ជាតិ
រដ្ឋាភិបាលផ្លាស់ប្ដូរទម្រង់សន្លឹកប្លង់ដីថ្មី ដែលមានQR Code និងរូបផែនទីកម្ពុជា រូបពីក្រសួងរៀបចំដែនដី
× ភ្នំពេញ៖ ទម្រង់សន្លឹកវិញ្ញាបនបត្រសម្គាល់ម្ចាស់អចលនវត្ថុ (ប្លង់ដី) នឹងត្រូវរដ្ឋាភិបាលដាក់ឲ្យប្រើប្រាស់ ចាប់ពីថ្ងៃទី ១ មិថុនា តទៅ។ សន្លឹកប្លង់ដីថ្មីនេះ មានQR Code និងរក្សារូបផែនទីនៃប្រទេសកម្ពុជា ជាទម្រង់ព្រាលៗនៅកណ្ដាលសន្លឹក។
លោក សេង ឡូត អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់ បានប្រាប់សារព័ត៌មានថ្មីៗតាមទូរសព្ទថា សន្លឹកប្លង់ដីថ្មីនេះ នឹងផ្ដល់ជូនសម្រាប់អ្នកចុះបញ្ជីចាប់ពីថ្ងៃទី១ មិថុនាទៅ។ វិញ្ញាបនបត្រចាស់ និងថ្មី មានតម្លៃដូចគ្នា គ្រាន់តែវិញ្ញាបនបត្រថ្មីបញ្ចូល QR Code ដែលមានព័ត៌មានពីម្ចាស់ និងដី រួមទាំងដឹងព័ត៌មាននៅក្នុងប្រព័ន្ធសុរិយោដី។ នេះជាការបន្ថែមរបស់ អ្នកនាំពាក្យដដែល។
វិញ្ញាបនបត្រសម្គាល់ម្ចាស់អចលនវត្ថុថ្មីនេះ នៅតែរក្សារូបប្រាសាទអង្គរវត្ត ដែលអាចមើលឃើញក្រោមពន្លឺ, អក្សរCopy នឹងលេចឡើងនៅពេលថតចម្លង និងរូបព្រះរាជសង្ហាពណ៌ក្រហម នឹងមើលឃើញពេលសីតុណ្ហភាពត្រជាក់។
រីឯចំណុចដែលកែប្រែ និងបន្ថែមថ្មី មានQR Code សម្រាប់ឲ្យសាធារណជនផ្ទៀងផ្ទាត់ព័ត៌មានលើបណ្ណ និងបញ្ចូលរូបផែនទីប្រទេសកម្ពុជា ជាទម្រង់ព្រាលៗនៅកណ្ដាល។ ក្នុងវិញ្ញាបនបត្រនេះ នឹងដកចេញនូវពាក្យ «វិញ្ញាបនបត្រសម្គាល់ម្ចាស់អចលនវត្ថុ» ជាទម្រង់អក្សរតូចៗព្រាលៗនៅលើសន្លឹកវិញ្ញាបនបត្រមុន ដោយបន្ថែមលេខរៀងពី ៧ខ្ទង់ ទៅ ៨ ខ្ទង់វិញ៕
Tag:
ប្លង់ដី
ប្ដូរទម្រង់
© រក្សាសិទ្ធិដោយ thmeythmey.com