ស្ត្រីចិនម្នាក់ទើបដឹងថា សត្វដែលខ្លួនចិញ្ចឹមជាកញ្ជ្រោង មិនមែនជាឆ្កែឡើយ

អន្តរជាតិ

ស្ត្រីចិនម្នាក់ទើបដឹងថា សត្វដែលខ្លួនចិញ្ចឹមជាកញ្ជ្រោង មិនមែនជាឆ្កែឡើយ

16, May 2018 , 8:39 am

រូបភាព

ដោយ: ធីតា

ស្ត្រីចិនម្នាក់ បានចំណាយលុយប្រមាណ១៩០ដុល្លារអាមេរិក ដើម្បីទិញសត្វចិញ្ចឹមមួយ ដោយដំបូង គិតថា វាជាពូជឆ្កែជប៉ុន Japanese Spitz ប៉ុន្តែក្រោយចិញ្ចឹមអស់ជាច្រើនខែ ដើមដឹងថា វាជាសត្វកញ្ជ្រោង។

អ្នកស្រី វ៉ាង ដែលរស់នៅខេត្តសានស៊ី ប្រទេសចិន បានទិញសត្វមួយក្បាល ពីហាងមួយក្នុងតម្លៃប្រមាណ១៩០ដុល្លារអាមេរិក។ ថ្លែងប្រាប់ទូរទស្សន៍ Shanxi Network Television អ្នកស្រីបានបញ្ជាក់ថា គាត់ស្រឡាញ់ពូជឆ្កែជប៉ុន Japanese Spitz យ៉ាងខ្លាំង ដូច្នេះលោកស្រីក៏បានសម្រេចចិត្តទិញសត្វនោះ ដោយមិនបានសួរនាំច្រើន។

អ្នកស្រី វ៉ាង ឆ្ងល់យ៉ាងខ្លាំងដោយសារសត្វជាទីស្រឡាញ់របស់អ្នកស្រី មិនដែលស៊ីចំណីធម្មតារបស់ឆ្កែ ហើយវាមិនចេះព្រុះ និងកន្ទុយដុះវែងខុសពីឆ្កែធម្មតា។ នៅពេលដែលគាត់នាំវាដើរតាមសួន សត្វ និងឆ្កែផ្សេងៗ ហាក់ដូចជាភ័យខ្លាចនឹងវាខ្លាំងណាស់។

គាត់បានចិញ្ចឹមវាដូចជាឆ្កែធម្មតា ដោយឲ្យស៊ីផ្លែឈើ ភ្លៅមាន់ចៀន និងចំណីឆ្កែ ប៉ុន្តែវាបានចាប់ផ្តើមបដិសេធចំណីអាហារទាំងនោះ នៅពេលដែលវាឡើងដល់អាយុជាង៣ខែ។ អ្នកជិតខាងមើលឃើញថា សត្វរបស់អ្នកស្រី វ៉ាង មិនមែនជាឆ្កែឡើយ។

ទីបំផុត គាត់បានយកវាទៅពិនិត្យនៅសួនសត្វ Taiyuan Zoo ហើយពេទ្យជំនាញបានបញ្ជាក់ថា វាពិតជាសត្វកញ្ជ្រោង ដែលត្រូវបានគេផ្សាំងឲ្យដូចជាសត្វចិញ្ចឹមក្នុងស្រុក។ ម្យ៉ាងទៀត ក្លិនរបស់វា ក៏មិនដូចឆ្កែធម្មតានោះដែរ។

តាមការផ្សាយរបស់ព័ត៌មានក្នុងស្រុក អ្នកស្រី Wang បានសម្រេចចិត្តបញ្ជូនសត្វកញ្ជ្រោងនោះ ឲ្យទៅរស់នៅក្នុងសួនសត្វ ដើម្បីឲ្យវាអាចរស់នៅក្នុងបរិស្ថានដែលល្អប្រសើរ៕