ជាតិ
អាជ្ញាធរជាតិអប្សរា បើកវគ្គបណ្តុះបណ្តាល«កម្មវិធីអប់រំបេតិកភណ្ឌ»ដល់កុមារ ឲ្យស្រទ្បាញ់ និងការពារបេតិកភណ្ឌ រូបភាពពីក្រសួងវប្បធម៌ និងវិចិត្រសិល្បៈ
× ភ្នំពេញ៖ អាជ្ញាធរជាតិអប្សរា បានបើកវគ្គបណ្ដុះបណ្ដាល «កម្មវិធីអប់រំបេតិកភណ្ឌ» ដល់កុមារថ្នាក់ទី៥ និងទី៦ នៅសាលាបឋមសិក្សាស្រះស្រង់ ក្នុងខេត្តសៀមរាប ដើម្បីបណ្ដុះឲ្យពួកគេគំនិតស្រឡាញ់ និងការពារបេតិកភណ្ឌជាតិ។ នេះបើតាមទំព័រហ្វេសប៊ុកក្រសួងវប្បធម៌ និងវិចិត្រសិល្បៈ។
«កម្មវិធីអប់រំបេតិកភណ្ឌ» ជាកម្មវិធីដែលអាជ្ញាធរជាតិអប្សរាបង្កើតឡើង ដើម្បីអប់រំ និង បណ្តុះគំនិតស្រទ្បាញ់ និងការពារបេតិកភណ្ឌ ដល់សិស្សបឋមសិក្សាស្រះស្រង់ ក្នុងខេត្តសៀមរាប។ នេះបើតាមទំព័រហ្វេសប៊ុកក្រសួងវប្បធម៌ និងវិចិត្រសិល្បៈ ដែលបន្តទៀតថា វគ្គបណ្ដុះបណ្ដាលនេះ នឹងបង្រៀនឲ្យសិស្សានុសិស្ស ដឹងពីតម្លៃនៃបេតិកភណ្ឌជាតិ ការការពារបេតិកភណ្ឌ និងផលប្រយោជន៍របស់បេតិកភណ្ឌចំពោះសហគមន៍។
លោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារអង្គរ បានលើកឡើងថា កម្មវិធីអប់រំបេតិកភណ្ឌ មានរយៈពេលមួយឆមាស ដោយបង្រៀនដំបូង គឺយកថ្នាក់ទី៥ និងទី៦ នៃសាលាបឋមសិក្សាស្រះស្រង់ ព្រោះជាពួកគេរស់នៅក្នុងតំបន់ដ៏មានអាទិភាពទាំងបុរាណដ្ឋាន និងទំនៀមទម្លាប់ប្រពៃណី។ សិស្សានុសិស្សទាំងនោះ នឹងក្លាយជាអ្នកនាំសារដ៏មានប្រសិទ្ធិភាព ទៅកាន់សហគមន៍ដែលពួកគេរស់នៅ ពិសេស នឹងមានទុនសម្រាប់ការស្រាវមេរៀននៅថ្នាក់ខ្ពស់ ដោយយល់ដឹងច្រើនពីសម្បត្តិវប្បធម៌ជាតិ។ នេះបើតាមលោក សុខរិទ្ធី៕
Tag:
អាជ្ញាធរជាតិអប្សរា
អប់រំ
បេតិកភណ្ឌ
សៀមរាប
© រក្សាសិទ្ធិដោយ thmeythmey.com