ឈិន ឈឿន នឹងដឹកនាំក្រុមប្រជែងក្នុងពានរង្វាន់១ ដើម្បីទាក់ទាញចិត្តក្លិបនៅលីគកំពូល

កីឡាជាតិ

កីឡាអន្តរជាតិ

ជាតិ

ឈិន ឈឿន នឹងដឹកនាំក្រុមប្រជែងក្នុងពានរង្វាន់១ ដើម្បីទាក់ទាញចិត្តក្លិបនៅលីគកំពូល

07, Apr 2018 , 9:59 pm

រូបភាព

កីឡាករ ឈិន ឈឿន ថតជាមួយក្មេងៗពេលរូបគេទៅចែករំលែកបទពិសោធបាល់ទាត់នៅសាលាបឋមសិក្សាជម្រុក នៅខេត្តកណ្តាល, រូបភាពហ្វេសប៊ុក ឈិន ឈឿន

ដោយ: ថ្មីៗ

ខ្សែបម្រើក្លិបក្រសួងការពារជាតិ ឈិន ឈឿន ក្រៅពីជួយក្រុមប្រជែងដណ្តើមជើងឯកក្របខណ្ឌលីគកំពូលកម្ពុជា រូបគេមានតួនាទីដ៏ធំមួយទៀត គឺដឹកនាំក្រុមបាល់ទាត់រហស្សនាម«ទន្សោងអែហ្វស៊ី» ដែលជាការផ្តួចផ្តើមរបស់ខ្លួន ប្រជែងក្នុងពានរង្វាន់ពាក់កណ្តាលអាជីព១នាចុងខែមេសា ខាងមុខនេះ។ ឈិន ឈឿន បានចាត់ទុកការចូលរួមលើកដំបូងថា ជាការផ្តល់ឱកាសមួយដល់យុវជនបានបញ្ចេញសមត្ថភាព ដើម្បីទាក់ទាញចំណាប់អារម្មណ៍ពីក្លិបលីគកំពូល ក្នុងការសម្រេចក្តីស្រមៃរបស់ពួកគេ។

ក្នុងនាមជាអ្នកការទូទៅក្រុមបាល់ទាត់រហស្សនាម«ទន្សោអែហ្វស៊ី» កីឡាករ ឈិន ឈឿន ត្រូវដឹកនាំក្រុមនេះប្រជែងដណ្តើមជើងឯកក្នុងពានរង្វាន់ Khmer Real Estate League ប្រចាំឆ្នាំ២០១៨។ ព្រឹត្តិការណ៍ពានរង្វាន់បាល់ទាត់ពាក់កណ្តាលអាជីពនេះ នឹងចាប់ពីថ្ងៃទី២១ មេសា ឆ្នាំ២០១៨ ដោយគ្រោងបញ្ចប់នាអំឡុងខែកញ្ញា ខាងមុខ។

ខ្សែបម្រើរបស់ក្លិបក្រសួងការពារជាតិរូបនេះបានចាត់ទុកការចូលរួមពានរង្វាន់បាល់ទាត់ពាក់កណ្តាលអាជីពនេះថា ជាការផ្តល់ឱកាសដល់កីឡាករវ័យក្មេងបានបង្ហាញសមត្ថភាព និងអភិវឌ្ឍន៍បច្ចេកទេសឲ្យកាន់តែប្រសើរ។ លើសពីនេះ ដើម្បីទាក់ទាញចិត្តក្លិបធំៗក្នុងក្របខណ្ឌលីគកំពូល ងាកមកចាប់អារម្មណ៍ពួកគេផងដែរ។

ឈិន ឈឿន និយាយថា៖«ខ្ញុំគិតថា ការចូលរួមនេះ វាបានផ្ដល់ឱកាសឲ្យកីឡាករក្មេងៗ ដែលស្រលាញ់បាល់ទាត់បានបង្ហាញសមត្ថភាព និងអភិវឌ្ឍន៍បច្ចេកទេសឲ្យកាន់តែល្អប្រសើរ។ ហើយវា ក៏ជាឱកាសក្នុងការទាក់ទាញការចាប់អារម្មណ៍ពីក្លិបធំៗ នៃក្របខណ្ឌលីគកំពូលកម្ពុជា ដើម្បីសម្រេចក្តីស្រមៃ ដែលចង់ក្លាយជាកីឡាករអាជីពនាអនាគតសម្រាប់ពួកគេផងដែរ»។

សម្រាប់រូបមន្តប្រកួតធ្វើលំនាំដូចការប្រកួតក្របខណ្ឌលីគកំពូល គឺក្រុមទាំងអស់ត្រូវប្រកួតសន្សំពិន្ទុពីរជើង ដោយក្រុមនីមួយៗត្រូវជួបប្រកួតគ្នាពីរលើក។ ក្រុមមានពិន្ទុខ្ពស់ជាងគេនាការប្រកួតទាំងពីរជើង នឹងក្លាយជាម្ចាស់ជើងឯកតែម្តង។ ឆ្នាំនេះពានរង្វាន់ Khmer Real Estate League 2018 មានក្រុមចុះឈ្មោះចូលរួមចំនួន២០ក្រុម។

នេះជាឆ្នាំដំបូងសម្រាប់ក្រុមទន្សោងអែហ្វស៊ី ដែលបានដាក់ពាក្យចូលរួមប្រជែងក្នុងពានរង្វាន់បាល់ទាត់ពាក់កណ្តាលអាជីពមួយនេះ។ ក្រុមបាល់ទាត់ទន្សោងអែហ្វស៊ី ត្រូវបានបង្កើតឡើងប្រមាណ៥ខែ ក្រោមការផ្តួចផ្តើមរបស់កីឡាករ ឈិន ឈឿន និងបងធម៌របស់គេ ដោយមានបងធម៌របស់គេជាប្រធាន និងរូបគេជាអ្នកចាត់ការទូទៅ៕