ជាតិ
ការបួសបង្ហាញពីភាពស្មើគ្នារបស់អ្នកឥស្លាម
× សៀមរាប៖ សាសនិកឥស្លាមនៅទូទាំងសាកលលោក កំពុងត្រៀមខ្លួនស្វាគមន៍ខែរ៉ម៉ាឌន ឬខែបួស ដែលនឹងចូលមកដល់នាពេលឆាប់ៗ។ នៅកម្ពុជា រ៉ម៉ាឌននៅឆ្នាំនេះ អាចត្រូវនឹងថ្ងៃទី១៦ ឬ១៧ ឧសភា ទៅតាមការមើលឃើញខែ ដើម្បីកំណត់ចូលខែរ៉ម៉ាឌន។ សាស្ដ្រាចារ្យផ្នែកសាសនាឥស្លាម បានពន្យល់ថា ការបួសក្នុងខែរ៉ម៉ាឌន បានបង្ហាញយ៉ាងច្បាស់ ពីភាពស្មើគ្នារបស់អ្នកឥស្លាម។
បួស គឺជាកាតព្វកិច្ចដែលព្រះអល់ឡោះ បានដាក់មកលើអ្នកកាន់សាសនាឥស្លាមគ្រប់រូប មិនថាមាន ឬក្រ ឬស្ថិតក្នុងឋានៈណាឡើយ។ ត្រង់ចំណុចនេះហើយ ដែលបានបញ្ជាក់ថា ការបួសគឺបង្ហាញពីភាពស្មើគ្នារបស់អ្នកឥស្លាម។
សាស្ដ្រាចារ្យផ្នែកសាសនាឥស្លាម លោក មោសា អះម៉ាត់ បានលើកឡើងថា ការបួសបង្ហាញពីភាពស្មើគ្នារបស់អ្នកកាន់សាសនាឥស្លាមចំពោះអល់ឡោះ ព្រោះវាជាកាតព្វកិច្ច ដែលព្រះអល់ឡោះបានដាក់មកលើអ្នកឥស្លាមគ្រប់រូប មិនខ្វល់ថាអ្នកនោះ ជាអ្នកក្រ អ្នកមាន ជារដ្ឋមន្ត្រី នាយករដ្ឋមន្ត្រី ព្រះមហាក្សត្រ ឬរាស្ដ្រសាមញ្ញឡើយ គឺពួកគេត្រូវបំពេញបួសដូចគ្នា។ លោកពន្យល់ថា៖« ពេលនោះ យើងឃើញថា ពួកគាត់ (អ្នកកាន់សាសនាឥស្លាម) ហាក់មានភាពស្មើគ្នា ចំពោះការបំពេញកាតព្វកិច្ចទៅចំពោះអល់ឡោះ។ វាបង្ហាញថាអ្នកឥស្លាមទាំងអស់មានតម្លៃស្មើគ្នា ក្នុងការបំពេញកាតព្វកិច្ច ហើយក៏មានតម្លៃស្មើគ្នា ក្នុងការទទួលយកនូវផលបុណ្យពីព្រះរបស់ខ្លួនដែរ»។
លោក មោសា អះម៉ាត់ បន្ថែមថា សាសនាឥស្លាម បានដាក់កាតព្វកិច្ចបួសមកលើអ្នកឥស្លាម ចាប់ពីអាយុ១៥ឆ្នាំ ឬមានលក្ខណៈសម្គាល់ផ្សេងទៀត ដែលបញ្ជាក់ថាពួកគេគ្រប់អាយុ ដូចជាស្ត្រីនៅពេលគាត់ចាប់ផ្តើមមានរដូវ ចំណែកបុរសនៅពេលពួកគេមានការយល់សប្ដិ ឬមានអារម្មណ៍ស្រឡាញ់ស្ដ្រីជាដើម។ល។
ដើម្បីឱ្យបួសមានលក្ខណៈពេញលេញ លោក មោសា អះម៉ាត់ ពន្យល់ថា គេត្រូវតបអាហារ និងទឹកនៅពេលថ្ងៃ ចាប់ពីពេលសេតារុណ ឬហ្វាជើររះ (មុនថ្ងៃរះ) រហូតដល់ថ្ងៃលិច ឬនៅពេលវេលា ដែលត្រូវបានកំណត់ក្នុងប្រតិទិនរបស់សាសនាឥស្លាម។ ក្រៅពីតបចំណីអាហារនេះ គេក៏ត្រូវតបទង្វើអាក្រក់ផ្សេងៗទៀតដែរ ដូចជាការលួច ការឆក់ប្លន់ និងការនិយាយដើមគេជាដើម។
ឆ្លើយនឹងសំណួររបស់អ្នកកាសែត ក្រោយការចែករំលែកចំណេះដឹងផ្នែកសាសនាទាក់ទងនឹងបុណ្យខែរ៉ម៉ាឌន នៅវិហារឥស្លាមថ្មី ក្នុងភូមិតាគង់ សង្កាត់សំបួរ ក្រុងសៀមរាប នៅល្ងាចថ្ងៃទី១២ ឧសភា លោក មោសា អះម៉ាត់ បានឱ្យដឹងទៀតថា កាតព្វកិច្ចបួសក្នុងខែរ៉ម៉ាឌន ត្រូវបានព្រះអល់ឡោះដាក់មកលើអ្នកឥស្លាមគ្រប់រូប តាំងពីឆ្នាំទី២ ហិចរ៉ស់ (ឆ្នាំសាសនាឥស្លាម) ឬតាំងពី ១៤០០ឆ្នាំមុនមកម្ល៉េះ នៅជំនាញព្យាការីមហាំម៉ាត់។ បួសខែរ៉ម៉ាឌននៅឆ្នាំនេះ អាចត្រូវនឹងថ្ងៃទី១៦ ឬ១៧ ឧសភា តាមការមើលខែខ្នើត នៅល្ងាចថ្ងៃទី១៥ ឧសភា។
គួររម្លឹកថា បួសខែរ៉ម៉ាឌន ជាកាតព្វថ្ងៃមួយក្នុងចំណោមកាតព្វកិច្ចទាំង៥ ដែលព្រះអល់ឡោះបានដាក់មកលើអ្នកឥស្លាមគ្រប់រូប រួមមាន ទី១ ត្រូវនិយាយថា «គ្មានទេព្រះជាម្ចាស់ លើកលែងតែអល់ឡោះទ្រង់មួយអង្គគត់ ហើយមហាំម៉ាត់ជាព្យាការី» ទី២ ថ្វាយបង្គំមួយថ្ងៃ៥ដង ទី៣ បរិច្ចាគទានទៅអ្នកទៅអ្នកខ្សត់ ទី៤ បួសខែរ៉ម៉ាឌន និងទី៥ ទៅបំពេញកាតព្វកិច្ចហាជ្ជីនៅទីក្រុងម៉ាកាស ប្រទេសអារ៉ាប៊ីសាអូឌីត៕
Tag:
រ៉ម៉ាឌន
ឥស្លាម
© រក្សាសិទ្ធិដោយ thmeythmey.com