាកចេញពីក្រុមម្ចាស់ជើងឯងលីកបាល់ទាត់កំពូលអង់គ្លេស ២០សម័យនេះនៅរដូវកាលក្រោយផងដែរ។
Shaw ចង់បានកៅអីមួយសម្រាប់ក្រុមជម្រើសជាតិអង់គ្លេស ក្នុងយុទ្ធនាការបាល់ទាត់ពិភពលោក World Cup ឆ្នាំ២០១៨ នៅរុស្ស៊ី ដែលនឹងចាប់ផ្តើមនៅពាក់កណ្តាលខែមិថុនាខាងមុខនេះ៕
Tag:
បាល់ទាត់
Luke Shaw
Manchester United
Jose Mourinho
© រក្សាសិទ្ធិដោយ thmeythmey.com