ជាតិ
សម្ដេច ហ៊ុន សែន ពិតជាចង់ធ្វើនាយករដ្ឋមន្ត្រីយូរជាងគេ ដើម្បីបំបែកឯតទគ្គកម្ម សម្តេចនាយករដ្ឋមន្ត្រី ហ៊ុន សែន។ រូបថត AFP
× ភ្នំពេញ៖ មកដល់ពេលនេះសម្ដេច ហ៊ុន សែន កំពុងកាន់តំណែងនាយករដ្ឋមន្ត្រី រយៈពេល៣៣ឆ្នាំហើយ ក្នុងការដឹកនាំប្រទេសកម្ពុជា។ ស្ថិតនៅក្នុងតំណែងនាយករដ្ឋមន្ត្រីដ៏យូរនេះ ប្រមុខរដ្ឋាភិបាល ក៏មិនទាន់ស្ងប់ចិត្តដែរ បើសិនជាមើលឃើញថា ប្រទេសហាក់មិនទាន់មានសន្តិភាពពេញលេញ។
រឿងសន្តិភាពក្នុងប្រទេស គឺជាគោលបំណងដែលសម្ដេច ហ៊ុន សែន ចង់បាន ដោយកុំទាន់គិតពីបញ្ហាសិទ្ធិមនុស្ស និងប្រជាធិបតេយ្យ បើសិនជាគ្មានសន្តិភាព។ ដើម្បីសន្តិភាពគឺជារឿងមួយ ប៉ុន្តែបំណងចង់ធ្វើជានាយករដ្ឋមន្ត្រីយូរជាងគេ ដើម្បីបំបែកឯតទគ្គកម្មនោះ ក៏ជារឿងមួយសំខាន់ ដែលស្ថិតនៅក្នុងចិត្តសម្ដេច ហ៊ុន សែន ផងដែរ។
ថ្លែងនៅក្នុងពិធីសំណេះសំណាលជាមួយកម្មករជិត៣ម៉ឺននាក់ នៅក្រុងបាវិត ខេត្តស្វាយរៀង ប្រមុខរដ្ឋាភិបាល បាននិយាយក្ដែងៗដូច្នេះថា៖«បំណងធំរបស់ពូត្រឹមតែចង់ធ្វើជាគ្រូបង្រៀនតូចតាចម្នាក់ប៉ុណ្ណោះ ហើយមិនដែលនឹកស្មានថា ខ្លួនឯងបានធ្វើជានាយករដ្ឋមន្ត្រី ហើយមិនមែនធ្វើ១ឆ្នាំ ២ឆ្នាំទេ ធ្វើ៣៣ឆ្នាំ ហើយថែម១០ឆ្នាំបើសិនជាពលរដ្ឋបោះឆ្នោតឲ្យ។ ព្រោះមិនមែនបញ្ហាការ(ធ្វើនាយករដ្ឋមន្ត្រី)បំបែកឯតទគ្គកម្មទេ វាច្បាស់ហើយរឿងបំបែកឯតទគ្គកម្ម ប៉ុន្តែដរាបណាពួកអ្នកបំផ្លាញជាតិ ចង់បំផ្លាញសន្តិភាព នៅតែបន្តបំផ្លាញ ខ្ញុំនៅតែធ្វើ(នាយករដ្ឋមន្ត្រី) ដើម្បីទប់ស្កាត់វា…»។
បន្ថែមពីនេះសម្ដេច ហ៊ុន សែន បានលើកយកទ្រឹស្តីផ្ទាល់ខ្លួនមកបកស្រាយចំពោះមុខកម្មករថា «នៅពេលសត្រូវសរសើរខ្ញុំ បានន័យថាខ្ញុំកំពុងធ្វើខុស។ ប៉ុន្តែបើសត្រូវកំពុងជេរខ្ញុំ បានន័យថា ខ្ញុំកំពុងធ្វើត្រូវ»។ ក្នុងន័យនេះសម្ដេច ហ៊ុន សែន បានពន្យល់ថា រាល់សកម្មភាពដែលរដ្ឋាភិបាល បានធ្វើចំពោះក្រុមបក្សប្រឆាំងកន្លងមក គឺគ្មានអ្វីខុសឆ្គងនោះទេ ព្រោះក្រុមបក្សប្រឆាំងកំពុងជេរ និងរិះគន់ ស្របតាមនិយមន័យទ្រឹស្តីសម្ដេច ដែលបានប្រើប្រាស់សម្រាប់ទប់ស្កាត់បញ្ហានានា ក្នុងការដឹកនាំប្រទេស៣៣ឆ្នាំមកនេះ។
បើពិតដូចជាការលើកឡើងរបស់សម្ដេច ដែលចង់បន្តធ្វើជានាយករដ្ឋមន្ត្រី១០ឆ្នាំទៀតនោះ បានន័យថា សម្ដេច នឹងក្លាយជានាយករដ្ឋមន្ត្រីកាន់អំណាច៤៣ឆ្នាំ ដែលយូរជាងគេ ។
បច្ចុប្បន្ន លោក Paul Biya ប្រធានាធិបតីកាមេរូន កំពុងកាន់អំណាចយូរជាងគេពោលគឺដល់ទៅ៤២ឆ្នាំ បើគិតចាប់ពីកាន់តំណែងនាយករដ្ឋមន្ត្រី ចាប់ពីឆ្នាំ១៩៧៥មក លោក Teodoro Obiang Nguema Mbasogo ប្រធានាធិបតីដឹកនាំហ្គីណេអេក្វាទ័រ អស់៣៨ឆ្នាំ និងលោក Yoweri Museveni ប្រធានាធិបតីអ៊ូហ្គង់ដា ដែលកាន់តំណែងបាន៣២ឆ្នាំ ជាដើម ។ លោក Fidel Castro អតីតមេដឹកនាំគុយបា ត្រូវបានចាត់ទុកជាមេដឹកនាំដែលកាន់អំណាចយូរជាងគេ ពោលគឺមានរយៈពេលរហូតដល់៤៩ឆ្នាំ (ឆ្នាំ១៩៥៩ ដល់ឆ្នាំ២០០៨)៕
Tag:
ហ៊ុន សែន
នាយករដ្ឋមន្ត្រី
ឯកត្តកម្ម
© រក្សាសិទ្ធិដោយ thmeythmey.com