ជាតិ
នយោបាយជាតិ
បោះឆ្នោត៖ បក្ស២០ដាក់ពាក្យចូលប្រជែង តែគ្មានឡើយច្រកសម្រាប់ CNRP ស្ត្រីម្នាក់ស្វែងរកឈ្មោះរបស់ខ្លួន នាអំឡុងនៃការបោះឆ្នោតកាលពី១០ឆ្នាំមុន។ រូបថត AFP
× រយៈពេល១៥ថ្ងៃនៃការចុះឈ្មោះគណបក្សនយោបាយ នៅគណៈកម្មាធិការជាតិរៀបចំការបោះឆ្នោត (គ.ជ.ប.) បានបិទបញ្ចប់ហើយ នៅល្ងាចថ្ងៃទី១៤ ខែឧសភា ឆ្នាំ២០១៨នេះ។ លោក គណបក្សមានរហូតទៅ២០ឯណោះ ដែលបានយកពាក្យទៅដាក់នៅគ.ជ.ប. ដើម្បីចូលរួមប្រកួតប្រជែងការបោះឆ្នោត។
មកដល់ដំណាក់នេះ គេអាចដឹងច្បាស់ហើយថា ការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ នឹងមិនមានអតីតគណបក្សសង្គ្រោះជាតិនោះទេ ព្រោះអតីតគណបក្សប្រឆាងដ៏ធំមួយនេះ មិនបានចុះឈ្មោះនៅគ.ជ.ប.។ លោក ហង្ស ពុទ្ធា ប្រាប់សារព័ត៌មានថ្មីៗយ៉ាងដូច្នេះថា៖«គណបក្សណា មិនបានចុះឈ្មោះ គឺគណបក្សនោះ នឹងមិនបានចូលរួមប្រកួតប្រជែងការបោះឆ្នោតទេ»។
ក្នុងចំណោមគណបក្សទាំង២០ គណបក្ស៤ត្រូវបាន គ.ជ.ប ទទួលផ្លូវការជាបន្តបន្ទាប់រួមមាន គណបក្សយុវជនកម្ពុជា គណបក្សប្រជាជនកម្ពុជា គណបក្សសញ្ជាតិកម្ពុជា និងគណបក្សខ្មែររួបរួមជាតិ។ គណបក្សហ្វ៊ុនស៊ិនប៉ិច នឹងឈានទៅដល់ការទទួលស្គាល់ក្រោយការសម្រេចចុងក្រោយនៅថ្ងៃទី១៦ ខែឧសភា។
គណបក្សដែលគ.ជ.ប កំពុងពិនិត្យហើយឈានដល់ការសម្រេចចុងក្រោយនៅថ្ងៃទី១៨ ខែឧសភា រួមមាន គណបក្សខ្មែរតែមួយ គណបក្សប្រជាធិបតេយ្យមូលដ្ឋាន គណបក្សសំបុកឃ្មុំសង្គមប្រជាធិបតេយ្យ និងគណបក្សពន្លឺថ្មី។ នៅថ្ងៃទី១៩ ខែឧសភា គ.ជ.ប នឹងសម្រេចចុងក្រោយលើគណបក្សសម្ព័ន្ធដើម្បីប្រជាធិបតេយ្យ។
គណបក្សដែលបានដាក់ពាក្យនៅថ្ងៃចុងក្រោយរួមមាន គណបក្សធម្មាធិបតេយ្យ គណបក្សខ្មែរឈប់ក្រ គណបក្សខ្មែរអភិវឌ្ឍន៍សេដ្ឋកិច្ច គណបក្សខ្មែរសាធារណរដ្ឋ គណបក្សរស្មីខេមរា គណបក្សសាធារណរដ្ឋប្រជាធិបតេយ្យ គណបក្សជនជាតិដើមប្រជាធិបតេយ្យកម្ពុជា គណបក្សមាតុភូមិយើង គណបក្សឆន្ទៈខ្មែរ ខណៈគណបក្សខ្មែរក្រោក បានដាក់ពាក្យនៅម៉ោង៥ និង៣៥នាទី។ នៅថ្ងៃទី២១ ខែឧសភា គ.ជ.ប នឹងសម្រេចលើការសុំចុះបញ្ជីគណបក្សទាំងនេះ។
សូមបញ្ជាក់ថា ការបោះឆ្នោតនីតិកាលទី៥ មានគណបក្សតែ៨ប៉ុណ្ណោះ ដែលបានចូលរួមប្រកួតប្រជែង៕
© រក្សាសិទ្ធិដោយ thmeythmey.com