ជាតិ
សេដ្ឋកិច្ច
World Bank ប្រាប់ឲ្យកម្ពុជាតាមដានវិស័យអចលនទ្រព្យ និងសំណង់ ឲ្យបានដិតដល់
× ភ្នំពេញ៖ របាយការណ៍បច្ចប្បន្នភាពសេដ្ឋកិច្ចកម្ពុជា ដែលចេញផ្សាយដោយធនាគារពិភពលោក នៅថ្ងៃទី១០ខែឧសភានេះ បានណែនាំឲ្យកម្ពុជាតាមដានឲ្យបានដិតដល់ចំពោះភាពលូតលាស់ខ្លាំងនៃវិស័យសំណង់ និងអចលនទ្រព្យ និងអភិវឌ្ឍន៍គោលនយោបាយបញ្ចៀសហានិភ័យក្នុងវិស័យនេះ។
ធនាគារពិភពលោក (World Bank) បានឲ្យដឹងថាដូច្នេះថា៖«កំណើនឥណទានដែលចាក់បញ្ចូលក្នុងវិស័យសំណង់ និងអចលនទ្រព្យបានបង្កើនល្បឿន ក្នុងរយៈពេលប៉ុន្មានឆ្នាំចុងក្រោយនេះ ដែលចាំបាច់ត្រូវអភិវឌ្ឍន៍គោលនយោបាយកម្រិតម៉ាក្រូ ដើម្បីកាត់បន្ថយវិសាលភាពនៃសកម្មភាពប្រថុយប្រថានក្នុងវិស័យនេះ»។
របាយការណ៍បានបង្ហាញថា កម្ចីដល់វិស័យសំណង់ និងអចលនទ្រព្យ បន្តកើនឡើងថែមទៀត ខណៈដែលកំណើនឥណទានទូទៅមានការថមថយ។ កម្ចីផ្ដល់ដោយធនាគារសម្រាប់វិស័យសំណង់ និងអចលនទ្រព្យ មានកំណើន ៣៦,៣ ភាគរយនៅត្រឹមដំណាច់ឆ្នាំ២០១៧ កើនពី ២៨,៤ភាគរយនៅក្នុងខែឧសភាឆ្នាំដដែលនេះ។ ហើយឥណទានក្នុងវិស័យនេះ បានកាន់កាប់ចំណែកដល់ ២៦ភាគរយនៃឥណទានរួមក្នុងឆ្នាំ២០១៧ ដែលកើនពី ២២ភាគរយនៅឆ្នាំ២០១៦។
ការងើបឡើងខ្លាំងនៃវិស័យសំណង់ និងអចលនទ្រព្យ ត្រូវការតាមដានដិតដល់។ របាយការណ៍ប្រាប់ថា វិស័យធនាគារ និងមីក្រូហិរញ្ញវត្ថុ ត្រូវចាំបាច់អនុម័តគោលការណ៍ណែនាំសម្រាប់ការផ្ដល់កម្ចី។ របាយការណ៍បន្ថែមថា គ្រឹះស្ថានផ្ដល់កម្ចិ ត្រូវឲ្យប្រាកដការតាមដានជាប់លាប់ចំពោះការបញ្ចេញកម្ចីរបស់ខ្លួន និងបន្តត្រួតពិនិត្យចំណាត់ថ្នាក់កម្ចីខូច ដោយរួមបញ្ចូលទាំងការលេចឡើងនូវនិន្នាការថ្មីៗនៃការបន្តកិច្ចសន្យាខ្ចី ដោយបន្ថែមទាំងចំនួនកម្ចី និងរយៈពេល។ ធនាគារពិភពលោក បញ្ជាក់ថា ចំណាត់ការខាងលើនេះនឹងជួយបញ្ចៀសបំណុលវ័ណ្ដករ ខណៈដែលឥណទានក្នុងវិស័យនេះចេះតែបន្តពង្រីក និងមានកំណើនឥតថមថយ៕
© រក្សាសិទ្ធិដោយ thmeythmey.com