ចំនួនមហាសេដ្ឋីកើនឡើង១៦ភាគរយ នៅអ៊ុយក្រែន ក្នុងនោះមានកុមារម្នាក់អាយុត្រឹម៧ឆ្នាំ

សេដ្ឋកិច្ចអន្តរជាតិ

អន្តរជាតិ

ចំនួនមហាសេដ្ឋីកើនឡើង១៦ភាគរយ នៅអ៊ុយក្រែន ក្នុងនោះមានកុមារម្នាក់អាយុត្រឹម៧ឆ្នាំ

09, May 2018 , 9:19 am

រូបភាព

ដោយ: ធីតា

មហាសេដ្ឋីនៅប្រទេសអ៊ុយក្រែន បានប្រកាសពីចំណូលរបស់ខ្លួនកាលពីឆ្នាំ២០១៧កន្លងមក។ តាមលទ្ធផលជំរឿន ចំនួនអ្នកមាននៅប្រទេសនេះ មានការកើនឡើង១៦ភាគរយបើប្រៀបធៀបទៅនឹងឆ្នាំ២០១៦ ។ មហាសេដ្ឋីទាំងនោះ មានអាយុចន្លោះពី៧ឆ្នាំ ដល់៩៩ឆ្នាំ។

មហាសេដ្ឋីនៅប្រទេសអ៊ុយក្រែន មានចំណូលប្រចាំឆ្នាំជាមធ្យមចំនួន៨.២លាន UAH (រូបិយបណ្ណអ៊ុយក្រែន hryvnia) ដែលស្មើប្រមាណ ៣១១ ៦៦៩ដុល្លារអាមេរិក។ លោក Myroslav Prodan នាយកស្តីទីនៃសេវាកម្មពន្ធរដ្ឋអ៊ុយក្រែន (SFS) បានបញ្ជាក់ឲ្យដឹងថា មហាសេដ្ឋីនៅប្រទេសខ្លួន បានកើនដល់ចំនួន៤០៦៣នាក់នៅឆ្នាំ២០១៧ ពោលលើសឆ្នាំ២០១៦ចំនួន១៦ភាគរយ ឬ៥៥៩នាក់។

តាមការផ្សាយរបស់សារព័ត៌មាន UNIAN News ចំនួនមហាសេដ្ឋីអ៊ុយក្រែន ២២៧០នាក់ មានអាយុចាប់ពី៤៥ឆ្នាំឡើយទៅ ខណៈ១៦០៥នាក់ មានអាយុចន្លោះពី៣០ទៅ៤៥ឆ្នាំ និង១៨៨នាក់ មានអាយុ៣០ឆ្នាំ។ តំបន់ដែលមានមហាសេដ្ឋីច្រើនជាងគេ គឺ Kharkiv (២៩៩នាក់), Dnipropetrovsk (២៦៩នាក់), Kyiv (៣៧៥នាក់) និង Odesa (២០៧នាក់)។

ជាមួយគ្នានេះផងដែរ មហាសេដ្ឋីវ័យក្មេងម្នាក់ដែលរស់នៅក្រុង Cherkasy មានអាយុត្រឹម៧ឆ្នាំប៉ុណ្ណោះ ខណៈមហាសេដ្ឋីដែលចាស់ជាងគេមានអាយុ៩៩ឆ្នាំដែលរស់នៅក្រុងកៀវ។ ទីភ្នាក់ងារព័ត៌មានរុស្ស៊ី TASS បានបញ្ជាក់ឲ្យដឹងថា ក្មេងប្រុសដែលជាមហាសេដ្ឋីវ័យ៧ឆ្នាំនោះ ជាអ្នកដែលបានឈ្នះឆ្នោតរង្វាន់ Jackpot ចំនួន៨.៥លានដុល្លារអាមេរិក ប៉ុន្តែមិនត្រូវបានបញ្ជាក់ពីអត្តសញ្ញាណនោះឡើយ៕