World Cup៖ កូស្តារីកា បានធ្វើឲ្យក្រុមខ្លាំងៗនៅអឺរ៉ុប ចុកឈាមកាលពី៤ឆ្នាំមុន

កីឡាអន្តរជាតិ

អន្តរជាតិ

World Cup៖ កូស្តារីកា បានធ្វើឲ្យក្រុមខ្លាំងៗនៅអឺរ៉ុប ចុកឈាមកាលពី៤ឆ្នាំមុន

10, Apr 2018 , 9:05 am

រូបភាព

រូបភាពពី AFP

ដោយ: ទេព ពិទូរ្យ

ក្រុមកីឡាបាល់ទាត់ជម្រើសជាតិកូស្តារីកាដែលបានកៅអីទៅរុស្ស៊ីសម្រាប់ការប្រកួតពានរង្វាន់ FIFA World Cup ឆ្នាំ២០១៨ ស្ថិតនៅពូល E ត្រូវប៉ះជាមួយប្រេស៊ីល ស្វីស និងស៊ែប៊ី។ នេះជាការបង្ហាញខ្លួនលើកទី៥ហើយសម្រាប់ក្រុមមកពីទ្វីបអាមេរិកកណ្តាលមួយនេះ ចាប់តាំងពីចូលរួមលើកដំបូងឆ្នាំ ១៩៩០។

គ្រូបង្វឹក៖ លោក Oscar Ramirez (កូស្តារីកា)

ធ្លាប់ជាអតីតជំនួយការរបស់ក្រុមជម្រើសជាតិកូស្តារីកានៅឆ្នាំ ២០០៦ ដល់២០០៨ មុនឡើងជាគ្រូធំដើម្បីជំនួសតំណែងលោក Paulo Wanchope នៅខែសីហា ឆ្នាំ២០១៥។ Ramirez វ័យ៥៣ឆ្នាំ ក៏ធ្លាប់ជាអតីតខ្សែបម្រើរបស់ក្រុមនេះផងដែរជាមួយនឹងការបង្ហាញខ្លួន៤ប្រកួតនៅ World Cup ឆ្នាំ១៩៩០ ដែលអ៊ីតាលីធ្វើជាម្ចាស់ផ្ទះនោះ។ ក្រៅពីនោះលោកក៏ធ្លាប់មានបទពិសោធន៍ដឹកនាំក្លិបជាច្រើននៃលីកក្នុងស្រុកផងដែរ។

កីឡាករឆ្នើម៖ Bryan Ruiz

កីឡាករដែលអាចលេងបាន២តួរនាទី ជាខ្សែបម្រើផង និងខ្សែប្រយុទ្ធផង Ruiz ជាតួរអង្គសំខាន់ក្នុងការជួយកូស្តារីកាឈានទៅវគ្គ ១/៤ផ្តាច់ព្រ័ត្រ នៃពានរង្វាន់ World Cup 2014 នៅក្រុងរីយ៉ូ ដោយមានប្រៀបលើអ៊ីតាលី អង់គ្លេស ក្រោយមកទម្លាក់ក្រិក មុននឹងចាញ់ហូឡង់ ដដោយការទាត់ប៉េណាល់ទី។ ប្រធានក្រុមវ័យ ៣២ឆ្នាំ អាចរកគ្រាប់បាល់បញ្ចូលទីឲ្យក្រុមមកពីអាមេរិកកណ្តាលមួយនេះចំនួន៣គ្រាប់ក្នុងវគ្គជម្រុះតាមតំបន់ដើម្បីបានកៅអីទៅរុស្ស៊ី ឆ្នាំ២០១៨។

ប្រវត្តិក្នុង World Cup៖

នេះជាវត្តមានលើកទី ៥ របស់ជម្រើសជាតិកូស្តារីកា សម្រាប់ក្រុមមកពីតំបន់អាមេរិកកណ្តាលមួយនេះក្នុងព្រឹត្តិការណ៍កីឡាបាល់ទាត់ពិភពលោក បន្ទាប់ពីចូលរួមលើកដំបូងក្នុងឆ្នាំ ១៩៩០ និងចុងក្រោយឆ្នាំ២០១៤។ លទ្ធផលល្អបំផុតដែលពួកគេទទួលបាន គឺអាចឈានដល់វគ្គ ១/៤ផ្តាច់ព្រ័ត្រនៅឆ្នាំ ២០១៤។ កូស្តារីកា ស្ថិតនៅចំណាត់ថ្នាក់ទី ២៦ពិភពលោក ក្នុងតារាង FIFA Ranking។